Press "Enter" to skip to content

મને રુદન દેજે

[ ભાવનગરના કવિ નાઝિર દેખૈયાની આ ખુબ સુંદર કૃતિ છે. એના એકેક શેરમાંથી અનેરી ખુમારી ટપકે છે. આ ગઝલ માત્ર ગઝલ નથી પણ એક સ્વમાની માનવની પ્રાર્થના, એનો ઈશ્વર સાથેનો સંવાદ છે. ]

ખુશી દેજે જમાનાને, મને હરદમ રુદન દેજે
અવરને આપજે ગુલશન, મને વેરાન વન દેજે.

જમાનાના બધા પુણ્યો જમાનાને મુબારક હો,
હું પરખું પાપને કાયમ, મને એવા નયન દેજે.

સ્વમાની છું, કદી વિણ આવકારે ત્યાં નહીં આવું,
અગર તું દઈ શકે મુજને તો ધરતી પર ગગન દેજે.

ખુદા આ આટલી તુજને વિનતી છે આ ‘નાઝિર’ની,
રહે જેનાથી અણનમ શીશ, મને એવા નમન દેજે.

– નાઝિર દેખૈયા

9 Comments

  1. અશ્વિન
    અશ્વિન July 16, 2008

    જમાનાના બધા પુણ્યો જમાનાને મુબારક હો,
    હું પરખું પાપને કાયમ, મને એવા નયન દેજે.
    ખુદા આ આટલી તુજને વિનતી છે આ ‘અશ્વિનની’ … બહુ સરસ. તમારી ડાયરીનો ખજાનો પીરસતા રહેજો.

  2. Dr.Firdosh A.Dekhaiya
    Dr.Firdosh A.Dekhaiya October 31, 2008

    અશ્રુઓ સારો નહીં
    મોત ને મારો નહીં

    આગ થૈ ને વાગશે,
    જખ્મ ને ઝારો નહીં

    ને કફનમાં યાદ ના
    શિલ્પ કંડારો નહીં

    ગૂંગળાવે છે કબર,
    શ્વાસ !પરવારો નહીં

    મોત ની કોને ખબર?
    કોઇ અણસારો નહીં

    તા-કયામત બોલશે,
    પાપ,છૂટકારો નહીં

    ના અઝાબો છોડશે,
    ઈશ પણ તારો નહીં

    મોત પરવારી જશે,
    હોંસલા હારો નહીં

    —-ડો.ફિરદૌસ દેખૈયા

  3. Dr.Firdosh A.Dekhaiya
    Dr.Firdosh A.Dekhaiya October 31, 2008

    હું છું સવાલ સહેલો,ને અઘરો જવાબ છું;
    ને હુ સમય ના હાથની ખુલ્લી કિતાબ છું.

    એક યારની ગલી ,બીજી પરવરદિગારની;
    ના ત્યાં સફળ હતો,ના અહીં કામિયાબ છું.

    પૂછો ના કેમ સાંપડે ગઝલો તણો મિજાઝ;
    ફૂલોની મ્હેક છું,અને જૂનો શરાબ છું.

    રબ ની દુહાઇ ના દે એ નિગાહબાને-દીન ;
    તુજથી વધારે સાફ છું,એહલે-શરાબ છું.

    જીવ્યો છું જે મિજાજે,મરવાનો એ રુઆબે,
    લાખો રિયાસતો નો બસ એક જ નવાબ છું.

    — ડો.ફિરદૌસ દેખૈયા
    [ Your other submitted poems have been moved on આપની રચનાઓ page. Please submit your poems on that page so that other readers can easily read it at one place. Thank you for understanding. – admin ]

  4. Dr. firdosh dekhaiya
    Dr. firdosh dekhaiya November 5, 2008

    ગાયબ છે અંદરનો માણસ
    જીવે તે અવસરનો માણસ

    મસ્તીમાં લડખડતી સાંજે
    ખોવાયો જંતરનો માણસ

    ઘટનાઘેલો પાને-પાને
    ઊગ છે મંઝરનો માણસ

    પરપોટાના પડ ઉખાડે
    પીઝા ને બર્ગરનો માણસ

    દાપાં માંગે ડગલે-ડગલે
    સાલ્લો આ દફતરનો માણસ

    – સલીમ શેખ(સાલસ)

  5. Dr. firdosh dekhaiya
    Dr. firdosh dekhaiya November 5, 2008

    રાહી ઓધારિયા ની એક રચનાઃ
    આકાશમાંથી એક સિતારો ખર્યાની વાત
    બેસો, કહું છું તમને હું મારા મર્યાની વાત

    વળગણ બધાંયે છૂટી ગયાં તમને જોઈને
    મારા મહીંથી ધીમે-ધીમે હું સર્યાની વાત

    તમને ય તે હવે તો ખરી લાગતી હશે
    જન્માક્ષરો મારા ને તમારા વર્યાની વાત

    ‘રાહી’! અબળખા કોઇ હવે બાકી ક્યાં રહી?
    કેવળ રહી છે મન મહીં તમને સ્મર્યાની વાત.

    મિત્રો,એકલ સાંજે જ્યારે આરામખુરશીમાં મગજ આરામ ફરમાવતું હોય ત્યારે આવી કોઈ રચના તમારી કને હોય તો એ સાંજનું શું કહેવું?

  6. Dr. firdosh dekhaiya
    Dr. firdosh dekhaiya November 5, 2008

    સત્યના મારા પ્રયોગો સાવ તો ખોટા નથી,
    વાત ખાલી એટલી કે એમના ફોટા નથી

    કેટલી નરમાશથી સાગર મળે આકાશને,
    કે હવાની ઓઢણી પર ક્યાંય લીસોટા નથી

    જાત બાળીને ઉજાળે વિશ્વ આખાને સદા,
    ચાંદ પણ સંમત થશે કે સૂર્યના જોટા નથી

    કો’ વધૂને બાળતા હાથો વિશે બોલ્યા સતી,
    પાનબાઈ!એમના માટે હજી “પોટા” નથી?

    ભ્રુણ હત્યા લાગશે ,સંભાળજે પાગલ પવન,
    કૂખમાં જળની હવા છે,સિર્ફ પરપોટા નથી.

    – સલીમ શેખ(સાલસ)
    [ Your poems have been moved to આપની રચનાઓ page. Please submit your poems on that page so that other readers can easily read it at one place. Thank you for understanding. – admin ]

  7. Rangani Naranbhai
    Rangani Naranbhai February 3, 2013

    અણીને વખતે કરેલો ઉપકાર ભલે ઓછો હોય , એનુ મુલ્ય અખિલ વિશ્વ કરતા યે અધિક છે.

  8. Rangani Naranbhai
    Rangani Naranbhai February 3, 2013

    મનુષ્યનો જન્મ કિમતી વસ્ત્ર જેવો છે. એ મફતમાં નથી મલ્યો. એનું ચીંથરુ કરી વેડફી ન નાખતા. માટે તેનું મુલ્ય કરજો.

  9. Rangani Naranbhai
    Rangani Naranbhai February 4, 2013

    ચોત્રીસ અક્ષરકા વિસ્તાર, તેમા ખરાબ અક્ષર નવ સવો કહે સમજિને બાદ કરતા સારા કહે સવ(છળ+કપટ+ખટપટ)=કુલ અક્ષર ૯

Your email address will not be published. Required fields are marked *

This site uses Akismet to reduce spam. Learn how your comment data is processed.