Press "Enter" to skip to content

Author: admin

જખમ આપિયા છે


[Painting by Donald Zolan]
અલવિદા ૨૦૨૦. સ્વાગત ૨૦૨૧.
સૌ મિત્રોને ઈસુના નવા વર્ષની શુભકામનાઓ.
*
બહુ ખુબસુરત ભરમ આપિયા છે,
મને જિંદગીએ જખમ આપિયા છે.

પ્રથમ દર્દ દીધું દવા આપનારે,
પછી એને માટે મલમ આપિયા છે.

મળી ભાગ્યરેખાને નામે તિરાડો,
સહારા ય કેવાં નરમ આપિયા છે !

દિશાઓ, ન મંઝિલ; ઉતારા, ન સાથી,
ફકત ચાલવાને કદમ આપિયા છે.

હશે કેવી જાહોજલાલી પ્રણયમાં !
કે પીવાને અશ્રુ ગરમ આપિયા છે.

દીધી બે જ આંખો અને લાખ સપનાં,
ને ઊપરથી ટૂંકા જનમ આપિયા છે.

લખ્યું નામ મક્તામાં ‘ચાતક’ અમસ્તુ,
હકીકતમાં કાગળ, કલમ આપિયા છે.

– © દક્ષેશ કોન્ટ્રાકટર ‘ચાતક’
*
નોંધ – રદિફમાં આપ્યા-આપિયા (ગાલગા) લીધેલું છે.

6 Comments

સમયની સહી


[A Painting by Donald Zolan]
*
ઘટે છે કૈંક ઘટનાઓ તમે જે ચહી નથી હોતી,
અમસ્તી આંખમાં અશ્રુની ખાતાવહી નથી હોતી.

હું તમને પ્રેમ કરવાનો પુરાવો લઈને આવ્યો છું,
મને સમજાય છે વાતો તમે જે કહી નથી હોતી.

ઘણા વરસો પછી જોયા તો મનમાં પ્રશ્ન ઉદભવ્યો,
અમુક ચહેરા ઉપર શાને સમયની સહી નથી હોતી?

અને એ યાદ આવ્યું તો ચકાસ્યા મેંય હોઠોને,
સુખદ સ્પર્શોની કોઈપણ નિશાની રહી નથી હોતી.

હું હમણાં પ્રેમ કરવા પર પ્રવચન દઈને આવ્યો છું,
ઘણાં છે દર્દ જેમાં દોસ્ત, આંખો વહી નથી હોતી.

ગઝલ આવે જ છે મળવા સમય પર, પૂછ ‘ચાતક’ને,
સમયસર આપણે કેવળ કલમને ગ્રહી નથી હોતી.

– © દક્ષેશ કોન્ટ્રાકટર ‘ચાતક’

4 Comments

સમજાવટ


[Painting by Donald Zolan]
*
આંખથી આંસુને મોઘમ રાખવાનું હોય છે,
લાગણીને તે છતાં રૂપ આપવાનું હોય છે.

ભેજ નહીં, ખારાશ, બસ ખારાશ હો એવી રીતે,
પારકી પીડાનું આંસુ ચાખવાનું હોય છે.

ને ખરીદી હો પ્રતીક્ષા ખુબ ઊંચા દામથી,
વેચનારાથી જ એ છુપાવવાનું હોય છે.

એજ કારણથી હવે અખબાર હું જોતો નથી,
જે કદી ધાર્યું ન’તું એ માનવાનું હોય છે.

હોય છે ‘ચાતક’ સમયને આવવાનો પણ સમય,
જિંદગીને એટલું સમજાવવાનું હોય છે.

– © દક્ષેશ કોન્ટ્રાકટર ‘ચાતક’

3 Comments

આંસુઓના સ્મારક ક્યાં છે?


[Painting by Donald Zolan]
*
દોસ્ત વફાને લાયક ક્યાં છે? દુશ્મન પણ નાલાયક ક્યાં છે?
દુઃખ જોઈને દોડી આવે આંસુ જેવા ધાવક ક્યાં છે?

જીવન છે ફિલ્લમ દુઃખોની, પીડાઓ ખલનાયક ક્યાં છે?
આંખોની બદનામ ગલીમાં આંસુઓના સ્મારક ક્યાં છે?

અડતાવેંત જ ઓગાળી દે, સ્પર્શ એટલા દાહક ક્યાં છે?
આંખ હશે સારી વક્તા, પણ પાંપણ જેવા ભાવક ક્યાં છે?

પરપોટાંને તરતાં રાખે, પાણી એવા પાવક ક્યાં છે?
દોસ્ત હવે આંબાની ડાળે, કોયલ જેવા ગાયક ક્યાં છે?

નામ જોઈ કાગળ ચૂમી લે, હાથ લઈ આંગળ ચૂમી લે,
‘ચાતક’ની ગઝલોના લયલા-મજનૂ જેવા ચાહક ક્યાં છે?

– © દક્ષેશ કોન્ટ્રાકટર ‘ચાતક’

1 Comment

કદી ફાવ્યો નથી


[Painting by Donald Zolan]
*
ફૂલ કે ફોરમ ઘરે લાવ્યો નથી,
પ્રેમમાં ભમરો જરી ફાવ્યો નથી.

સૂર્ય ઈર્ષ્યાથી જો સળગી જાય તો?
દીવડો એથી જ પેટાવ્યો નથી.

લાગણીનું છે પ્રવાહી રૂપ, પણ,
સ્વાદ આંસુનો મને ભાવ્યો નથી.

છાંયડો સુખમાં પડે ના એટલે,
માંડવો સમજીને બંધાવ્યો નથી.

જિંદગી, તું ધ્યાનથી જોજે ફરી,
મેં પીડાનો પેગ મંગાવ્યો નથી.

મારી પાસે આગ છે ને અશ્રુઓ,
મારી પાસે એકલા કાવ્યો નથી.

હું થયો ‘ચાતક’ પ્રતીક્ષા પામતાં,
મેં સમયને માત્ર હંફાવ્યો નથી.

– © દક્ષેશ કોન્ટ્રાકટર ‘ચાતક’

6 Comments

મુસીબત યાદ આવે છે


(A Painting by Donald Zolan)
*
ખુશીના કૈં પ્રસંગોમાં મુસીબત યાદ આવે છે,
ખુશીને પામવા ચુકવેલ કીમત યાદ આવે છે.

વ્યથાની ખાનદાની કે છળે ના કોઈને સ્મિતથી,
ખુશીની સાથ આંસુઓની સોબત યાદ આવે છે.

હતી મુફલીસ દશા તોયે છલકતાં આંખમાં સપનાં,
ખુદા, તારી દિલેરી ને એ રહેમત યાદ આવે છે.

તણખલા સ્પર્શના લઈને પ્રણયની આગ પેટવવા,
કરેલી આપણે શ્વાસોની જહેમત, યાદ આવે છે.

કોઈને યાદ કરવાનો ઈજારો આપ ના લેતા,
તમારું ભૂલવાનું પણ ગનીમત, યાદ આવે છે.

પ્રસંગોપાત ઠોકર વાગશે તમનેય રસ્તામાં,
પ્રસંગોપાત અમને પણ મુહબ્બત યાદ આવે છે.

મિલનની શક્યતાના બારણાંઓ બંધ છે ‘ચાતક’,
જડેલી હસ્તરેખાઓમાં કિસ્મત યાદ આવે છે.

– © દક્ષેશ કોન્ટ્રાકટર ‘ચાતક’

4 Comments