ગુજરાતી સાહિત્યનું નવું સરનામું
*
રસ્તા ઉપર ચાલો ત્યારે વચ્ચે ખાડા આવે છે,
સુખની સાથે એવી રીતે દુઃખના દા’ડા આવે છે.
આંસુને ઉધેઈ ગણો કે કીડી મંકોડાની જાત?
એક નીકળે એની પાછળ ધાડેધાડા આવે છે.
જીવનમાં મોકો આપીને જેને આગળ બેસાડો,
એજ પછી આગળ જોવામાં તમને આડા આવે છે.
જ્યારે જ્યારે નામ લખું હું મારી ‘મા’નું કાગળમાં,
પેન ગમે તેવી હો તોયે અક્ષર જાડા આવે છે.
એક વખત એને ‘ચાતક’ આપ્યું’તું રહેવા દિલ મારું,
આજ લગી એની યાદો ભરવાને ભાડા આવે છે.
– © દક્ષેશ કોન્ટ્રાકટર ‘ચાતક’
*
[Above: A Painting by Donald Zolan]
*
૨૦૦૮ થી શરૂ થયેલ મીતિક્ષા.કોમ પર પ્રસિદ્ધ થનાર આ ૭૦૦ મી પોસ્ટ છે.
આપ સહુ વાચકમિત્રોના ઉમળકાભર્યા સહકાર બદલ ખૂબ ખૂબ આભાર.
*
સૂરજમુખી સૂરજનું જેવી રીતે નામ બોલે છે,
તમે બોલો ન બોલો પણ તમારું કામ બોલે છે.
પ્રયત્નો ખંતપૂર્વકના હશે સાચી દિશામાં તો,
સમય આવ્યે તમારી સિદ્ધિઓ ઈનામ બોલે છે.
દશાનનની દશા જોઈ તમે ના એટલું સમજ્યા?
જીવનભર જે ભૂલ્યા, મરતી વખત એ રામ બોલે છે.
શહેરને તાવ આવે તો રડે જઈ કોના ખોળામાં?
કરી છપ્પનની છાતી એ વખત બસ ગામ બોલે છે.
અહીંથી સ્વર્ગમાં વન-વે જવાનું કેટલું ભાડું?
નથી વાહન ને પંડીત તોય ઊંચા દામ બોલે છે.
તું તારી ધર્મપત્નીને કદી ક્રેડીટ તો એની આપ,
પૂછું છું રાઝ ચ્હાના સ્વાદનો, આસામ બોલે છે.
મુસીબત આવતાં થઈ જાય છે લોકો રફુચક્કર,
બચાવવા કોઈને મારેલ કૂદકો હામ બોલે છે.
પીવાની એ ખૂબી છે કે ભલેને મૌન રાખો પણ
તમારા હાલ ને હાલાત તૂટ્યાં જામ બોલે છે.
બિનાકા ગીતમાલાના ગીતો અટકી ગયા તો શું,
હજીયે કાનમાં મજરુહ-રફી-ખય્યામ* બોલે છે.
ફકત મીઠું મધુરું બોલજો ‘ચાતક’, નહીંતર લોક
કહેશે મંચ પર આવી કવિ બેફામ બોલે છે.
– © દક્ષેશ કોન્ટ્રાકટર ‘ચાતક’
*
મજરુહ સુલતાનપુરી – એવોર્ડ વિજેતા ગીતકાર
મોહમ્મદ રફી – સુપ્રસિદ્ધ પાર્શ્વગાયક
મોહમ્મદ જહૂર ખય્યામ – મશહૂર સંગીતકાર
*
[Above: Painting by Donald Zolan]
સૌ વાચક મિત્રોને ઈશુના નવા વર્ષની શુભકામનાઓ.
*
ભૂલ જો સમજાય તો એને સુધારી રાખજે,
**હોય જે સારા, દશા એનીય સારી રાખજે.
ચાર દિનની હું તને આપું છું મહેતલ, ઓ પ્રભુ,
તારે શું કરવું છે એ જલદી વિચારી રાખજે.
પાપ-પુણ્યોના તું અઘરાં દાખલા પૂછ્યા કરે,
ચેક કરવામાં હવે થોડી ઉદારી રાખજે.
ભૂલથી સંવેદનાની વાત તો કરતો જ નહીં,
મેં કીધું’તું ફૂલદાનીમાંય બારી રાખજે.
સુખ દુઃખ સરખાં ન આપે તો મનાવી લઈશ મન,
પણ કૃપા હર હાલમાં તું એકધારી રાખજે.
બાણશૈયા પર સૂવાનું નામ છે આ જિંદગી,
શૈષશૈયા પર કદી મારી પથારી રાખજે.
જીવતરની જાતરાનો કર અહીં પૂરો હિસાબ,
હું નથી કહેતો કે તું થોડી ઉધારી રાખજે.
વાર ના લાગે થતાં કલિયુગમાં રાધાનું રમણ,
તું સદા તારું સ્વરૂપ બાંકેબિહારી રાખજે.
તું તો જાણે છે કે ‘ચાતક’ જીવતો વિશ્વાસ પર,
તારું ચાલે તો બધી આશા ઠગારી રાખજે,
– © દક્ષેશ કોન્ટ્રાકટર ‘ચાતક’
*
** પુણ્યસ્મરણ – બરકત વિરાણી ‘બેફામ’
ખુદા તારી કસોટીની પ્રથા સારી નથી હોતી,
જે સારા હોય છે તેની દશા સારી નથી હોતી.
*
[Above: Painting by Donald Zolan]
*
રાત આખી રોઈને બેઠા છીએ,
કેટલું કૈં ખોઈને બેઠા છીએ.
સ્વપ્નથી મેલી થયેલી આંખને,
આંસુઓથી ધોઈને બેઠા છીએ.
જે હથેળીમાં ન’તી ચિતરાઈ, બસ
એજ રેખા જોઈને બેઠા છીએ.
વીજળી ચમકીને કરશે શું હવે,
મોતીઓ તો પ્રોઈને બેઠા છીએ.**
નામ ‘ચાતક’ એટલે ધાર્યું અમે,
મનમાં ધારી કોઈને બેઠા છીએ.
*
– © દક્ષેશ કોન્ટ્રાકટર ‘ચાતક’
*
** (વીજળીના ચમકારે મોતીડાં પરોવો પાનબાઈ …. ગંગાસતીનું પુણ્યસ્મરણ)
[Above – Painting by Donald Zolan]
*
અશ્રુઓ લ્હોવાને પાંપણ આવશે,
હર સમસ્યાનું નિવારણ આવશે.
આહ, આંસુ ને જુદાઈ ક્યાં લગી?
એક દિ એનુંય મારણ આવશે.
બહુ મથો તોયે ઉકેલી ના શકો,
પ્રેમમાં એવી મથામણ આવશે.
આપણી શ્રદ્ધા જ જીતતી હોય છે,
હર સફળતાનું એ તારણ આવશે.
લાખ રેખાઓ ભલે દોરો તમે,
હો સીતા મનમાં તો રાવણ આવશે.
હોય જો ‘ચાતક’ મિલનની ઝંખના,
ખુદ લઈ પગલાંને આંગણ આવશે.
આંખ પર ‘ચાતક’ ભરોસો રાખજો,
ભર ઉનાળામાંય શ્રાવણ આવશે.
– © દક્ષેશ કોન્ટ્રાકટર ‘ચાતક’
*
[Above – Painting by Donald Zolan]
*
જે નથી, એનો નિરર્થક ડોળ કરવા ના મથો,
લંબચોરસ જિંદગીને ગોળ કરવા ના મથો.
આગવું સૌંદર્ય છે પ્રત્યેક જગ્યાનું જગે,
ગામનાં ફળિયાં પરાણે પોળ કરવા ના મથો.
માપસર વરસાદ હો તો પાક ઊગે માતબર,
તૃપ્ત કોઈ હોય તો તરબોળ કરવા ના મથો.
થઈ શકે તો કોઈના શુભ યત્નને ટેકો કરો,
હા, પવનની લ્હેરખી વંટોળ કરવા ના મથો.
પ્રેમ સાચો હોય તો હર હાલમાં કાયમ રહે,
સાઠ વરસે ઉમ્ર પાછી સોળ કરવા ના મથો.
હર ગતિની હોય છે અદકી ને અલગારી મજા,
રેલગાડીને તમે ચકડોળ કરવા ના મથો.
મોજ આવે તો લખો બેશક તમે ‘ચાતક’ ગઝલ,
અમથેઅમથું શબ્દનું ભંડોળ કરવા ના મથો.
– © દક્ષેશ કોન્ટ્રાકટર ‘ચાતક’
*
[Above – Painting by Donald Zolan]