Press "Enter" to skip to content

મીતિક્ષા.કોમ Posts

chat છે


[Painting by Donald Zolan]
*
શ્વાસ પર લાગેલ સઘળી bet છે
જિંદગી સપનાંની સાથે date છે

સુખ લગભગ માઉસ જેવું હોય છે,
દુઃખ એ પાછળ પડેલી cat છે.

છે સફળતા આભમાં ઊડતા વિહગ,
હસ્તરેખા પાથરેલી net છે.

લાગણીની આપ-લેના મામલે,
અશ્રુ એ લાગુ પડેલો VAT છે.

શ્વાસ ધીમા થાય એનો અર્થ એ,
મોતની ગાડી સમયથી late છે.

એકતરફી ચાલતી, આખું જીવન,
પ્રાર્થના ઈશ્વરની સાથે chat છે.

ભાગ્યમાં ‘ચાતક’ પ્રતીક્ષા છે તો છે,
લાઈફનું પૂછો તો બંદા set છે.

– © દક્ષેશ કોન્ટ્રાકટર ‘ચાતક’

Leave a Comment

આંસુ નીકળતાં હોય છે


[Painting by Donald Zolan]
અલવિદા ૨૦૨૧. સ્વાગત ૨૦૨૨.
સૌ મિત્રોને ઈસુના નવા વર્ષની શુભકામનાઓ.
*
આકરા સંઘર્ષમાં આંસુ નીકળતાં હોય છે,
કે પછી બહુ હર્ષમાંં આંસુ નીકળતાં હોય છે.

પાંપણો બીડી સહજ જોઈ શકાતા હોય એ,
સ્વપ્નના ઉત્કર્ષમાં આંસુ નીકળતાં હોય છે.

એકલી ભીંતો રડે? એવું તો થોડું હોય કંઈ?
ક્યાંક ભીની ફર્શમાં આંસુ નીકળતાં હોય છે.

ઠાઠ, ઠસ્સો, મદભરેલી ચાલથી અંજાવ ના,
રોજ એના પર્સમાં આંસુ નીકળતાં હોય છે.

હોય છે પથ્થર સમા કોઈ તબીબોના હૃદય,
કોઈ ઋજુ નર્સમાં આંસુ નીકળતાં હોય છે.

કેટલા મહિના દિવસ હસતો રહે છે માનવી,
એ હિસાબે વર્ષમાં આંસુ નીકળતાં હોય છે.

આંખને પૂછીને ‘ચાતક’ ખાતરી એની કરો,
પ્રેમના નિષ્કર્ષમાં આંસુ નીકળતાં હોય છે.

– © દક્ષેશ કોન્ટ્રાકટર ‘ચાતક’

Leave a Comment

કશું કરવું નથી


[Painting by Donald Zolan]
*
ખીસ્સું ખાલી છે, હવે ભરવું નથી,
જીવવા માટે કશું કરવું નથી.

થાય એનાથી તો એ કરશે મદદ,
હાથ જોડી રોજ કરગરવું નથી.

ખુબ પીડા આપશે મોટું થતાં,
સ્વપ્નને એથી જ સંઘરવું નથી.

કેટલું બીતાં હશે આ આંસુઓ,
ઢાળ છે પણ આંખથી સરવું નથી !

લાગણી નામે નદી છે સાંકડી,
ડૂબવું છે આપણે, તરવું નથી.

જિંદગીથી ખાસ કૈં ઉમ્મીદ ક્યાં,
તોય જલદી કોઈને મરવું નથી.

શ્વાસ છે પીળા થયેલા પાંદડા,
પાનખરમાં જેમને ખરવું નથી.

ચાલવું ‘ચાતક’ સમયની માંગ છે,
માંહ્યલાએ થાન પરહરવું નથી.

– © દક્ષેશ કોન્ટ્રાકટર ‘ચાતક’

5 Comments

બારી નીકળવી જોઈએ


[Painting by Donald Zolan]
*
દુશ્મનો વચ્ચે જૂની યારી નીકળવી જોઈએ,
ભીંતની બુનિયાદમાં બારી નીકળવી જોઈએ.

ચાંદ આવીને અગાસી પર ઊભો છે આજ તો,
દોસ્ત, આજે રાત પણ સારી નીકળવી જોઈએ.

લોક દરિયાનો જ કાયમ વાંક કાઢે છે અહીં,
ચાખતાં કોઈ નદી ખારી નીકળવી જોઈએ.

માનું છું, એનું હૃદય કોઈ શિલાથી કમ નથી,
કોઈ દિવસ એમાંથી નારી નીકળવી જોઈએ.

એમની સાથે ઊભા રહેવાની મનમાં પ્યાસ છે,
પાણીપુરીની અહીં લારી નીકળવી જોઈએ.

પ્રેમનો મતલબ અહં ઓગાળવાની પ્રક્રિયા,
ચીસ હો કે કીસ – સહિયારી નીકળવી જોઈએ.

આ ગઝલ ‘ચાતક’ દવાથી કોઈ રીતે કમ નથી,
તો અસર એનીય ગુણકારી નીકળવી જોઈએ.

– © દક્ષેશ કોન્ટ્રાકટર ‘ચાતક’

2 Comments

કંટાળો આવે નહીં?


[Painting by Donald Zolan]
*
જેને સપનામાં પણ બોરાં ભાવે નહીં,
એવા લોકોને શબરી બોલાવે નહીં.

હોય કબૂતર એવા પણ આ દુનિયામાં,
ચિઠ્ઠી લઈને જાય ખરાં, વંચાવે નહીં.

દ્વાર, દીવાલો, ટીવી, માણસ, કુંડાઓ,
દોસ્ત, ફુલોને શું કંટાળો આવે નહીં?

આંખ બિચારી પાંપણ પર તોરણ બાંધે,
આંસુને ઘરમાં રહેવું સમજાવે નહીં.

વાદળ સાથે સંતાકૂકડી રમતો રહે,
દાદો છે સૂરજ, એથી હંફાવે નહીં.

બોલો, ‘મા’ને બદલામાં હું શું આપું?
ખોવાઈ મારામાં, પણ શોધાવે નહીં.

મોડા આવ્યા છોને, તો આવી બનશે,
‘ચાતક’ મારું નામ ખરું, સ્વભાવે નહીં.

– © દક્ષેશ કોન્ટ્રાકટર ‘ચાતક’

2 Comments

ખુમારી રાખવી પડશે


[Painting by Donald Zolan]
મીતિક્ષાબેન અને મીતિક્ષા.કોમને જન્મદિનની શુભેચ્છાઓ.
*
મુસીબત હો ભલે ભારી, ખુમારી રાખવી પડશે,
તમારે ભીંતની વચ્ચે જ બારી રાખવી પડશે.

સુખોનું ચાંદ જેવું છે, ફકત દેખાય મરજીથી,
ઝલક માટે દુઃખો ઉપર પથારી રાખવી પડશે.

જીવનની ડાયરીના પાને પાને હોય છે ભૂલો,
સફળતાની શરત, એને સુધારી રાખવી પડશે.

અમોલી ઉંઘ વેચી, તોય આવ્યા હાથ ના સપનાં?
પ્રણય છે, દોસ્ત થોડી તો ઉધારી રાખવી પડશે.

તમે બહુ સ્વસ્થ છો એથી ખુશી મળતી નથી તમને,
તમારે પ્રેમ જેવી કો બિમારી રાખવી પડશે.

વગર પૂછ્યે એ આવી જાય છે બિન્ધાસ્ત આંખોમાં,
મને લાગે છે આંસુની સુપારી રાખવી પડશે.

જિજીવિષાના પગ લંબાય છે ‘ચાતક’ સમય સાથે,
કહી દો શ્વાસને, ચાદર વધારી રાખવી પડશે.

– © દક્ષેશ કોન્ટ્રાકટર ‘ચાતક’

4 Comments