Press "Enter" to skip to content

મીતિક્ષા.કોમ Posts

નજરમાં ન આવ્યા


[A Painting by Donald Zolan]
*
દિવસ, રાત, કોઈ પ્રહરમાં ન આવ્યા,
હતા આંખમાં, પણ નજરમાં ન આવ્યા.

અમીરી તો જુઓ જરા આંસુઓની,
રહ્યા કાયમી પણ અમરમાં ન આવ્યા.

જરા ચાલવાથી જ ભેટી શકાતે,
ઘણાં ગામ તોયે શહરમાં ન આવ્યા.

કરી નાખ્યો ખારો સમંદર રડીને,
નવાઈ, કે આંસુ નહરમાં ન આવ્યા.

ભરોસો જ ભારી પડ્યો માનવીને,
પીધું જ્યારે ત્યારે ઝહરમાં ન આવ્યા.

હશે લક્ષ્ય માટેની કેવી પ્રબળતા!
ઉતારાઓ કોઈ સફરમાં ન આવ્યા.

તમે શબ્દરૂપે હતા સાથ કાયમ,
ફકત છંદમાં કે બહરમાં ન આવ્યા!

તરસના નથી હોતા સરનામાં ‘ચાતક’,
ઘણાં જામ એથી અધરમાં ન આવ્યા.

– © દક્ષેશ કોન્ટ્રાકટર ‘ચાતક’

Leave a Comment

ગઝલ સારી લખાઈ છે


[Painting by Donald Zolan]
*
કુશળ ને ક્ષેમ છે એથી ગઝલ સારી લખાઈ છે,
ખુદાની રે’મ છે એથી ગઝલ સારી લખાઈ છે.

સુધારા છંદ ને વ્યાકરણના લખવા દસ વખત આપ્યા,
હજી એ મે’મ છે એથી ગઝલ સારી લખાઈ છે.

ઘણી જહેમત પછી બાંધ્યો કોઈના આંસુઓ ઉપર,
સલામત ડેમ છે એથી ગઝલ સારી લખાઈ છે.

તબીબે લાગણી માપી નવા ચશ્મા લખી આપ્યા,
ત્વચાની ફ્રેમ છે એથી ગઝલ સારી લખાઈ છે.

બિમારીની ખબર જાણી એ મળવાને ઘરે આવ્યા,
ને પૂછ્યું કેમ છે? એથી ગઝલ સારી લખાઈ છે.

અગાસી પર હતાં એ, એમનો પડછાયો મારા પર,
અડ્યાનો વ્હેમ છે એથી ગઝલ સારી લખાઈ છે.

જીવન જીવવા અને લખવાને માટે ક્યાં અલગ રાખ્યું?
એ બંને સે’મ છે એથી ગઝલ સારી લખાઈ છે.

મુકમ્મલ હોત તો ‘ચાતક’ કલમમાં ધાર ક્યાં આવત,
અધૂરો પ્રેમ છે એથી ગઝલ સારી લખાઈ છે.

– © દક્ષેશ કોન્ટ્રાકટર ‘ચાતક’

4 Comments

ચાહી શક્યો છું ક્યાં !


[Painting by Donald Zolan]
*
પછી વરદાનમાં બીજું કશું માગી શક્યો છું ક્યાં!
તને ચાહ્યા પછી હું કોઈને ચાહી શક્યો છું ક્યાં!

નજર ટકરાઈ એ ક્ષણથી જ હું દિગ્મૂઢ બેઠો છું,
હજી હું આંગળા આશ્ચર્યથી ચાવી શક્યો છું ક્યાં!

ગયો ગંગાતટે પણ આચમન કે સ્નાન ના કીધું,
તને સ્પર્શ્યા પછી કોઈ ચીજથી નાહી શક્યો છું ક્યાં!

દીવાના અગણિત અહેસાનની નીચે દબાયો છું,
હવાનો હાથ ઝાલી બે કદમ ચાલી શક્યો છું ક્યાં!

હવે પુરુષાર્થ કરતાં ભાગ્ય પર ઝાઝો ભરોસો છે,
હથેળીમાં લખ્યું એથી વધુ પામી શક્યો છું ક્યાં !

ઉઘાડાં બારણાં હોવા જ કૈં પૂરતું નથી હોતું,
વિના સ્વાગત હું મારે ઘેર પણ આવી શક્યો છું ક્યાં!

સમયસર આપ આવ્યા તો થયો અફસોસ ‘ચાતક’ને,
તરસના સ્વાદને હું મનભરી માણી શક્યો છું ક્યાં!

– © દક્ષેશ કોન્ટ્રાકટર ‘ચાતક’

7 Comments

ખોઈ બેઠો છું


[Painting by Donald Zolan]
*

પ્રસંગોમાં જીવું છું તોય ઘટના ખોઈ બેઠો છું,
હું તારી યાદના રંગીન પગલાં ખોઈ બેઠો છું.

મને મંઝિલ મળી એનો હરખ છે, ના નહિ પાડું,
છે પીડા એજ કે હું ગમતાં રસ્તા ખોઈ બેઠો છું.

વિવાદોમાં હતો ત્યારે ઘરે ઘરમાં હું ચર્ચાયો,
જીવું છું સાફસૂથરું તો એ ચર્ચા ખોઈ બેઠો છું.

પ્રસિદ્ધિના શિખર પર એ ખબર પડતી નથી જલ્દી,
હું મારી જાતને મળવાના નકશા ખોઈ બેઠો છું.

હું પત્થર પૂજતો ત્યારે ન’તી મારી દશા આવી,
મળી કૈં સાધુ-સંતોને હું શ્રદ્ધા ખોઈ બેઠો છું.

તને બેચેન રાતોની કસક હું કેમ સમજાવું,
હું તારી નિંદ માટે મારા સપના ખોઈ બેઠો છું.

પુરાવો પ્રેમનો એથી વધારે શું તને આપું?
રટૂં છું નામ તારું ને હું ગણના ખોઈ બેઠો છું.

મળી ખોબો ભરીને હર ખુશી પરદેશમાં ‘ચાતક’
હું મારો દેશ, મારી માની મમતા ખોઈ બેઠો છું.

– © દક્ષેશ કોન્ટ્રાકટર ‘ચાતક’

3 Comments

તને હું કેમ સમજાવું?


[મહારાષ્ટ્ર રાજ્ય ગુજરાતી સાહિત્ય અકાદમી અને ટહુકો ના સંયુક્ત ઉપક્રમે તા. ૮ જાન્યુઆરી ૨૦૨૨ ના રોજ યોજાયેલ કવિ સંમેલન ‘પરદેશી પારેવા’ અંતર્ગત મારું ગઝલ પઠન.]
*  *  *
અજબ છે મૌનની ભાષા, તને હું કેમ સમજાવું !
પડે છે શબ્દ ત્યાં ટાંચા તને હું કેમ સમજાવું !

તું પૃથ્વી ગોળ માનીને નીકળતી ના કદી ઘરથી,
જીવનમાં હોય છે ખાંચા તને હું કેમ સમજાવું !

ગણતરી એ હતી કે જિંદગીમાં ક્યાંક પહોંચાશે,
પડ્યા એમાં અમે કાચા, તને હું કેમ સમજાવું !

અતિથિ દેવ માનીને કર્યું સ્વાગત મુસીબતનું,
મળ્યા એમાંય દુર્વાસા, તને હું કેમ સમજાવું !

સીવેલા હોઠની પીડા હૃદયનું રૂપ ધારે છે,
ફુટે છે આંખને વાચા, તને હું કેમ સમજાવું !

મેં ઈશ્વરને કહ્યું થોડા દિવસ માણસ બનીને જો,
જશે ઉતરી બધાં ફાંકા, તને હું કેમ સમજાવું !

ગયા છે છેતરી ‘ચાતક’ હલેસાં, હાથ ને હોડી,
કિનારાઓ હતા સાચા, તને હું કેમ સમજાવું !

– © દક્ષેશ કોન્ટ્રાકટર ‘ચાતક’

2 Comments

chat છે


[Painting by Donald Zolan]
*
શ્વાસ પર લાગેલ સઘળી bet છે
જિંદગી સપનાંની સાથે date છે

સુખ લગભગ માઉસ જેવું હોય છે,
દુઃખ એ પાછળ પડેલી cat છે.

છે સફળતા આભમાં ઊડતા વિહગ,
હસ્તરેખા પાથરેલી net છે.

લાગણીની આપ-લેના મામલે,
અશ્રુ એ લાગુ પડેલો VAT છે.

શ્વાસ ધીમા થાય એનો અર્થ એ,
મોતની ગાડી સમયથી late છે.

એકતરફી ચાલતી, આખું જીવન,
પ્રાર્થના ઈશ્વરની સાથે chat છે.

ભાગ્યમાં ‘ચાતક’ પ્રતીક્ષા છે તો છે,
લાઈફનું પૂછો તો બંદા set છે.

– © દક્ષેશ કોન્ટ્રાકટર ‘ચાતક’

Leave a Comment