Category: ગઝલ

*
ખુશી, આંસુ અને પીડા સમજતાં વાર લાગે છે,
પ્રભુ, તારી અકળ લીલા સમજતાં વાર લાગે છે.

સતીત્વને પૂજું કે શીલની અગ્નિપરીક્ષા લઉં?
પુરુષને હર યુગે સીતા સમજતાં વાર લાગે છે.

સ્વયં તું કોઈના માથા ઉપર આવ્યો ન’તો કરવા,
કપાળે એટલે ટીલા સમજતાં વાર લાગે છે.

કોઈને સ્પર્શ કરવાના પ્રમાણિત ધોરણો તો સ્થાપ,
મને પત્થર અને શીલા સમજતાં વાર લાગે છે.

ઉઠાવું શસ્ત્ર કે શરણું લઉં – નક્કી નથી થાતું,
ઘણી વાંચી ભલે, ગીતા સમજતાં વાર લાગે છે.

અને આ ત્યાગ કે વૈરાગ છે? – એની રહે મૂંઝવણ,
હજુ ભગવા અને પીળા સમજતાં વાર લાગે છે.

ઈસુની જેમ ‘ચાતક’ને ઢસડતાં ક્રોસ પર શ્વાસો,
સમય મારી રહ્યો ખીલા, સમજતાં વાર લાગે છે.

– © દક્ષેશ કોન્ટ્રાકટર ‘ચાતક’
*
[Above: A Painting by Donald Zolan]

Leave a Comment

*
મૂળને મેટીંગ(mating)માં ફાવ્યું નહીં,
ડાળને લેટીંગ(letting)માં ફાવ્યું નહીં.

પ્રેમ ભમરાને થયો પહેલી નજર,
ફૂલને ડેટીંગ(dating)માં ફાવ્યું નહીં.

આંસુઓ જલદી રવાના થઈ ગયા,
ગાલને વેઈટીંગ(waiting)માં ફાવ્યું નહીં.

પ્રાર્થના પ્રભુને કરી મેં પણ ઘણી,
એમને ચેટીંગ(chatting)માં ફાવ્યું નહીં.

પીઠ પસવારી તો તક ઊભી રહી,
પણ પછી પેટીંગ(petting)માં ફાવ્યું નહીં.

શિષ્ટતાના ઢાળ પર શબ્દો ઊભા,
હાશ … કે સ્કેટીંગ(skating)માં ફાવ્યું નહીં.

જિંદગી ટીઆરપી* જેવી મળી,
ને મને રેટીંગ(rating)માં ફાવ્યું નહીં.

મોતને ‘ચાતક’ હરાવી દેત પણ
શ્વાસને સેટીંગ(setting)માં ફાવ્યું નહીં.

– © દક્ષેશ કોન્ટ્રાકટર ‘ચાતક’
*
*TRP – TV or Target Rating Point, a method to check the effectiveness of an ad (on Television)
Mating – Act of coming together for reproductive purpose
Letting (go) – giving up control or releasing emotions
Dating – meet someone with an intent of building intimate relationship
Petting – stroke or pat affectionately, caressing and touching
Skating – act of gliding on a surface (with skates)
Setting – configuration or arrangement to operate in a certain way
*
[Above: A painting by Donald Zolan]

Leave a Comment

*
દિવાલે કાન ધરવામાં સમજદારી નહીં લાગે,
તિરાડો હોય એથી ભીંત કૈં બારી નહીં લાગે.

ફૂલોના આઠ-દસ કૂંડા મૂકો ગેલેરીમાં સાથે,
બહુ ધારીને જોશો તોય એ ક્યારી નહીં લાગે.

કહ્યું છે સંગ એવો રંગ – એ સાચું હશે કિન્તુ,
મળે દરિયાને એથી કૈં નદી ખારી નહીં લાગે.

કદી દીકરા-વહુને ઘર જઈને બે દિવસ રહેજો,
તમારી દીકરી તમને પછી ભારી નહીં લાગે.

તબીબો શસ્ત્રક્રિયાઓ કરીને છોને નિપજાવે,
કરુણા, પ્રેમ, લજ્જા, શીલ વિણ નારી નહીં લાગે.

‘મરીઝ’ તો કહી ગયા* – એના જતી વેળાના જોવા પર,
તમે પાછળ વળી જોજો, નજર સારી નહીં લાગે.

જીવન ઝાકળ સમું છે, શર્ત ગમતાં ફૂલ પર જીવો,
પછી અત્તર થવામાં કોઈ લાચારી નહીં લાગે.

રસીલી પાણીપુરી જેવાં ‘ચાતક’ હોય છે સપનાં,
નયન ઓર્ડર કરે ક્યાં? એમની લારી નહીં લાગે.

– © દક્ષેશ કોન્ટ્રાકટર ‘ચાતક’
*
કવિ મરીઝનું પુણ્ય સ્મરણ
બધો આધાર છે એના જતી વેળાના જોવા પર,
મિલનમાંથી નથી મળતા મુહોબ્બતના પુરાવાઓ.

Leave a Comment

અલવિદા 2025… સુસ્વાગતમ્ 2026
સૌ વાચકમિત્રોને ઈસુનું નવું વરસ સર્વ પ્રકારે સુખમય નીવડે એવી શુભેચ્છાઓ.
*
હલેસા પર ભરોસો રાખ કાં તો નાવ રહેવા દે,
જો દરિયો પાર કરવો હો તો જળની રાવ રહેવા દે.

વિકટ સંજોગ સામે બાથ ભીડવા સજ્જ થા, નહીંતર
સુનામીના પ્રદેશોમાં જવાનો ચાવ રહેવા દે.

તું જો, કે મિત્ર તારો ખુદ ફસાયો છે મુસીબતમાં,
બતાવા એને લાવ્યો છે તું તારા ઘાવ, રહેવા દે.

તને જો એમ લાગે કે મૂકીશ તો થઈ જશે મેલા
હસીન જો એટલા હો તો હવામાં પાંવ રહેવા દે.

તું ચુકવી દામ શ્રદ્ધાના ખરીદી લેને ઘરબેઠાં,
ફરીને રોજ મંદિરમાં પૂછે છે ભાવ, રહેવા દે.

સ્વભાવે વૃક્ષની ઉદારતા ખોટી નથી, કિન્તુ
જરૂર હો ધૂપની ત્યારે અકારણ છાંવ રહેવા દે.

તને પરદેશમાં સ્થાયી થયે વરસો થયા ઓ, દોસ્ત,
હવે જ્યાં ત્યાં આ મેરા દેશ, મેરા ગાંવ, રહેવા દે.

તું સાચ્ચે એમ માને છે, લખાવે છે કોઈ ગઝલો?
તો મક્તામાં તું ‘ચાતક’ નામ તારું, સાવ રહેવા દે.

– © દક્ષેશ કોન્ટ્રાકટર ‘ચાતક’
*
[Above – A Painting by Donald Zolan]

1 Comment

*
અમદાવાદ વિમાન દુર્ઘટનામાં માર્યા ગયેલાઓને અર્પણ
*
કેટલા અરમાન સાથે લઈ અમે નીકળ્યા હતા,
હોઠ પર મુસ્કાન સાથે લઈ અમે નીકળ્યા હતા.

કામધંધા કાજ રહેતા’તા ભલે પરદેશમાં,
દેશનું અભિમાન સાથે લઈ અમે નીકળ્યા હતા.

મિત્ર-સ્નેહીઓ-સંબંધી, ગામ-શેરી-ઘર-ગલી
સૌનું હૈયે ધ્યાન સાથે લઈ અમે નીકળ્યા હતા.

*જિંદગી તો બેવફા હૈ .. જાણતા’તા, ને છતાં,
જિંદગીનું ગાન સાથે લઈ અમે નીકળ્યા હતા.

પ્લેનમાં બેઠા અમે ત્યારે ખબર થોડી હતી,
મોતનું ફરમાન સાથે લઈ અમે નીકળ્યા હતા !

મ્હેંકશે વરસો સુધી સાથે વીતાવેલી ક્ષણો,
ફક્ત એ વરદાન સાથે લઈ અમે નીકળ્યા હતા.

– દક્ષેશ કોન્ટ્રાકટર ‘ચાતક’
*
ज़िन्दगी तो बेवफा है एक दिन ठुकराएगी
मौत मेहबूबा है अपने साथ लेकर जाएगी
ફિલ્મ ‘મુકદ્દર કા સિકંદર’ના સુપ્રસિદ્ધ ગીતની પંક્તિઓ
*
કવિ અનિલ ચાવડાની કલમે ગુજરાત સમાચારની ‘અંતરનેટની કવિતા’ કોલમ અંતર્ગત આ ગઝલ પ્રસિદ્ધ થઈ હતી. લેખ વાંચવા માટેની લીંક

1 Comment