*
ખુશી, આંસુ અને પીડા સમજતાં વાર લાગે છે,
પ્રભુ, તારી અકળ લીલા સમજતાં વાર લાગે છે.
સતીત્વને પૂજું કે શીલની અગ્નિપરીક્ષા લઉં?
પુરુષને હર યુગે સીતા સમજતાં વાર લાગે છે.
સ્વયં તું કોઈના માથા ઉપર આવ્યો ન’તો કરવા,
કપાળે એટલે ટીલા સમજતાં વાર લાગે છે.
કોઈને સ્પર્શ કરવાના પ્રમાણિત ધોરણો તો સ્થાપ,
મને પત્થર અને શીલા સમજતાં વાર લાગે છે.
ઉઠાવું શસ્ત્ર કે શરણું લઉં – નક્કી નથી થાતું,
ઘણી વાંચી ભલે, ગીતા સમજતાં વાર લાગે છે.
અને આ ત્યાગ કે વૈરાગ છે? – એની રહે મૂંઝવણ,
હજુ ભગવા અને પીળા સમજતાં વાર લાગે છે.
ઈસુની જેમ ‘ચાતક’ ક્રોસ પર ઢસડી રહ્યા શ્વાસો,
સમય મારી રહ્યો ખીલા, સમજતાં વાર લાગે છે.
– © દક્ષેશ કોન્ટ્રાકટર ‘ચાતક’
*
[Above: A Painting by Donald Zolan]