Press "Enter" to skip to content

મળી આવે કવિતાઓ

પરીની વારતાઓમાં સરી આવે કવિતાઓ,
કદી આંગણમહીં બાળક બની આવે કવિતાઓ.

અવાચક થઈ તમે ઊભા રહો કોઈ ખડકની જેમ
ને ખળખળ ઝરણ થૈને વહી આવે કવિતાઓ.

જીવનભર જેમને સંવેદનાઓ સ્હેજ ના સ્પર્શી,
હવે એની કબર પર જઈ રડી આવે કવિતાઓ.

મળે છે લોહીથી લથપથ બધા અખબારનાં પાનાં,
હવે અખબારના પાને નહીં આવે કવિતાઓ.

જરૂરી તો નથી કે હર પ્રણયનો અંત સુખમય હો,
અધૂરી વેદનારૂપે મળી આવે કવિતાઓ.

વરસ તું પ્રેમમાં એવું, કિનારા ઓગળી જાયે,
અને સામા પ્રવાહે કૈં તરી આવે કવિતાઓ.

હૃદય-સંવેદનાની એક મુઠ્ઠી ચણ પડે ‘ચાતક’,
ગગનમાંથી ફટાફટ ઊડતી આવે કવિતાઓ.

– દક્ષેશ કોન્ટ્રાકટર ‘ચાતક’

14 Comments

  1. Dilip
    Dilip May 10, 2011

    પરીની વારતાઓમાં સરી આવે કવિતાઓ,
    કદી આંગણમહીં બાળક બની આવે કવિતાઓ.
    વાહ દક્ષેશભાઈ..આખી ગઝલ જ રસાળ સરળ અને મજાની..બાળકશી સ્વચ્છ નિર્દોષ.. મનભાવન .. પાવન.. મને તો સાહિત્યમાં ભાન નથી…માટે જે લાગે તે કહું …

  2. Pancham Shukla
    Pancham Shukla May 11, 2011

    સરસ ગઝલ. કવિતાના ઉદભવ અને ઉંડાણને તાગતી કૃતિ.
    હૃદય-સંવેદનાની એક મુઠ્ઠી ચણ પડે ‘ચાતક’,
    ગગનમાંથી ફટાફટ ઊડતી આવે કવિતાઓ.
    વાહ .
    “ને ખળખળ ઝરણ થૈને વહી આવે કવિતાઓ.”
    લગાગાગાની ટેકરીઓ ઠેકતો, ગાતો આ મિસરો ઝરણાની જેમ જ કુદરતી રીતે ખળખળ વહે છે.

  3. P Shah
    P Shah May 11, 2011

    વાહ !
    એક પછી એક ચઢિયાતી રચનાઓ આપો છો.
    કદી આંગણમહીં બાળક બની આવે કવિતાઓ……ઝરણ જેમ ખળખળ વહેતી આ
    કવિતા ખૂબ ગમી.
    પંચમભાઈએ દર્શાવેલ લગાગાગાની ટેકરીઓ ઠેકવાનો આનંદ આવ્યો.
    અભિનંદન, દક્ષેશભાઈ !
    દિલસે !

  4. અશોક જાની 'આનંદ'
    અશોક જાની 'આનંદ' May 11, 2011

    ખુબ જ સુંદર વિભાવનાઓ, કવિતાની કેટકેટલી શક્યતાઓ નિરુપાઇ છે…!!!
    મજા આવી ગઇ…
    મિત્ર ભાવે એક સુચન કરવાનુ મન થાય છે બીજો શે’ર આ રીતે કરો તો ?!!
    “અવાચક થઈ તમે ઊભા રહો કોઈ ખડક જેવા
    ને ખળખળતું ઝરણ થૈને વહી આવે કવિતાઓ…” ભાવ જળવાઇ જશે અને જે ખટ્કો અનુભવાય છે તે નીકળી જશે.

  5. Manvant Patel
    Manvant Patel May 11, 2011

    અધૂરી વેદનામાઁથી સરી આવે કવિતાઓ !
    વાહ કવિ ! વાહ ! દક્ષેશભાઇ વાહ રે વાહ !

  6. Pragnaju
    Pragnaju May 11, 2011

    સ રસ રચના
    મળે છે લોહીથી લથપથ બધા અખબારનાં પાનાં,
    હવે અખબારના પાને નહીં આવે કવિતાઓ.

    જરૂરી તો નથી કે હર પ્રણયનો અંત સુખમય હો,
    અધૂરી વેદનારૂપે મળી આવે કવિતાઓ.
    વાહ્

  7. Himanshu Patel
    Himanshu Patel May 11, 2011

    પેલા ચિત્રમાં છે તેમ નાના બાળકની જિજ્ઞાસા નચિકેતા સમ કાવ્ય પ્રાપ્તિ માટે ફરી વળી છે.
    આવી રીતે પણ મને વધારે ગમ્યું-
    કદી આંગણમહીં બાળક બની આવે કવિતાઓ
    ને ખળખળ ઝરણ થૈને વહી આવે કવિતાઓ.
    બન્નેમાં કવિતા આજન્મ ક્રીડા છે.

  8. Dr. Jayraj Desai
    Dr. Jayraj Desai May 11, 2011

    વાહ દક્ષેશભાઈ એક મુસલસલ અને ઉત્તમ ગઝલ. એકે એક શેર ચઢિયાતો. શ્રી પંચમભાઈ શુક્લાનો પ્રતિભાવ અને શ્રી અશોકભાઈ જાની “આનંદ”નું સૂચન પણ એકદમ યોગ્ય છે.

  9. Devika Dhruva
    Devika Dhruva May 12, 2011

    લગાગાગાના ચાર આવર્તનવાળી નખશીખ સુંદર (હજઝ ૨૮) ગઝલ..જાણે ઝરમરતા મનભાવન ફોરા..

  10. Manhar Mody
    Manhar Mody May 12, 2011

    કોઈ એક કે બે શેર ટાંકવા હોય તો બહુ જ મુશ્કેલ કારણ કે બધા જ શેર એક એક થી ચડિયાતા. ખુબ જ મઝા આવી. સુંદર ગઝલ.

  11. Kirtikant Purohit
    Kirtikant Purohit May 12, 2011

    મળે છે લોહીથી લથપથ બધા અખબારનાં પાનાં,
    હવે અખબારના પાને નહીં આવે કવિતાઓ.
    વાહ..સરસ. કવિતાઓ પર કવિતા. બાળકનું ચિત્ર પણ સુંદર. રદીફ અને કાફિયા…. સરે કવિતાઓ ..બને કવિતાઓ… કરીએ તો વધુ લયબધ્ધ લાગે ખરું? એક તુક્કો….

  12. Sosajitu.velva
    Sosajitu.velva May 13, 2011

    વાહ….
    પ્રિય સ્નેહી,
    ત્રીજો અંતરો ખુબ ગમ્યો…
    માનવજીવનની તમામ હકીકત રજૂ કરી દીધી. મારા પરમ મિત્ર પ્રો. કટારિયાની યાદ અપાવી ગયો.

  13. Ramesh Patel
    Ramesh Patel May 15, 2011

    હૃદય-સંવેદનાની એક મુઠ્ઠી ચણ પડે ‘ચાતક’,
    ગગનમાંથી ફટાફટ ઊડતી આવે કવિતાઓ.
    – દક્ષેશ કોન્ટ્રાકટર ‘ચાતક’

    કવિતાની રમણીયતા સાચે જ ગઝલમાં સૌરભ બની વહી છે. વિચારોના તરંગો સુંદર રીતે ઝૂમ્યા છે.
    – રમેશ પટેલ (આકાશદીપ)

Your email address will not be published. Required fields are marked *

This site uses Akismet to reduce spam. Learn how your comment data is processed.