જ્ઞાનની કોઈ કિતાબોમાં હવે મળતા નથી,
શબ્દ ઘરની બ્હાર શું સાચે જ નીકળતા નથી?
પ્રેમનો સાચો અરથ સમજાવવા દુનિયામહીં,
કેમ થોડુંયે ભણેલા સાક્ષરો મળતા નથી?
‘હું’ અને ‘તું’ ત્યાગ કરતાં સહજીવન ઉત્સવ થતું,
દૂધમાં શાને છતાં સાકર સમા ભળતા નથી?
આંખના મોઘમ ઈશારે જે સમજતાં હાલ-એ-દિલ,
રૂબરૂમાં એ જ દિલની વાત સાંભળતા નથી !
વ્યર્થ ‘ચાતક’ લાગણીના ગામમાં સૂરજ થવું,
બર્ફના પ્હાડો હવે ઉષ્માથકી ગળતા નથી.
- દક્ષેશ કોન્ટ્રાકટર ‘ચાતક’
લાગણીનો રંગ ઘેરો હોય છે,
આંખમાં એનો જ ચ્હેરો હોય છે.
શ્વાસ, ધડકન કે વિચારોના વમળ
હર તરફ એનો જ પહેરો હોય છે.
એ મળે તો એમ લાગે રણમહીં,
ચોતરફ સાગરની લ્હેરો હોય છે.
સાવ સીધી વાતમાં ઢાળે નજર,
પાંપણોમાં ભેદ ગહેરો હોય છે.
એમને કુરબાન મારી સૌ દુઆ,
પણ ખુદા, તું કેમ બ્હેરો હોય છે.
એ નદી થઇને નહીં આવી શકે,
એટલે ચિક્કાર નહેરો હોય છે ?
ઝાંઝવાનો દેશ ‘ચાતક’ને ફળે,
શક્યતા નામેય શહેરો હોય છે.
- દક્ષેશ કોન્ટ્રાકટર ‘ચાતક’
કાળને ક્યારેક હંફાવી શકે,
આદમી શું મોતને મારી શકે ?
ને કિનારે રાહ જોતા સેંકડો,
એકને મઝધારથી તારી શકે ?
આગિયાના તેજથી ઝળહળ બની,
કોઈ સૂરજને કદી ડારી શકે ?
શ્વાસ ને સંવેદનાના જે ધની,
જિંદગીને કોઈ દિ’ હારી શકે ?
એક શીશી પારકા ગ્લિસરીનથી
કોઈ આંસુ ક્યાં સુધી સારી શકે ?
તું પ્રતીક્ષાની કરે ફરિયાદ, પણ
નામ ‘ચાતક’ એ વિના ધારી શકે ?
- દક્ષેશ કોન્ટ્રાકટર ‘ચાતક’
Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.
(તરન્નૂમ – રાજૂ યાત્રી)
મીતિક્ષા.કોમ ના સર્વ વાચકમિત્રોને શુભ દિપાવલી તથા નૂતનવર્ષની અનેકાનેક શુભેચ્છાઓ …
શૂન્યતા તારી ચિતરવા શબ્દથી કોશિશ કર,
વેદના ક્ષણમાં વિસરવા સ્મિતથી કોશિશ કર.
જિંદગીના મર્મને જો જાણવો હો પળમહીં,
તો જરા રોકીને તારા શ્વાસથી કોશિશ કર.
તું કોઈની લાગણીથી ના પલળ તો ચાલશે,
કમ-સે-કમ અહેસાસ કરવા સ્પર્શથી કોશિશ કર.
આગ લાગે તે સમે ના ખોદ ખાડાઓ મૂરખ,
હોય જે સાધન સહજ ઉપલબ્ધથી કોશિશ કર.
અંતવેળાએ સુધરવાના ધખારા છોડ તું,
પામવા મુક્તિ બિરાદર, જન્મથી કોશિશ કર.
રાહ જોવાથી અહીં મંઝિલ મળી આવે નહીં,
તું જ થઈ અસવાર ‘ચાતક’, અશ્વથી કોશિશ કર.
- દક્ષેશ કોન્ટ્રાકટર ‘ચાતક’
સાંજ પડે સૂરજ સંધ્યાને છાનોમાનો મળવાનો,
રાત પડે દીવા ઓથે કોઈ પરવાનો મળવાનો.
હૈયાના સુખચેન જાય ને નીંદ થાય કુરબાન પછી,
જીવન માલામાલ કરે એ લ્હાવ મજાનો મળવાનો.
‘હુંય ગમું’ ને ‘તુંય ગમે’, પણ વાત વધી આગળ ના જાય,
એમ બને તો બન્ને વચ્ચે એક જમાનો મળવાનો.
સાગરના હૈયે જલનારો વડવાનલ પોકારે એમ,
હોય કિનારા છલકંતા પણ બેટ વિરાનો મળવાનો.
ધૂપસળી-શો પ્રેમ હશે તો મ્હેંક પ્રસરશે આપોઆપ,
થાવ કમળ તો ભ્રમર સમો કોઈ દિવાનો મળવાનો.
અવરોધોને પાર કરી જે પ્હોંચી ગ્યા મંઝિલની પાર,
‘ચાતક’ એ નરબંકાઓને પ્રેમ-ખજાનો મળવાનો.
- દક્ષેશ કોન્ટ્રાકટર ‘ચાતક’
