ઈશ્વર

*
તારા લીધે બધાંને લોચો પડે છે ઈશ્વર,
તારો જ ક્લાસ ને તું મોડો પડે છે, ઈશ્વર?

દુનિયાના હાલ જોઈ, આવે વિચાર મનમાં?
તું તારી હેસિયતથી મોટો પડે છે ઈશ્વર !

એવું નથી કે કાયમ અટકે છે કામ મારાં,
શ્રદ્ધાની સામે મારી ટૂંકો પડે છે ઈશ્વર.

કાચા કે પાકા જોયા વિના જ વેડી નાખે,
લાગે છે આવડતમાં કાચો પડે છે ઈશ્વર.

વાદળને જોઈને એ આવ્યો વિચાર મનમાં,
તારી ય આંખથી શું છાંટો પડે છે ઈશ્વર?

જેવી રીતે ફળે છે વહેલી સવારના કૈં,
સપનાંની જેમ તું પણ સાચો પડે છે ઈશ્વર?

સેલ્ફીનો છે જમાનો, એકાદ ફોન લઈ લે,
પાડીને જો કે તારો ફોટો પડે છે ઈશ્વર?

આજે હું મારી ‘મા’ના જોઈ રહ્યો તો ફોટા,
તું પણ સમયની સાથે ઝાંખો પડે છે ઈશ્વર?

એકસો ને આઠ મણકા, એકસો ને આઠ નંબર,
તું પણ ઝડપની બાબત ખોટો પડે છે ઈશ્વર?

દોડીને આવ જલદી ‘ચાતક’ની પ્રાર્થનાથી,
તારાય માર્ગમાં શું કાંટો પડે છે ઈશ્વર?

– © દક્ષેશ કોન્ટ્રાકટર ‘ચાતક’