શ્યામ ! હવે રૂબરૂમાં આવવાનું રાખો
સદીઓથી ભગવાન શ્રીકૃષ્ણ આપણને ક્યારેક જગદગુરુ બનીને, ક્યારેક કંસ જેવા પાપીઓનો સંહાર કરીને, ક્યારેક રાધાના શ્યામ બનીને કે ક્યારેક સુદામાના મિત્ર બનીને પ્રેરણા ધરતા આવ્યા છે. સમય બદલાયો છે તેથી ભગવાન કૃષ્ણને યાદ કરવાના, પોકારવાના કે તેમની સાથે વાતચીત કરવાના માધ્યમમાં પરિવર્તન આવ્યું હશે પણ વાતોનો ભાવાર્થ અને પ્રાર્થનાની અનુભૂતિમાં કોઈ પરિવર્તન નથી આવ્યું. SMSના યુગને પ્રતિબિંબિત કરતું એક મધુરું કૃષ્ણગીત આજે માણીએ.
SMS કરવાનું બંધ કરો શ્યામ ! હવે રૂબરૂમાં આવવાનું રાખો.
વૃંદાવન મથુરા તો રોમરોમ જાગ્યાં છે, મોરલી મોબાઇલ જેવી રાખો.
સાઇબરકાફેમાં હવે સર્ફિંગ કરે છે પેલી ગોપીઓની યુગજૂની આંખો,
ઇચ્છાના ગોધણને વાળો, હો શ્યામ ! હવે ગોવર્ધન માંગે છે પાંખો,
ટચલી આંગળીએ હવે સાચવજો માઉસ, અને માખણને ફેટ ફ્રી રાખો … SMS કરવાનું
વેબકેમ આંખોમાં આંજીને ગોપીઓએ સંતાડી દીધા ઉજાગરા,
કપડાં તો સૂકવ્યાં છે સદીઓથી ડાળ ઉપર, વહેવડાવો વાયરા કહ્યાગરા,
રાધાના આંસુને અટકાવો શ્યામ ! હવે મેકઅપને મોભામાં રાખો … SMS કરવાનું
ઇ-મેઇલ વાંચીને હવે અર્જુનને સમજાવો કે મનમાંથી કાટમાળ કાઢે,
ગાંડીવ ને શંખધ્વનિ સાચવે ભલે પણ પર્સમાંથી પામટોપ કાઢે,
કૌરવના કમ્પ્યુટર વાયરસ લખે છે, તેની ભોળી કોઇ ભાળ હવે રાખો … SMS કરવાનું
SMS કરવાનું બંધ કરો શ્યામ ! હવે રૂબરૂમાં આવવાનું રાખો.
વૃંદાવન મથુરા તો રોમરોમ જાગ્યાં છે, મોરલી મોબાઇલ જેવી રાખો.
- ભાગ્યેશ ઝા
January 20th, 2009 at 4:01 am
આપે આ ગીતમાં મૂકેલું ચિત્ર મારા ઘરમાં છે.
આભાર બહેના ! ગીત સરસ છે.
January 21st, 2009 at 12:46 pm
today’s song reminded me of Krushna Dave’s “vaasaladi.com”. We now really need Hi-Tech Bhagwan.
February 8th, 2011 at 7:39 am
ખૂબ સરસ.
February 15th, 2011 at 6:28 am
ખૂબ સરસ