ઝાંખ ના લાગે કદી
(Painting: Amita Bhakta)
ઝંખનાને ઝાંખ ના લાગે કદી,
દોસ્તીને કાટ ના લાગે કદી.
પાંપણો પહેરો ભરે આઠે પ્રહર,
આંસુઓને ધાક ના લાગે કદી.
લાગણી અવસાન પામે રોજ અહીં,
એ બળે, પણ રાખ ના લાગે કદી.
લોક તો વાતો કરે, ચાલી ગયા,
એ ગયા છે ક્યાંક, ના લાગે કદી.
એક દિ એનું મિલન નક્કી થશે,
પણ સમયને પાંખ ના લાગે કદી.
આંખમાં ‘ચાતક’ પ્રતીક્ષા હોય તો,
સ્વપ્નમાં પણ આંખ ના લાગે કદી.
- દક્ષેશ કોન્ટ્રાકટર ‘ચાતક’
August 5th, 2011 at 10:27 am
ખૂબ સરસ..
August 6th, 2011 at 10:12 am
લાગણી અવસાન પામે રોજ અહીં,
એ બળે, પણ રાખ ના લાગે કદી.
આ વધુ ગમેલા શેર સાથે એટલું જ કહેવાનુ કે આ ફરી ફરી વાંચવા જેવી બેમત ગઝલ છે.
August 6th, 2011 at 1:47 pm
સરસ ગઝલ.
આંખમાં ‘ચાતક’ પ્રતીક્ષા હોય તો,
સ્વપ્નમાં પણ આંખ ના લાગે કદી.
August 6th, 2011 at 3:29 pm
પ્રિય દક્ષેશ કોન્ટ્રાકટર ‘ચાતક’
આપની દરેક ગઝલની રચના ખૂબ જ સૂંદર હોય છે એટલે કોને પ્રાધાન્ય આપવું એ કહેવું જરા મુશ્કેલ છે. બાકી તો …એજ શુભેચ્છા કે….
આપની ગઝલને ઝાંખ ના લાગે કદી,
કલમને કાટ ના લાગે કદી.
August 6th, 2011 at 4:34 pm
રોજની જેમ જ આજની ગઝલ પણ ગમી. બધા શેર સરસ થયા છે.
પાંપણો પહેરો ભરે આઠે પ્રહર,
આંસુઓને ધાક ના લાગે કદી.
આ શેરમાં ‘ધાક’ ની જગ્યા એ ‘થાક’ હોવું જોઇયે એવું લાગે છે.
August 6th, 2011 at 7:51 pm
મતલાનો અને મક્તાનો બન્ને શેર સરસ…….ફાઇન ગઝલ
August 6th, 2011 at 8:18 pm
પાંપણો પહેરો ભરે આઠે પ્રહર,
આંસુઓને ધાક ના લાગે કદી.
લાગણી અવસાન પામે રોજ અહીં,
એ બળે, પણ રાખ ના લાગે કદી.
વાહ ભાઇ વાહ્…. સુન્દર ક્લ્પનોની તાજગીભરી રજુઆત. સરસ ગઝલ.
August 6th, 2011 at 8:34 pm
સરસ ગઝલ..
August 6th, 2011 at 8:59 pm
મનહરભાઈ,
આંસુઓને ધાક ના લાગે કદી – એમાં એવો ભાવાર્થ અભિપ્રેત છે કે પાંપણોનો પહેરો હોવા છતાં આંસુઓ બેધડક આંખની બહાર આવી જ જાય છે. પહેરો અને ધાક એકબીજાને સંદર્ભ આપે છે. થાક એ દૃષ્ટિએ અનુચિત લાગે છે. આપના સૂચન બદલ આભાર.
August 6th, 2011 at 9:48 pm
આંખમાં ‘ચાતક’ પ્રતીક્ષા હોય તો…
સુંદર ગઝલ !
August 8th, 2011 at 12:54 pm
વાહ દક્ષેશભાઇ….
સરસ ગઝલ બની છે, મક્તામાં ‘ચાતક’ અને પ્રતીક્ષાનો અર્થસૂચક મેળ ગમ્યો…!
અભિનંદન મિત્ર!
August 12th, 2011 at 11:51 am
લાગણી અવસાન પામે રોજ અહીં,
એ બળે, પણ રાખ ના લાગે કદી.
વાહ…!! સુંદર ગઝલ…
August 13th, 2011 at 10:27 pm
જોરદાર મક્તા સાથેની સુંદર ગઝલ!
સુધીર પટેલ.
August 14th, 2011 at 5:19 pm
ઝંખનાને ઝાંખ ના લાગે કદી,
દોસ્તીને કાટ ના લાગે કદી.
પાંપણો પહેરો ભરે આઠે પ્રહર,
આંસુઓને ધાક ના લાગે કદી.
ગજબ ની રજુઆત, ખૂબ જ ગમી.