કેમ સારો હું નથી ?
પાથરું છું ફૂલ, કાંટા વેરનારો હું નથી,
શાંત જળમાં પથ્થરોને ફેંકનારો હું નથી.
ફાયદો જોયા જ કરવાની છે આદત એમની,
ભાવતાલોથી સંબંધો જોડનારો હું નથી.
મૌન પણ ક્યારેક તો પડઘાય છે મ્હેફિલ મહીં,
શબ્દના ઘોંઘાટ થઇને નાચનારો હું નથી.
માંગવા છે જો ખુલાસા, રૂબરૂ આવી મળો,
કાગળો કે કાસીદોને માનનારો હું નથી.
બસ હવે આ ‘હું’પણાની જેલમાંથી નીકળી,
એમ જીવી જાઉં જાણે, હું જ મારો ‘હું’ નથી.
એમ તો મેં પણ દીધું છે રક્ત વારંવાર ‘ગુલ’
તે છતાં એની નજરમાં કેમ સારો હું નથી ?
- અહમદ ‘ ગુલ’
February 4th, 2009 at 12:19 pm
સરસ વાત કરી છે..
ફાયદો જોયા જ કરવાની છે આદત એમની,
ભાવતાલોથી સંબંધો જોડનારો હું નથી….
બસ હવે આ ‘હું’પણાની જેલમાંથી નીકળી,
એમ જીવી જાઉં જાણે, હું જ મારો ‘હું’ નથી….
August 15th, 2009 at 5:37 pm
ઝીલ્યા છે ઘાવ તમારા અમે પથ્થરોથી; દીધા છે જવાબ અમે ફુલોથી;
છતાંય જીત્યા તમે સંબન્ધોના સરવાળેથી……
November 20th, 2009 at 9:36 pm
આ કાંટાસળિયોના ફુલની છબી છે? ગુગલ કરતાં અહીં પહોંચ્યો…