Press "Enter" to skip to content

તું રોકાઈ જા


પ્રિય મિત્રો, મીતિક્ષા.કોમ આજે ચાર વરસની સાહિત્યયાત્રા પૂરી કરી પાંચમા વર્ષમાં પ્રવેશ કરે છે. આપના સાથ-સહકાર વગર આ સંભવ થઈ શક્યું ન હોત. આ પ્રસંગે પ્રતિભાવ આપી પ્રોત્સાહિત કરનાર સર્વ વાચકમિત્રોનો હૃદયપૂર્વક આભાર.
*
આંખમાં સપનાં ઘણાં છે, રાત તું રોકાઈ જા,
લાખ કહેવાની તને છે વાત, તું રોકાઈ જા.

કેટલા પડદા રહસ્યોના હજી ખુલ્યા નથી,
છે સમયની માંગ, ઝંઝાવાત, તું રોકાઈ જા.

આભથી વરસી રહી છે ચાંદની બેફામ થઈ,
ખૂબ લેવા પ્રેમની સૌગાત, તું રોકાઈ જા.

હાથમાં હૈયું નથી, ઓ મન, વિચારી લે જરા,
આપ ના કોઈયે પ્રત્યાઘાત, તું રોકાઈ જા.

બે પ્રણયઘેલા હૃદયના સંમિલનની રાત છે,
આજ મારું માન, ઓ પરભાત, તું રોકાઈ જા.

કેટલી ‘ચાતક’ ક્ષણોને આંખમાં આજ્યા પછી,
આજ ફુટી છે તરસ, ઓ જાત, તું રોકાઈ જા.

– © દક્ષેશ કોન્ટ્રાકટર ‘ચાતક’

26 Comments

  1. Anil Chavda
    Anil Chavda July 1, 2012

    હાથમાં હૈયું નથી, ઓ મન, વિચારી લે જરા,
    આપ ના કોઈયે પ્રત્યાઘાત, તું રોકાઈ જા.

    વાહ દક્ષેશભાઈ… આપની ગઝલ સફરમાં મહાલવાનો આનંદ અનેરો છે.

  2. Rekha Shukla (Chicago)
    Rekha Shukla (Chicago) July 1, 2012

    અભિનંદન ને કહુ છું રોકાઈ જા…પણ દક્ષેશભાઈ ને કહુ છું ખુબ લખો..”ચાતક ” તમે ને પ્રતીક્ષા તમારા વાચક મિત્રો એ કરવાની…!!

  3. Daxesh Contractor
    Daxesh Contractor July 1, 2012

    આજે મીતિક્ષા.કોમની સાથે સાથે મીતિક્ષાબેનનો પણ જન્મદિન છે. એથી એમને પણ જન્મદિનની ખુબ ખુબ શુભેચ્છાઓ..

  4. Daxesh Contractor
    Daxesh Contractor July 1, 2012

    અનીલભાઈ, આપના જેવા કવિમિત્રોના પ્રોત્સાહક પ્રતિભાવો કલમને લખવાનું અવિરત બળ આપે છે…
    રેખાબેન, તમારી શુભેચ્છાઓ સર-આંખો પર ..

  5. P Shah
    P Shah July 1, 2012

    પહેલા તો તમારી પાંચ પાંચ વરસની સફળ સાહિત્ય યાત્રા માટે
    ખૂબ ખૂબ અભિનંદન !
    આપ ના કોઈયે પ્રત્યાઘાત, તું રોકાઈ જા….
    વાહ ! આજના શુભ દિને સુંદર રચના આપી.
    આમ પ્રતિદિન આવી જ સુંદર રચનાઓ આપતા રહો એ જ શુભેચ્છા !
    ફરી ક્યારે વડોદરા આવો છો ?

  6. અશોક જાની 'આનંદ'
    અશોક જાની 'આનંદ' July 1, 2012

    શુભ જન્મદિનની વધાઇઓ..!! મિતીક્ષાબેનને પણ..!!!!!!
    સપરમા દિવસે ગઝલની રજુઆત પણ એટલી જ સુંદર..બધાં જ શે’ર માણવાલાયક થયાં છે..!! આ ખાસ…
    કેટલા પડદા રહસ્યોના હજી ખુલ્યા નથી,
    છે સમયની માંગ, ઝંઝાવાત, તું રોકાઈ જા.

  7. Pragnaju
    Pragnaju July 1, 2012

    હાથમાં હૈયું નથી, ઓ મન, વિચારી લે જરા,
    આપ ના કોઈયે પ્રત્યાઘાત, તું રોકાઈ જા.

    બે પ્રણયઘેલા હૃદયના સંમિલનની રાત છે,
    આજ મારું માન, ઓ પરભાત, તું રોકાઈ જા.
    વાહ્
    મીતિક્ષા.કોમ આજે ચાર વરસની સાહિત્યયાત્રા પૂરી કરી પાંચમા વર્ષમાં પ્રવેશ કરે છે ત્યારે આપને અભિનંદન અને શુભેચ્છાઓ
    લોચન ચાતક જિન્હ કરી રાખે, રહહિ દરસ જલ-ધર અભિલાખે
    રામાયણમા અવારનવાર આવતી પંક્તીઓ જેવો ભાવ ચાલુ રહે તેવી પ્રભુ પ્રાર્થના અમારો બ્લોગ niravrave નિરવ રવે-સહજ ભાવોના દ્યોતક પણ આ ૨૮મી એ ચાર વર્ષ પૂરા કરી પાંચમામા પ્રવેશ કરે છે ત્યારે જ્ઞાનવૃધ્ધ ચાતકજી આશિષ આપવા જરુર પધારશો

  8. Daxesh Contractor
    Daxesh Contractor July 2, 2012

    આદરણીય પ્રજ્ઞાજુબેન,
    તમારા અનુભવસમૃદ્ધ પ્રતિભાવો અમને છેક શરૂઆતથી મળ્યા છે એ અમારું સદભાગ્ય છે. લેખક કે કવિને લેખન માટે મળતું પ્રેરણાબળ ભલે આંતરિક હોય પણ એને તમારા જેવા સાચા શુભચિંતકો અને સાહિત્યના ચાહક-ભાવકોનું પીઠબળ અને પ્રોત્સાહન ન મળે તો એ અકાળે મૂરઝાઈ જાય .. તમારા પ્રતિભાવો અમને મળતા રહે એવી કામના છે.
    બીજું, તમે મને જ્ઞાનવૃધ્ધ કહ્યો એ તમારી નમ્રતા છે. બ્લોગજગત આપને સુપેરે જાણે છે. આપના બ્લોગ – નીરવ રવે- ના ચાર વરસ પૂરા થયા તેની વધાઈ અને અઢળક શુભેચ્છાઓ.
    ===
    @ અશોકભાઈ, આપના પ્રોત્સાહક પ્રતિભાવ બદલ આભાર ..
    @ પ્રવીણભાઈ, વડોદરા આવવાનું નસીબ 2012 માં હોય એવું નથી લાગતું .. કદાચ 2013ની શરૂઆતમાં અવાય..

  9. Himanshu Patel
    Himanshu Patel July 2, 2012

    પાંચમો- જન્મદિન મુબારક અને આવા અનેકોનેક આવે (તમારી વેબ સહિત એવી જ અભ્યર્થના મિતીક્ષાબેન માટે પણ).
    કવિતા શબ્દમાંથી ફૂટ્યાં કરતાં પતંગિયાં છે. દરેક જન્મે નવો રંગ, આકાર ધારણ કર્યાં કરે છે, અને દરેક કૃતિ એ નવ્ય રંગ-સ્વરૂપનું ફરજંદ છે.
    ચાર વર્ષ આપ્યું છે તો આપતા રહેજો એ જ અસ્તુ.

    કેટલા પડદા રહસ્યોના હજી ખુલ્યા નથી,
    ખૂબ લેવા પ્રેમની સૌગાત, તું રોકાઈ જા.

    (આ ઇન્ટરએક્ટીવ પધ્ધતિ છે જ્યાં જુદી પંક્તિઓથી મનગમતો શેર રચી લેવાય છે એ જ રચનામાંથી. આશા છે ગમશે, મને તમારી ગઝલ આ રીતે પણ ગમે છે.)

  10. Chetu
    Chetu July 2, 2012

    ખુબ ખુબ અભિનંદન દક્ષેશભાઈ … આપની દરેક રચનાઓ કાબીલે તારીફ છે ..! આમ જ કલમ દ્વારા લાગણીઓ વહાવતા રહો એવી શુભેચ્છાઓ..

  11. Sapana
    Sapana July 2, 2012

    ચાર વરસનાં સોપાન સર કર્યા અને હજુ ઘણાં કરવાના બાકી છે આપની સાથે આ સાહિત્ય સફર સરસ રહી આપ આમ જ ગઝલ આપ્યાં કરો અને અમે વધાવ્યા કરીયે..મિતીક્ષાબેનને પણ જન્મદિવસ મુબારક….
    ગઝલ મસ્ત છે આ પંકતિઓ વિષેશ ગમી

    બે પ્રણયઘેલા હૃદયના સંમિલનની રાત છે,
    આજ મારું માન, ઓ પરભાત, તું રોકાઈ જા.

  12. સુંદર..મર્મસ્પર્શી ગઝલ.
    બસ… તમારી સાહિત્ય યાત્રા નિરંતર ચાલ્યા કરે તેવી શુભેચ્છાઓ દક્ષેશભાઈ.

  13. Chandralekha Rao
    Chandralekha Rao July 2, 2012

    કેટલા પડદા રહસ્યોના હજી ખુલ્યા નથી,
    ખૂબ લેવા પ્રેમની સૌગાત, તું રોકાઈ જા.
    આખી રચના સુંદર…આપની સાહિત્ય સફર અવિરત રહે….

  14. Narendra Jagtap
    Narendra Jagtap July 2, 2012

    આપને મારા અંત:કરણના ખુબ ખુબ અભિનંદન…. અને બહેનને પણ જન્મદિવસના અભિનંદન… આપની ગઝલો ખરેખર સરસ હોય છે… ભાવ હોયછે… વાંચવી ગમે છે…. 5 વર્ષ જે આપે પુર્ણ કર્યા અને સાહિત્ય ક્ષેત્રે જે ખેડાણ કરી મા ગૂર્જરીની સેવા કરી તે બદલ આપને ધન્યવાદ….. કેટલા પડદા રહસ્યોના હજી ખુલ્યા નથી,
    છે સમયની માંગ, ઝંઝાવાત, તું રોકાઈ જા…………. આવા અને આના જેવા ઘણા સુંદર શેર આપે અમને વાંચવા આપ્યા છે… તે બદલ ફરીથી ધન્યવાદ

  15. હાથમાં હૈયું નથી, ઓ મન, વિચારી લે જરા,
    આપ ના કોઈયે પ્રત્યાઘાત, તું રોકાઈ જા…… વાહ, ખૂબ સુંદર દક્ષેશભાઈ!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.