બસ, આજ વરસ તું અનરાધાર
મિત્રો, આજે મારી એક સ્વરચિત કૃતિ. આજકાલ ચોતરફ કાળઝાળ ગરમી, ગરમ લૂ, બફારો, અને ઉકળાટનું સામ્રાજ્ય છે અને જીવસૃષ્ટિની મીટ આકાશ ભણી મંડાયેલી છે. ક્યારે વર્ષાઋતુનું આગમન થાય અને આમાંથી છૂટકારો થાય. પરસેવાના રેલા ચાલતા હોય ત્યારે ધોધમાર વરસાદની કલ્પના કેટલી મનભાવન લાગે ! પણ અહીં વરસાદની કલ્પના કેવળ વર્ષાની બૂંદો પૂરતી સીમિત નથી, બલ્કે વિરહઘેલી પ્રિયતમા માટે પ્રિયતમના પ્રેમની કે પ્રેમઘેલી ગોપી માટે શ્રીકૃષ્ણના વેણુનાદની પણ છે. એ સૌને મન મૂકીને વરસવાનું આવાહન કરતી મારી આ રચના આપને ગમશે.
Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.
બસ …. આજ વરસ તું અનરાધાર.
તું ધરતીનો નાથ અને ધરતીપુત્રોનો બેલી છે,
તને વિનવવા જીવમાત્રએ લાજશરમને મેલી છે,
હોય રીસાવાના કારણ તો મનાવવા તૈયાર … બસ, આજ વરસ
કણકણ માટે તરસે ઊભી કીડીઓની કતાર અહીં,
ગોકળગાય ને મેડકની ગણનાનો કોઈ પાર નહીં,
મદમાં તારા કેમ તું એને ગણકારે ન લગાર ? … બસ, આજ વરસ
પનઘટની પ્યાસી હર રાધા કૃષ્ણ-શ્યામની ઘેલી છે,
અંતરના અંતરતમમાં માખણ-મીસરીની હેલી છે,
રેલાવી દે બંસરીધારે હર્ષનો પારાવાર … બસ, આજ વરસ
કોરી સાવ હથેળીમાં પતંગિયાની ખેતી છે,
શમણાંના વૃંદાવનમાં બે પાંપણો ભેટી છે,
રુમઝુમ પગલે ચાલી કરને અંતર-કેડી પાર … બસ, આજ વરસ
‘ચાતક’ની શૈયા પર જોને આર્તનાદ છે પાણીનો,
બેહિસાબ નિષ્ફળ શાને પોકાર એની વાણીનો ?
બેખબર તું રહે હજીયે શાને એમ ધરાર ? … બસ, આજ વરસ
- દક્ષેશ કોન્ટ્રાકટર ‘ચાતક’
May 27th, 2009 at 10:24 am
ઘણો જ આનંદ થયો જાણી કે મારો મિત્ર એક સારો કવિ પણ છે.
May 27th, 2009 at 11:30 am
સુંદર રચના…
પઠન પણ સારું થયું છે…
May 27th, 2009 at 1:18 pm
બહુ જ સરસ ગીત . બહુ જ ગમ્યું .
May 27th, 2009 at 1:58 pm
કોરી સાવ હથેળીમાં પતંગિયાની ખેતી છે,
શમણાંના વૃંદાવનમાં બે પાંપણો ભેટી છે,
રુમઝુમ પગલે ચાલી કરને અંતર-કેડી પાર … બસ
ખુબ જ સરસ …. દક્ષેશભાઈ…અભિનંદન
May 27th, 2009 at 4:55 pm
મઝાનું ગીત થયું છે..અભિનંદન.
May 27th, 2009 at 4:56 pm
સુઁદર રચના
May 27th, 2009 at 4:58 pm
કલ્પનાને નવપલ્લવિત કરતી સુંદર રચના- અભિનંદન
May 27th, 2009 at 5:39 pm
ચાતક’ની શૈયા પર જોને આર્તનાદ છે પાણીનો,
સરસ ગીત ગમ્યું
May 27th, 2009 at 6:13 pm
જય શ્રીકૃષ્ણ દક્ષેશભાઈ,
સરસ રચના.
‘ચાતક’ની પિપાસા આ કાવ્યમાં પણ છલકાય છે.
May 27th, 2009 at 6:24 pm
ગીત ગમ્યું…હવે, મિત્રતાના ભાવે બોલવું છું તમને “ચંદ્રપૂકાર ” પર …આવી વાંચો મારી પોસ્ટ “મિત્રતાના સ્નેહસબંધે “, અને જરૂર “પ્રતિભાવ ” પણ આપશો !
May 27th, 2009 at 6:43 pm
વાહ મઝા આવી….શમણાંના વૃંદાવનમાં બે પાંપણો ભેટી છે,
May 27th, 2009 at 7:50 pm
હૃદયસ્પર્શી ગીત. પઠન માણવાની મઝા પડી.
May 27th, 2009 at 9:01 pm
‘ચાતક’ની શૈયા પર જોને આર્તનાદ છે પાણીનો,
બેહિસાબ નિષ્ફળ શાને પોકાર એની વાણીનો ?
બેખબર તું રહે હજીયે શાને એમ ધરાર ? … બસ, આજ વરસ તું અનરાધાર
ખૂબ સુંદર!!! અંદાઝે બયાં ઓર… અભિનંદન.
May 27th, 2009 at 11:51 pm
સુંદર ગીતની મજા માણી.
May 28th, 2009 at 7:53 am
ખુબ સરસ રચના
May 30th, 2009 at 10:17 pm
‘ચાતક’ની શૈયા પર જોને આર્તનાદ છે પાણીનો,
બેહિસાબ નિષ્ફળ શાને પોકાર એની વાણીનો ?
બેખબર તું રહે હજીયે શાને એમ ધરાર ? … બસ, આજ વરસ
ગીત ખૂબ જ સુંદર થયું છે, એટલું જ પઠન !
લય અને તાલ સરસ જળવાયા છે.
અભિનંદન !
June 3rd, 2009 at 11:46 am
વર્ષાનું આહ્વાનગીત ખુબ ગમ્યુ….આજ વરસ તું અંનરાધાર…શ્રેષ્ઠ સાદ છે આપનો જેમ છે વરસાદનો…રસીક પઠન અભિનંદન…
June 4th, 2009 at 5:32 pm
બહુ સરસ
મજા આવી ગઈ
હુ મારી વરસાદ ની કવિતા મુકી છે
તોફાની તોફાની વરસાદ
ધમ ધડાક ધમ ધમ વરસે
ને વાદળો નો થાય ગડગડાટ,
વીજળીની તો તડાફડી આગ જરતી,
ને વરસે તોફાની તોફાની વરસાદ,
ક્ષણમાં થઈ રેલમ છેલ મ પાણીની,
ગાડી બની છે નદી મીઠી,
ને ગાડા બન્યા છે તેના પાણી,
ને ગાડો આ તોફાની વરસાદ
કદા જ સાગર ઘેરી લે સે ધરતી,
બધી જ જગ્યા પાણી પાણી,
લોકો મા થઈ ગયો છે ઘભરાટ,
ડરાવે આ તોફાની તોફાની વરસાદ.
- ભરત સુચક
June 5th, 2009 at 10:00 pm
ચાતકની કલમના આ અનરાધારમાં પલળવાની મસ્તી કંઇક ઓર જ છે! બસ, રોજ વરસ તું અનરાધાર……
June 7th, 2009 at 10:02 pm
ખુબ જ સુંદર કૃતિ છે, ખુબ જ સુંદર કલ્પનાની સાથે અંતરનો પોકાર પણ છે.
ધન્યવાદ દક્ષેશભાઇ આ કૃતિ રચવા બદલ.
July 7th, 2009 at 10:50 pm
ભીનુ ભીનુ ભલે જગત નથી હજુ કંઇક ભીનુ, ઉંડો શ્વાસ ઉનો મારો નથી હદય જ ભીનુ.