Press "Enter" to skip to content

ધીરે ધીરે


મકરસંક્રાતિના શુભ પર્વે સૌ વાચકમિત્રોને શુભેચ્છાઓ. Happy Kite Flying ! મિત્રો, આજે મારી એક સ્વરચિત કૃતિ રજૂ કરું છું. આશા છે એ આપને પસંદ પડશે.

જળ પર પડે પવનનાં પગલાંઓ ધીરે ધીરે,
ખીલે પછી કમળનાં ચ્હેરાંઓ ધીરે ધીરે.

કેવો હશે મધુર એ સંસ્પર્શનો અનુભવ,
ગુંજે છે તાનમાં સહુ ભમરાઓ ધીરે ધીરે.

સારસ ને હંસ યુગ્મો ચૂમી રહ્યાં પરસ્પર,
તોડીને મૌનના સૌ પરદાંઓ ધીરે ધીરે.

તું જાતને છૂપાવી કુદરતથી ભાગશે ક્યાં ?
એ ખોલશે અકળ સૌ મ્હોરાંઓ ધીરે ધીરે.

વૈભવ વસંતનો છે સંજીવની ખુદાની,
બેઠાં કરે છે સૂતાં મડદાંઓ ધીરે ધીરે.

ઈશ્વરની આ અભિનવ લીલા નિહાળ માનવ,
છોડી દે તારા મનની ભ્રમણાઓ ધીરે ધીરે.

સંભાવના ક્ષિતિજે વરસાદી વાદળોની
ચાતક વણે છે એથી શમણાંઓ ધીરે ધીરે.

– દક્ષેશ કોન્ટ્રાકટર ‘ચાતક’

19 Comments

  1. Atul
    Atul January 14, 2010

    ઈશ્વરની આ અભિનવ લીલા નિહાળ માનવ,
    છોડી દે તારા મનની ભ્રમણાઓ ધીરે ધીરે.
    વાહ..અતિ ઉત્તમ..ખૂબ ગમ્યું.
    પ્રગતિ કરો સાહિત્ય રચનાની ધીરે ધીરે..
    મકરસંક્રાંતિની ખૂબ ખૂબ શુભેચ્છાઓ સહ…

  2. Pancham Shukla
    Pancham Shukla January 14, 2010

    દક્ષેશભાઈ, આ વખતે છંદ, બંધારણ અને બાની આ દરેક બાબતે ગઝલ ખરી ઉતરે છે. એટલું જ નહિ, દરેક શેરની ઊંડાઈ એક પાક્ટ અને અનુભવ સમૃદ્ધ ગઝલકારની હોય એવી છે. દરેક શેર અર્થઘન છે- કયાંય સ્પાટ બયાની, ચીલાચાલુ ચોટ કે લોકરંજક ગલગલિયાનો ધખારો નથી.
    ગાગા લગા લગાગા, ગાગા લગા લગાગા જેવો અઘરો છંદ તમને સિદ્ધ થઈ ગયો.
    આ ગઝ્લ વાંચીને વિવેક કાણે (સહજ)ની આ જ રદીફ (અલબત્ત અલગ છંદ અને કાફિયા)ની ગઝલ તરત યાદ આવી.
    વધુ ને વધુ સુંદર ગઝલો મળતી રહે…..

  3. Saryu Parikh
    Saryu Parikh January 14, 2010

    સરસ રચના. વસંતનો વૈભવ— કડી વિશેષ ગમી.

    સરયૂ પરીખ

  4. P Shah
    P Shah January 14, 2010

    વાહ ! ખૂબ જ સુંદર ગઝલ થઈ છે છંદ અને કાફિયા બખૂબી નિભાવ્યા છે !
    અભિનંદન !
    keep it up !

  5. Devika Dhruva
    Devika Dhruva January 14, 2010

    ઈશ્વરની આ અભિનવ લીલા નિહાળ માનવ,
    છોડી દે તારા મનની ભ્રમણાઓ ધીરે ધીરે.

    ખુબ સરસ.

  6. Yatri
    Yatri January 14, 2010

    કહેવુ પડે! વાહ! માનવ સહજ આકાંક્ષાઓ, ઈચ્છાઓ અને એની સામે કુદરતનું “હૂ..તૂ..તૂ..”ની કાબીલે તારીફ રચના!

  7. સુંદર લયબધ્ધ ગઝલ બની છે.
    ધીરે-ધીરે જેવો સુંવાળો અને નજાકતથી ભરપૂર રદીફ , તર્ક અને તર્કસમર્થનને અનુરૂપ કાફિઆ અને સહજ અને સરળ અભિવ્યક્તિ બધાએ સાથે મળીને એક આખું ભાવ વિશ્વ ખડું કર્યું……
    કોઈ એક પંક્તિ ટાંક્વી નથી એટલે સળંગ અભિનંદન.

  8. Sapana
    Sapana January 15, 2010

    સંભાવના ક્ષિતિજે વરસાદી વાદળોની
    ચાતક વણે છે એથી શમણાંઓ ધીરે ધીરે.
    સુંદર ગઝલ..લયબધ્ધ.મજા પડી ગણગણવાની..
    સપના

  9. Chetu
    Chetu January 15, 2010

    બધા એ જે કહેવાનુ હતું એ કહી દીધું. .. હવે મારે કહેવાનુ બાકી શું રહ્યુ..???? . અભિનંદન દક્ષેશભાઇ …!!

  10. દિનકર ભટ્ટ
    દિનકર ભટ્ટ January 15, 2010

    વૈભવ વસંતનો છે સંજીવની ખુદાની,
    બેઠાં કરે છે સૂતાં મડદાંઓ ધીરે ધીરે.
    ઈશ્વરની આ અભિનવ લીલા નિહાળ માનવ,
    છોડી દે તારા મનની ભ્રમણાઓ ધીરે ધીરે.
    સંભાવના ક્ષિતિજે વરસાદી વાદળોની
    ચાતક વણે છે એથી શમણાંઓ ધીરે ધીરે.

    સુંદર…વસંતનું આ ગાન, આખી કુદરતનો ઉત્સવ ચાલી રહ્યો હોય તેવું પ્રતિત થાય છે.

  11. ઈશ્વરની આ અભિનવ લીલા નિહાળ માનવ,
    છોડી દે તારા મનની ભ્રમણાઓ ધીરે ધીરે.
    દક્ષેશભાઈ, ખુબ જ સરસ ગઝલ. આ શેર માં તો અંતરનું ઊંડાણ માપવાનો સફળ પ્રયત્ન. અભિનંદન.

  12. Mahendrasinh
    Mahendrasinh January 15, 2010

    ઈશ્વરની આ અભિનવ લીલા નિહાળ માનવ,
    છોડી દે તારા મનની ભ્રમણાઓ ધીરે ધીરે……………..આ શેર ખુબ ગમ્યો
    અભિનન્દન

  13. Kanchankumari Parmar
    Kanchankumari Parmar January 16, 2010

    યુગોથી આથમતી સાંજ અને પ્રગટતું પ્રભાત પણ
    અહીં તો જિંદગી સારી ગઈ હાથથી સાવ ધીરે ધીરે ……

  14. Dr. Sharadchandra Patel
    Dr. Sharadchandra Patel January 17, 2010

    Really Nice !!!!!!!!!!!!!!!!!!!!!!!!!!!!!

Leave a Reply to Pancham Shukla Cancel reply

Your email address will not be published. Required fields are marked *

This site uses Akismet to reduce spam. Learn how your comment data is processed.