Press "Enter" to skip to content

જૂનું ઘર

રોજ ચણું છું પાંપણ વચ્ચે જૂનું ઘર હું ફળિયામાં,
ભીંત ચીતરી જેની હૈયે ક્ષણને બોળી ખડિયામાં.

વંશવેલ વીંટળાઈ જેને ફાલી-ફૂલી, વૃક્ષ બની
શોધું મૂળિયાં એનાં ઊભા જીર્ણ અડીખમ સળિયામાં.

પાડોશીનો પ્રસંગ, ઘરનો ઉત્સવ; એનું દુઃખ, પીડા,
દુઃખિયારાની છત ટપકે તો નેવાં ઘરનાં નળિયામાં.

બાએ પીરસેલા ભાણાંની લિજ્જત મહેકાવે મનને,
સ્વાદ યથાવત હજીય એનો ચણીબોરનાં ઠળિયામાં.

બાના હાથેથી ઊભરાતું વ્હાલ અડે મન-અંતરને,
તેલ ઘસીને કેશ ગૂંથે છે સ્મરણો મારા પળિયામાં.

એજ હીંચકો, એજ રવેશી, કાતરિયું, ભીંતો, બારી,
કેટકેટલી યાદો એની ખૂંપી પગનાં તળિયામાં.

બચપણનાં દિવસોનો મારો મહેલ ચણી આપે મુજને,
મળશે એવી ક્યાંય કુશળતા આજકાલના કડીયામાં ?

ક્ષણની ટિક્ ટિક્ માંથી નીકળી આજ જવું પાછા મારે,
હૈયાની વાતોને ચીતરું કેમ કરી કાગળિયામાં.

‘ચાતક’ વીતેલા દિવસોના મેળામાં ભટકી ભટકી,
છલકાઈ છે આંખો મારી આજ ફરી ઝળઝળિયામાં.

– દક્ષેશ કોન્ટ્રાકટર ‘ચાતક’

7 Comments

  1. Kishore Modi
    Kishore Modi March 30, 2012

    સુંદર મુસલસલ ગઝલ જૂની યાદો તાજી કરી ગઈ

  2. ‘ચાતક’ વીતેલા દિવસોના મેળામાં ભટકી ભટકી,
    છલકાઈ છે આંખો મારી આજ ફરી ઝળઝળિયામાં.

    ક્યા બાત હૈ…. અચ્છા હૈ….

  3. Urvashi Parekh
    Urvashi Parekh March 30, 2012

    ખુબજ સરસ.
    બચપણ ના દીવસો નો મહેલ ચણી આપે એવા કુશ્ળ કડીયા,
    કેટલીક યાદો એની ખુંપી પગના તળીયામા,
    ચણીબોર વાળી વાત…
    સરસ.

  4. અશોક જાની 'આનંદ'
    અશોક જાની 'આનંદ' April 7, 2012

    વાહ ફરી કમાલ કરી હોં, દક્ષેશ્ભાઇ…!!
    એક ચિત્ર ઉભું કરી દીધું આંખો સામે, વાહ…આખી ગઝલ સુંદર..!
    પણ આ તો લાજવાબ…
    બાએ પીરસેલા ભાણાંની લિજ્જત મહેકાવે મનને,
    સ્વાદ યથાવત હજીય એનો ચણીબોરનાં ઠળિયામાં.

    બાના હાથેથી ઊભરાતું વ્હાલ અડે મન-અંતરને,
    તેલ ઘસીને કેશ ગૂંથે છે સ્મરણો મારા પળિયામાં.

    એજ હીંચકો, એજ રવેશી, કાતરિયું, ભીંતો, બારી,
    કેટકેટલી યાદો એની ખૂંપી પગનાં તળિયામાં.

  5. Saryu Parikh
    Saryu Parikh April 21, 2012

    વાહ! બહુ સરસ. “મૂંઝવણ” અને “બીચારી મા” રચનાઓ પણ દાદ માગી લે તેવી છે.
    સરયૂ

  6. Sanjay S. Dhalavaniya
    Sanjay S. Dhalavaniya November 3, 2012

    I like it, nice poem.
    I get loss more because of I had not know ‘chatak’

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.