Category: વિડીયો

[મહારાષ્ટ્ર રાજ્ય ગુજરાતી સાહિત્ય અકાદમી અને મેઘધનુષ (બોસ્ટન, USA) ના સંયુક્ત ઉપક્રમે તા. ૨૦ માર્ચ, ૨૦૨૨ ના રોજ યોજાયેલ કવિ સંમેલન અંતર્ગત કવિ શ્રી દક્ષેશ કોન્ટ્રાકટર ‘ચાતક’નું પઠન]
*
ગમે ત્યાં જાઉં ને જોઉં તો બધ્ધે એજ ચાલે છે,
તમારા નામના સિક્કા પ્રભુ બધ્ધે જ ચાલે છે.

અભિનય શ્રેષ્ઠ કરવાના પ્રયત્નો હોય છે કાયમ,
અહીં પડદો પડે એના પછી પણ સ્ટેજ ચાલે છે.

છે નેરોગેજના ડબ્બા સમી સંવેદના મારી,
ને તારા શહેરમાં વરસોથી મિટરગેજ ચાલે છે.

મીંચીને યાદ કરવામાં ને મળવામાં ફરક તો છે,
આ મારા શ્વાસ કૈં અમથા હવાથી તેજ ચાલે છે?

તમે છો કોઈ નવલિકાની સુંદર નાયિકા જેવાં,
હું અટક્યો એજ કારણથી, તમારું પેજ ચાલે છે.

હું જેનાથી સખત પલળ્યો હતો એનાથી દાઝ્યો છું,
હજી એની અસર છે, આંખમાંથી ભેજ ચાલે છે .

તને સરકારી દફતરનો અનુભવ કામ નહીં આવે,
તું છે ગાંધીનગરનો ને અહીં સરખેજ ચાલે છે.

તમે સમજી જજો કેવી હશે ‘ચાતક’ની મજબૂરી,
ઉઘાડી આંખ છે ને સ્વપ્નનો પરહેજ ચાલે છે.

– દક્ષેશ કોન્ટ્રાકટર ‘ચાતક’

*
કુશળ ને ક્ષેમ છે એથી ગઝલ સારી લખાઈ છે,
ખુદાની રે’મ છે એથી ગઝલ સારી લખાઈ છે.

સુધારા છંદ ને વ્યાકરણના લખવા દસ વખત આપ્યા,
હજી એ મે’મ છે એથી ગઝલ સારી લખાઈ છે.

ઘણી જહેમત પછી બાંધ્યો કોઈના આંસુઓ ઉપર,
સલામત ડેમ છે એથી ગઝલ સારી લખાઈ છે.

તબીબે લાગણી માપી નવા ચશ્મા લખી આપ્યા,
ત્વચાની ફ્રેમ છે એથી ગઝલ સારી લખાઈ છે.

બિમારીની ખબર જાણી એ મળવાને ઘરે આવ્યા,
ને પૂછ્યું કેમ છે? એથી ગઝલ સારી લખાઈ છે.

અગાસી પર હતાં એ, એમનો પડછાયો મારા પર,
અડ્યાનો વ્હેમ છે એથી ગઝલ સારી લખાઈ છે.

જીવન જીવવા અને લખવાને માટે ક્યાં અલગ રાખ્યું?
એ બંને સે’મ છે એથી ગઝલ સારી લખાઈ છે.

મુકમ્મલ હોત તો ‘ચાતક’ કલમમાં ધાર ક્યાં આવત,
અધૂરો પ્રેમ છે એથી ગઝલ સારી લખાઈ છે.

– © દક્ષેશ કોન્ટ્રાકટર ‘ચાતક’

*

પ્રસંગોમાં જીવું છું તોય ઘટના ખોઈ બેઠો છું,
હું તારી યાદના રંગીન પગલાં ખોઈ બેઠો છું.

મને મંઝિલ મળી એનો હરખ છે, ના નહિ પાડું,
છે પીડા એજ કે હું ગમતાં રસ્તા ખોઈ બેઠો છું.

વિવાદોમાં હતો ત્યારે ઘરે ઘરમાં હું ચર્ચાયો,
જીવું છું સાફસૂથરું તો એ ચર્ચા ખોઈ બેઠો છું.

પ્રસિદ્ધિના શિખર પર એ ખબર પડતી નથી જલ્દી,
હું મારી જાતને મળવાના નકશા ખોઈ બેઠો છું.

હું પત્થર પૂજતો ત્યારે ન’તી મારી દશા આવી,
મળી કૈં સાધુ-સંતોને હું શ્રદ્ધા ખોઈ બેઠો છું.

તને બેચેન રાતોની કસક હું કેમ સમજાવું,
હું તારી નિંદ માટે મારા સપના ખોઈ બેઠો છું.

પુરાવો પ્રેમનો એથી વધારે શું તને આપું?
રટૂં છું નામ તારું ને હું ગણના ખોઈ બેઠો છું.

મળી ખોબો ભરીને હર ખુશી પરદેશમાં ‘ચાતક’
હું મારો દેશ, મારી માની મમતા ખોઈ બેઠો છું.

– © દક્ષેશ કોન્ટ્રાકટર ‘ચાતક’

*
અજબ છે મૌનની ભાષા, તને હું કેમ સમજાવું !
પડે છે શબ્દ ત્યાં ટાંચા તને હું કેમ સમજાવું !

તું પૃથ્વી ગોળ માનીને નીકળતી ના કદી ઘરથી,
જીવનમાં હોય છે ખાંચા તને હું કેમ સમજાવું !

ગણતરી એ હતી કે જિંદગીમાં ક્યાંક પહોંચાશે,
પડ્યા એમાં અમે કાચા, તને હું કેમ સમજાવું !

અતિથિ દેવ માનીને કર્યું સ્વાગત મુસીબતનું,
મળ્યા એમાંય દુર્વાસા, તને હું કેમ સમજાવું !

સીવેલા હોઠની પીડા હૃદયનું રૂપ ધારે છે,
ફુટે છે આંખને વાચા, તને હું કેમ સમજાવું !

મેં ઈશ્વરને કહ્યું થોડા દિવસ માણસ બનીને જો,
જશે ઉતરી બધાં ફાંકા, તને હું કેમ સમજાવું !

ગયા છે છેતરી ‘ચાતક’ હલેસાં, હાથ ને હોડી,
કિનારાઓ હતા સાચા, તને હું કેમ સમજાવું !

– © દક્ષેશ કોન્ટ્રાકટર ‘ચાતક’

*
શ્વાસ પર લાગેલ સઘળી bet છે
જિંદગી સપનાંની સાથે date છે

સુખ લગભગ માઉસ જેવું હોય છે,
દુઃખ એ પાછળ પડેલી cat છે.

છે સફળતા આભમાં ઊડતા વિહગ,
હસ્તરેખા પાથરેલી net છે.

લાગણીની આપ-લેના મામલે,
અશ્રુ એ લાગુ પડેલો VAT છે.

શ્વાસ ધીમા થાય એનો અર્થ એ,
મોતની ગાડી સમયથી late છે.

એકતરફી ચાલતી, આખું જીવન,
પ્રાર્થના ઈશ્વરની સાથે chat છે.

ભાગ્યમાં ‘ચાતક’ પ્રતીક્ષા છે તો છે,
લાઈફનું પૂછો તો બંદા set છે.

– © દક્ષેશ કોન્ટ્રાકટર ‘ચાતક’