Press "Enter" to skip to content

Category: રાસ-ગરબા

તારા વિના શ્યામ


શુદ્ધ, પારદર્શક અને દિવ્ય પ્રેમનું સૌથી અદભુત ઉદાહરણ એટલે રાધા અને કૃષ્ણનો પ્રેમ. પવિત્ર પ્રેમ મનઅંતરમાં શાશ્વત છાપ અંકિત કરી જાય છે. જ્યારે પોતાનું પ્રિય પાત્ર પાસે ન હોય ત્યારે વિરહ સાલે છે, હૃદય એક અકથ્ય વેદનાનો અનુભવ કરે, એ સ્વાભાવિક છે. રાસ રમવાનો અવસર આવ્યો ત્યારે ભગવાન શ્રીકૃષ્ણની સ્થૂળ ગેરહાજરીમાં રાધા એકલતાનો અનુભવ કરે છે અને કૃષ્ણને પોતાની સાથે રાસ રમવા બોલાવે છે. વડોદરાના ગરબાની શાન સમાન, વિરહમાં બાંવરી બનેલી રાધાના અંતરના ભાવો પ્રકટ કરતું આ ખૂબ જ લોકપ્રિય પદ માણો અત્યંત લોકપ્રિય ગાયક અતુલ પુરોહિતના કંઠે.
*

*
તારા વિના શ્યામ મને એકલડું લાગે,
રાસ રમવાને વહેલો આવજે
તારા વિના શ્યામ …

શરદપૂનમની રાતડી,
ચાંદની ખીલી છે ભલીભાતની
તું ન આવે તો શ્યામ, રાસ જામે ન શ્યામ,
રાસ રમવાને વહેલો આવ… આવ… આવ… શ્યામ

ગરબે ધુમતી ગોપીઓ,
સુની છે ગોકુળની શેરીઓ
સુની સુની શેરીઓમાં, ગોકુળની ગલીઓમાં,
રાસ રમવાને વહેલો આવ… આવ… આવ… શ્યામ.

અંગ અંગ રંગ છે અનંગનો,
રંગ કેમ જાય તારા સંગનો
તું ન આવે તો શ્યામ, રાસ જામે ન શ્યામ,
રાસ રમવાને વહેલો આવ… આવ… આવ… શ્યામ.

10 Comments

વ્હાલમની વાત


મનમાં જે વાત ઘોળાતી હોય તે કોઈને કહી દેવાથી હૃદય હલકું થઈ જાય. પણ પોતાના પ્રિયતમની વાતને એમ કાંઈ કોઈને કહી દેવાય ? … પ્રેમને ગમે તેટલો ગુપ્ત રાખવા મથો પણ આખરે તો તે વ્યક્ત થયા વિના નથી રહેતો. સુંદર ભાવભરેલી આ રચના માણો અતુલ પુરોહિતના મધુર સ્વરમાં.
*

*
વ્હાલમની વાત કાંઈ વ્હેતી કરાય નહીં;
હળવેથી હૈયાને હલકું કરાય નહીં !

ગુનગુનતા ભમરાને કીધું કે દૂર જા,
કળીઓના કાળજામાં પંચમનો સૂર થા;
ફોરમના ફળિયામાં ફોગટ ફરાય નહીં:
હળવેથી હૈયાને હલકું કરાય નહીં !

કુંજકુંજ કોયલડી શીદને ટહુકતી,
જીવન વસંતભરી જોબનિયે ઝૂકતી;
પાગલની પ્રીત કંઈ અમથી હરાય નહીં:
હળવેથી હૈયાને હલકું કરાય નહીં !

પાગલની આગળ આ અંતરને ખોલવું,
બોલ્યું બોલાય નહીં એવું શું બોલવું ?
ઘેલાની ઘેલછાથી ઘેલાં ધરાય નહીં;
હળવેથી હૈયાને હલકું કરાય નહીં !

5 Comments

સૂના સરવરીયાને કાંઠડે


આજથી નવરાત્રિનો પ્રારંભ થઈ રહ્યો છે. મા આદ્યશક્તિ જગદંબાના મહિમાને ઉજાગર કરતું આ પર્વ શક્તિનો મહિમા દર્શાવી તેની પૂજા કરવાનો સંદેશ આપે છે. બંગાળમાં દુર્ગાપૂજા પણ આજથી શરૂ થશે. ગુજરાતનું ભાતીગળ ગણાતો ગરબો એના શિખર પર ચઢી આજે શેરીએ શેરીએ અને મહોલ્લે મહોલ્લે ગાજશે. વડોદરા તો ગરબાની રાજધાની ગણાય. જમણી બાજુના મીડિયા પ્લેયરમાં તમે વડોદરાના સુપ્રસિદ્ધ ગરબાઓ અચલ મહેતા, અતુલ પુરોહિત અને સાથીઓના સ્વરમાં મન ભરીને માણી શકશો.
આજે નવરાત્રિ પર્વના પ્રારંભે સાંભળો અવિનાશભાઈની એક અમર કૃતિ.
*
સ્વર: વિરાજ અને બીજલ ઉપાધ્યાય

*
સૂના સરવરીયાને કાંઠડે હું
બેડલું મેલીને ન્હાવા ગઈ
પાછી વળી ત્યારે બેડલુ નહી, બેડલુ નહી.

હું તો મનમાં ને મનમાં મુંઝાણી મારી સૈ,
શું રે કહેવું રે મારે માવડી ને જઈ
પાછી વળી ત્યારે બેડલુ નહી, બેડલુ નહી…..સૂના સરવરીયા

કેટલુંયે કહ્યું પણ કાળજુ ના કોર્યું
ને ચોરી ચોરી ને એણે બેડલું ચોર્યું
ખાલીખમ બેડલાથી વળે ના કંઈ
પાછી વળી ત્યારે બેડલુ નહી, બેડલુ નહી…..સૂના સરવરીયા

નીતરતી ઓઢણી ને નીતરતી ચોળી
ને બેડલા નો ચોર મારે કેમ લેવો ખોળી
દઈ દે મારું બેડલું મારા દલડા ને લઈ
પાછી વળી ત્યારે બેડલુ નહી, બેડલુ નહી … સૂના સરવરીયા

– અવિનાશ વ્યાસ

6 Comments