Month: March 2015

સમયના હાથમાં થોડી ખુશીઓ આપવા માટે,
અમે મીંચી દીધી આંખોને સ્વપ્નો આપવા માટે.

સરિતાની કહાણી છાપવાની કોને ફુરસદ છે ?
ફના થઈ જાય એ છોને દરિયો આપવા માટે.

અમે તો ધારી બેઠા કે તમે કેવળ અમારા છો,
નજર થોડી હટાવો આપ રદિયો આપવા માટે.

તમે વાંચી ગયાં જેને ગણીને શ્યાહીનાં અક્ષર,
અમારું ખૂન રેડાયું એ શબ્દો આપવા માટે.

વિલંબિત શ્વાસ એનાં સ્પર્શથી થઈ જાય છે બેફામ,
હૃદય નાનું પડે છે જેને તખ્તો આપવા માટે.

લખું છું નામ મક્તામાં હું ‘ચાતક’ બસ પ્રણાલીથી,
ખુદા, આભાર તારો આવી ગઝલો આપવા માટે.

– © દક્ષેશ કોન્ટ્રાકટર ‘ચાતક’

4 Comments

[Painting by Donald Zolan]

તીર સાથે સખ્ય જેવું હોય છે,
લક્ષ્યને ક્યાં ભક્ષ્ય જેવું હોય છે,

જો હરણની આંખથી દુનિયા જુઓ,
ઝાંઝવું પણ શક્ય જેવું હોય છે.

જિંદગી દર્પણ હશે, આભાસ ના,
ક્યાંક એમાં તથ્ય જેવું હોય છે.

સુખ વ્હેલી રાતના ઝાકળ સમું,
દુઃખ તો પર્જન્ય જેવું હોય છે.

સાંજના કિલકાટ કરતું ઝાડવું,
બાગમાં મૂર્ધન્ય જેવું હોય છે.

ક્યાંકથી આવી ચડે તારું સ્મરણ,
એય સાલું સૈન્ય* જેવું હોય છે.

શ્વાસનું આવી અને પળમાં જવું,
એ જ શું ચૈતન્ય જેવું હોય છે ?

જિંદગી ‘ચાતક’ બને જો ભીંત સમ,
બારણું ત્યાં ધન્ય જેવું હોય છે.

– દક્ષેશ કોન્ટ્રાકટર ‘ચાતક’

18 Comments