ગુજરાતી સાહિત્યનું નવું સરનામું
સમસ્યા હવે હલ થવાની નથી,
જવાની સમયસર જવાની નથી.
તું પૂછીશ ના એનાં કારણ મને,
અસર છે દુઆની, દવાની નથી.
તરસ પામવા આદરી છે સફર,
ફિકર એટલે ઝાંઝવાની નથી.
એ કાલે હતી ક્યાં કે આજે થશે,
આ ખુશ્બુય વ્હેતી હવાની નથી.
ખરે, પાનખરમાં જ પર્ણો ખરે,
સજા, ડાળને કાપવાની નથી.
ઘડીભર છો લાગે કે હાંફી ગઈ,
આ ઈચ્છા કદી થાકવાની નથી.
અપેક્ષા જીવનથી ન રાખો વધુ,
બધું જિંદગી આપવાની નથી.
નિજાનંદ માટે છે ‘ચાતક’ ગઝલ,
મમત શબ્દને માપવાની નથી.
– © દક્ષેશ કોન્ટ્રાકટર ‘ચાતક’
12 Comments
રુઝાયેલા ઘણાયે જખ્મ આવે છે મને મળવા,
તથાગત થઈ ગયેલા શબ્દ આવે છે મને મળવા.
ત્વચા ને સ્પર્શની વચ્ચે હજુ પણ કૈંક બાકી છે,
હૃદય ધબકાર લઈને રક્ત આવે છે મને મળવા.
હશે કેવા પ્રયત્નો પામવા મંઝિલતણા યારો,
અધીરા થઈ ગયેલા લક્ષ્ય આવે છે મને મળવા.
કુતૂહલથી નિહાળું છું મને હું રોજ દર્પણમાં,
અજાણ્યા કેટલાયે શખ્શ આવે છે મને મળવા.
કુંવારી લાગણીના હાથ પીળા થઈ જશે જલ્દી,
વિવિધ પ્રસ્તાવ લઈને જખ્મ આવે છે મને મળવા.
તમે ચાલી ગયા તો શું, જરા સમજાવો આંસુને,
અકારણ, સામટા કમબખ્ત આવે છે મને મળવા.
કર્યું છે પાર ‘ચાતક’ જિંદગીનું રણ મુસીબતથી,
હજીયે ઝાંઝવાના સ્વપ્ન આવે છે મને મળવા.
– © દક્ષેશ કોન્ટ્રાકટર ‘ચાતક’
26 Comments