ગુજરાતી સાહિત્યનું નવું સરનામું
લાચાર વૃક્ષની વ્યથા મૂંગી ટપાલમાં,
ટહુકાઓ નીકળે ભલા ક્યાંથી ટપાલમાં.
વિસ્તરતું જાય છે સતત સંબંધ કેરું રણ,
મૃગજળ વિશે લખાય ક્યાં ભીની ટપાલમાં.
નારીની વેદના લઈ ડૂસ્કાં ગયા ઘણાં,
પડઘા હજી ઝીલાય ના બ્હેરી ટપાલમાં.
ફુલોએ વારતા લખી એના સુહાગની,
ઝાકળના બુંદ નીકળ્યા એથી ટપાલમાં.
કેવી દશા થઈ હશે એના વિયોગમાં,
સરનામું ચીતરી શકી ખાલી ટપાલમાં.
‘ચાતક’, હવે જીવનતણા નાટકનો અર્થ શું?
અણસાર આવતા નથી કોઈ ટપાલમાં.
– દક્ષેશ કોન્ટ્રાકટર ‘ચાતક’
11 Comments
ક્યાં સુધી દુઃખદર્દની વાતો તમે કીધા કરો,
ઝેર જીવનના બધા શંકર બની પીધા કરો.
માર્ગ જીવનના કદી સીધા-સરળ હોતા નથી,
પત્થરો પ્રારબ્ધના પુરુષાર્થથી સીધા કરો.
સ્વીકૃતિની ધારણા પર થાય પ્રસ્તાવો રજૂ,
જે હૃદયમાં હોય તે નિશ્ચિંત થઈ કીધા કરો.
યાચના કરતાં શરમથી ડૂબવું છોને ભલું,
આપવા બેસે ખુદા તો પ્રેમથી લીધા કરો.
મોત આવી એક દિન ખખડાવવાનું દ્વાર પર,
બારણાંઓ બંધ રાખી ક્યાં સુધી બીધા કરો.
જિંદગી ‘ચાતક’ હવાના ખેલ જેવું છે કશું,
શ્વાસનો ઉત્તર તમે પ્રશ્વાસથી દીધા કરો.
– દક્ષેશ કોન્ટ્રાકટર ‘ચાતક’
12 Comments
કેટલી ક્ષણને સદીમાં રાખીએ,
ચાલ ડહાપણને નદીમાં નાખીએ.
આજ જોષીનો દિવસ કેવો જશે,
હસ્તરેખામાં ફરીથી ઝાંખીએ.
સાંજ પડતાં સૂર્ય પણ થાકી જશે,
ચાલ દીપકમાં વિસામો રાખીએ.
ધૈર્યનો અંજામ કેવો, જાણવા,
બોર શબરીના જઈને ચાખીએ.
આગમનની શક્યતા ‘ચાતક’ હજી,
બારણાં એથી અમસ્તા વાખીએ.
– દક્ષેશ કોન્ટ્રાકટર ‘ચાતક’
3 Comments
નોંધ – મિત્રો, મીતિક્ષા.કોમ પર પ્રસિદ્ધ થનાર આ પ૦૦મી પોસ્ટ છે. (અને યોગાનુયોગ મારી અહીં પ્રસિદ્ધ થનાર ૧૦૦મી ગઝલ છે.) જુલાઈ ૨૦૦૮માં આ વેબસાઈટ ખુલ્લી મુકી ત્યારે આ મુકામ સુધી પહોંચાશે એવી કલ્પના ન હતી. આ બ્લોગે ન કેવળ મારા સાહિત્યરસને ઉજાગર કર્યો પરંતુ મને મારી સાથે ઓળખાણ કરાવીને મારી ભીતર વહેતા સંવેદનોને ઝીલવાની તક આપી છે. માતૃભૂમિથી હજારો માઈલ દૂર ગયા પછી માતૃભાષાનું આકર્ષણ સમજાય છે. સાડા-ત્રણ વરસની સફરમાં સાત લાખથી વધુ પાનાં અને એક લાખ ચાલીશ હજારથી વધુ મુલાકાતીઓના આંકે મારા જેવા અનેકના સાહિત્યપ્રેમને છતો કર્યો છે. એ માટે આપ સર્વે સાહિત્યરસિક મિત્રોને દિલથી સલામ. આશા છે, આપનો પ્રેમ આ રીતે મળતો રહેશે. અસ્તુ.
*****
બે-ચાર બૂંદને તમે સરવર કરી જુઓ,
ઘટના હશે તળાવ, પણ પર્વત કરી જુઓ.
દૃશ્યો ઉપર લગામ ક્યાં સંભવ છે દોસ્તો,
ક્યારેક આંખને તમે કરવત કરી જુઓ.
ભૂલી શકાય ના અહીં વીતી ગયો સમય,
બે-ચાર શ્વાસની ભલે કસરત કરી જુઓ.
ગુજરી ગયેલ વૃક્ષનું તર્પણ થઈ જશે,
પંખી થઈને ડાળ પર કલરવ કરી જુઓ.
‘ચાતક’ના ઈંતજારને મંઝિલ બતાવવા,
ખામોશ આંગણે કદી પગરવ કરી જુઓ.
– દક્ષેશ કોન્ટ્રાકટર ‘ચાતક’
16 Comments
જિંદગી, તારો અજાયબ રંગ છે,
શ્વાસ ફીક્કા તોય સીનો તંગ છે !
એ નથી સાથે તો એથી શું થયું,
એમની યાદો તો તારી સંગ છે !
એમણે ચહેરો બતાવ્યો’તો કદી,
આયનો આજેય એથી દંગ છે.
એમને અડસઠ ભલે પૂરા થયા,
એ હજી તસવીરમાં તો યંગ છે.
જે ગળે આવે ઉલટથી ગાઈ જા,
પ્રેમભીનાં ગીત સહુ અભંગ છે.
મોત અણધાર્યો વિસામો છે અહીં,
જિંદગીની જાતરા સળંગ છે.
શું કહે ‘ચાતક’ પ્રતિક્ષાની વિશે,
ના કદી જીતાય એવો જંગ છે.
– દક્ષેશ કોન્ટ્રાકટર ‘ચાતક’
8 Comments
શક્યતાનાં બારણાંઓ બંધ રાખી જોઈએ,
રિક્તતા એવી રીતે અકબંધ રાખી જોઈએ.
જાત ઝાકળની લઈને સૂર્યના ઘરમાં જવા,
ઓગળે ઝળહળ ન એ પ્રબંધ રાખી જોઈએ.
સ્વપ્ન પીડાયે નિરંતર વિસ્મૃતિના રોગથી,
આંખ મીંચી બે’ક પળ સંબંધ રાખી જોઈએ.
જિંદગી, સંવેદનાનું વસ્ત્ર સરકી જાય ના,
અશ્રુઓનો એટલે કટિબંધ રાખી જોઈએ.
માછલીને જળ વિશે કાયમ રહ્યો છે, એ રીતે
અક્ષરો સાથે ઋણાનુબંધ રાખી જોઈએ.
ક્યાં સુધી ‘ચાતક’ જીવીશું આમ પ્રત્યાઘાતમાં,
લાગણીઓ પર જરા પ્રતિબંધ રાખી જોઈએ.
– દક્ષેશ કોન્ટ્રાકટર ‘ચાતક’
11 Comments