Month: June 2011

હસે છે હોઠ પણ હૈયે અમારું નામ બાકી છે,
સુખદ મુજ સ્વપ્નનો ધારેલ જે અંજામ બાકી છે.

જરા શરમાઈને ચાલ્યા જવું પૂરતું નથી હોતું,
કહે સૌ જીત એને પણ હજુ ઈનામ બાકી છે.

ઉડી ગઈ નીંદ રાતોની, લૂંટાયું ચેન હૈયાનું,
સજાઓ ભોગવું કિન્તુ હજુ ઈલ્જામ બાકી છે.

મુહોબ્બતમાં મળે છે નામના એવી, કે લાગે છે,
મળ્યા ઉપનામ સૌ કિન્તુ હજી બદનામ બાકી છે.

હવે તારું સ્મરણ સાચે જ થાશે મારું મયખાનું,
મદિરા ખૂટશે તો એમ કહેશું, જામ બાકી છે.

શીરી-ફરહાદ, રાંઝા-હીરની ગણના થતી જગમાં,
હજી યાદીમહીં ‘ચાતક’ તમારું નામ બાકી છે.

– દક્ષેશ કોન્ટ્રાકટર ‘ચાતક’

8 Comments

એક આંસુ આંખમાં છે, બ્હાર કાઢી આપ તું,
લાગણી સંવેદનાને ધાર કાઢી આપ તું.

ચાર ભીંતોમાં ચણી છે મેં હૃદયની આરઝૂ,
ઓ ખુદા ! એ ઘર વચાળે દ્વાર કાઢી આપ તું.

ટળવળું છું ક્યારનો હું પ્હોંચવા એના ઘરે,
શક્ય હો તો સાંકડી પગથાર કાઢી આપ તું.

ને ખુલી આંખે અસંભવ હોય જો એનું મિલન,
તો મિલનના સ્વપ્નની વણજાર કાઢી આપ તું.

હર સમસ્યાના ઉકેલો આખરે તુજ પાસ છે,
હસ્તરેખાઓ નવી બે-ચાર કાઢી આપ તું.

એક-બે છાંટે શમે ‘ચાતક’ નહીં દાવાનળો,
આભ ફાડી મેઘ મુશળધાર કાઢી આપ તું.

– દક્ષેશ કોન્ટ્રાકટર ‘ચાતક’

10 Comments

[audio:/yatri/royo-nathi.mp3|title=Royo Nathi|artists=Raju Yatri]

(તરન્નૂમ – રાજુ યાત્રી)

પ્રેમના વિસ્તારને જોયો નથી,
શ્વાસને લૈ શ્વાસમાં પોયો નથી.

રૂપની ચકચાર છે ચારે તરફ,
આયનાને મેં હજી લોયો નથી.

એ સ્વીકારું છું કે એમાં દાગ છે,
મેં પલકથી ચાંદને ધોયો નથી.

એમણે જાતાં કહ્યું’તું ‘આવજો’,
એ જ કારણથી હજુ રોયો નથી.

આંખના આંસુ અહીં ઝાકળસમા,
જેમણે સૂરજ કદી જોયો નથી.

નામ ‘ચાતક’ એટલે રાખી શકું,
મેં કદી વિશ્વાસને ખોયો નથી.

– દક્ષેશ કોન્ટ્રાકટર ‘ચાતક’

12 Comments