Month: April 2009

ક્યારે આવશો પરદુઃખભંજન દશરથનંદન રામ ?
જીવનને સંજીવન દેવા ક્યારે આવશો રામ ?

પંચ ભૂતોની નૌકા લઈને હું ચોપાસ ફરું છું,
એક જ આશ લઈને દિલમાં કાયમ શ્વાસ ભરું છું,
કેવટની નૌકામાં આવ્યા, વારંવાર સ્મરું છું,
મારી નૌકા પાવન કરવા ક્યારે આવશો રામ ?

સદીઓથી જડતામાં હું તો જીવન વહન કરું છું,
ચેતનના કણકણને માટે રોમરોમ ઝંખુ છું,
અહલ્યાનો ઉદ્ધાર કર્યો’તો, વારંવાર સ્મરું છું,
પથ્થરની પ્રતિમામાં ક્યારે પ્રગટાવશો પ્રાણ ?

વચન ઉપર વિશ્વાસ કરીને શમણાં રોજ વણું છું,
કરી પ્રતિક્ષા, સ્મરણ તમારા હું એકત્ર કરું છું,
શબરીના દ્વારે આવ્યા’તા, વારંવાર સ્મરું છું,
મારાં અંતરના ભાવોને ક્યારે ગ્રહશો રામ ?

વિરહી છું, વિરહાગ્નિમાં કાયમ કાજ જલું છું,
‘ચાતક’ થઈને રોજ તમારી તરસે આશ કરું છું,
સમુદ્ર પાર કરી આવ્યા’તા, વારંવાર સ્મરું છું,
ઉગારવા મુજને પણ ક્યારે પધારશો કૃતકામ ?

– દક્ષેશ કોન્ટ્રાકટર ‘ચાતક’

આજે મારું સ્વ-રચિત મુક્તક …

સપનું બની તારી આંખમાં છે આવવું,
પણ આંખો તું મીચતી નથી એનું શું ?
મારી પ્રતિક્ષામાં તું જાગ્યા કરે છે,
ને કેડી સ્મરણની ખૂટતી નથી એનું શું ?

– દક્ષેશ કોન્ટ્રાકટર ‘ચાતક’

પ્રિય મિત્રો,
અત્યાર સુધી મીતિક્ષા.કોમ પર આપની સાથે મારી સ્વરચિત કૃતિઓ ઉપરાંત ગુજરાતી ગીતો, ગઝલો, કવિતા, પ્રાર્થના, ભજનો વગેરે વહેંચવા માટેનો સંનિષ્ઠ પ્રયાસ કર્યો છે. પરંતુ હવે કાર્યની વ્યસ્તતા ઉપરાંત સ્વર્ગારોહણ માટે વધુ સમયની જરૂરિયાત હોવાથી મીતિક્ષા.કોમ પર દરરોજ એક નવી કૃતિ આપવા માટેનો સમય ફાળવવાનું મુશ્કેલ બની રહ્યું છે. ઉતાવળમાં ગમે તેવી કૃતિ રજૂ કરવા કરતાં ગુણવત્તા જળવાય તે હેતુસર, જ્યાં સુધી સમયની મોકળાશ ન થાય ત્યાં સુધી દરરોજ એક નવી કૃતિને બદલે અઠવાડિયામાં બે થી ત્રણ નવી કૃતિ મૂકવા જરૂર પ્રયાસ કરીશ. આપનો પ્રેમ હંમેશની જેમ મળતો રહેશે એવી આશા છે. રસક્ષતિ બદલ દરગુજર કરશો.