Press "Enter" to skip to content

Month: December 2008

ઝૂકવાથી પ્રેમ નથી થાતો


આજે મારી એક સ્વરચિત રચના રજૂ કરું છું. ઈશ્વરને માટે પાડેલો પોકાર કદી નિષ્ફળ જતો નથી. શરત એટલી કે એ સાચા હૃદયનો હોવો જોઈએ. અબોલ પ્રાણીઓ મનુષ્યના પ્રેમભર્યા વ્યવહારથી ગુલામ બનવા રાજી થઈ જાય છે. ભગવાન તો ભાવનો ભૂખ્યો કહેવાયો છે. એ પ્રેમથી કેમ ન પીગળે ? પરંતુ પ્રેમનો અર્થ મંદિરમાં જઈને ઘૂંટણિયે પડવામાં સીમિત નથી થતો. પ્રેમ તો એક હૃદયની બીજા હૃદય સાથે થતી ગોઠડી છે, અનુસંધાન છે, સંવેદનની આપ-લે છે.

તું રોજ પૂકારે છે એને, પોકાર વ્યર્થ નથી જાતો,
પ્રેમ ઝુકાવે છે સૌને, ઝૂકવાથી પ્રેમ નથી થાતો.

તું મંદિર જા કે મસ્જીદ જા, સરનામું એનું એક જ છે,
નામ બદલવાથી એનો આકાર અલગ નથી થાતો.

છે એક સમંદર સૂતેલો ભીતરની ભોમે વરસોથી,
એ સારું છે કે આંખોથી એનો ઘૂઘવાટ નથી થાતો.

ખળખળ વ્હેતી તુજ આંખોમાં સળગે છે લાશો સ્વપ્નોની,
કોણે કહ્યું, જળ-અગ્નિનો કો’દિ સહવાસ નથી થાતો ?

બે-ચાર કદમ સાથે માંડો ત્યાં માર્ગ અલગ ફંટાય અહીં,
એ સાચું છે કે શમણાંનો કાયમ સંગાથ નથી થાતો.

તું એમ જતાવે છે મુજને ભવભવના આપણે સંગાથી,
મિથ્યા છે હૈયાધારણ, પણ આ દિલમાં વ્હેમ નથી થાતો !

છે બાકી કાણાં પડીયામાં બે-ચાર શ્વાસ તણાં ટીપાં,
નભ ઘેરાયેલું ભાળીને ‘ચાતક’ નિઃશ્વાસ નથી થાતો.

– દક્ષેશ કોન્ટ્રાકટર ‘ચાતક’

7 Comments