તારું જ નામ છે

સૌ વાચકમિત્રોને વસંતપંચમી અને વેલેન્ટાઈનની સહિયારી શુભેચ્છાઓ..
*
સેંથી અને ગુલાબમાં તારું જ નામ છે,
લોહી અને શરાબમાં તારું જ નામ છે.

જેને લખ્યા પછી લખ્યું બીજું નથી કશું,
અંગત હૃદય-કિતાબમાં તારું જ નામ છે.

આંખોની આરપાર એ નીકળી શક્યું નહીં,
ખૂંપી ગયેલ ખ્વાબમાં તારું જ નામ છે.

હોઠો ને શ્વાસનો ભલે તાળો મળ્યો નથી,
બાકી બધા હિસાબમાં તારું જ નામ છે.

જેના થકી છુપાવું છું દુનિયાથી હું મને,
હિજાબ કે નકાબમાં તારું જ નામ છે.

કોને મળ્યા પછી થયા ‘ચાતક’ તમે કવિ?
પૂછે, તો બસ જવાબમાં તારું જ નામ છે.

– © દક્ષેશ કોન્ટ્રાકટર ‘ચાતક’
*
[Above: A Painting by Donald Zolan]