સૌ મિત્રોને નાતાલ અને ઈશુના નવા વર્ષની આગોતરી શુભેચ્છાઓ.
*
કાગને મોતીના ચારા ચારવા કેવી રીતે,
દાખલા ખોટા પ્રથમથી ધારવા કેવી રીતે.
વાત જો સંવેદનાની હોય તો તો ઠીક છે,
વેદના વિના જ આંસુ સારવા કેવી રીતે.
જેમણે દરિયો તો શું, પાણી કદી જોયું નથી,
એમનો આપો પરિચય ખારવા, કેવી રીતે.
ફૂલને ફોરમ વિશે એ ચિંતા રહેવાની સતત,
શ્વાસની ડેલીમાં પગલાં વારવા કેવી રીતે.
આગિયાઓની સભામાં એ વિશે ચર્ચા હતી,
આપણા તડકા અહીં વિસ્તારવા કેવી રીતે.
લાગણીના ગર્ભમાં સપનાં ઉછેર્યાં છે અમે,
જન્મતાં પહેલાં જ એને મારવા કેવી રીતે.
સ્વર્ગ કે મુક્તિની ‘ચાતક’ એમને ઈચ્છા નથી,
લક્ષ ચોરાસીથી એને તારવા કેવી રીતે.
– © દક્ષેશ કોન્ટ્રાકટર ‘ચાતક’
આગિયાઓની સભામાં એ વિશે ચર્ચા હતી,
આપણા તડકા અહીં વિસ્તારવા કેવી રીતે…. વાહ ખૂબ મજાની વાત..
આખી ગઝલ સુંદર થઈ છે.. 🙂
Thank you Ashokbhai ..
સરળશબ્દબધ્ધ મનનીય ગઝલ ગમી અભિનંદન
Thank you Kishorbhai