Press "Enter" to skip to content

આંસુ સારવા કેવી રીતે


સૌ મિત્રોને નાતાલ અને ઈશુના નવા વર્ષની આગોતરી શુભેચ્છાઓ.
*
કાગને મોતીના ચારા ચારવા કેવી રીતે,
દાખલા ખોટા પ્રથમથી ધારવા કેવી રીતે.

વાત જો સંવેદનાની હોય તો તો ઠીક છે,
વેદના વિના જ આંસુ સારવા કેવી રીતે.

જેમણે દરિયો તો શું, પાણી કદી જોયું નથી,
એમનો આપો પરિચય ખારવા, કેવી રીતે.

ફૂલને ફોરમ વિશે એ ચિંતા રહેવાની સતત,
શ્વાસની ડેલીમાં પગલાં વારવા કેવી રીતે.

આગિયાઓની સભામાં એ વિશે ચર્ચા હતી,
આપણા તડકા અહીં વિસ્તારવા કેવી રીતે.

લાગણીના ગર્ભમાં સપનાં ઉછેર્યાં છે અમે,
જન્મતાં પહેલાં જ એને મારવા કેવી રીતે.

સ્વર્ગ કે મુક્તિની ‘ચાતક’ એમને ઈચ્છા નથી,
લક્ષ ચોરાસીથી એને તારવા કેવી રીતે.

– © દક્ષેશ કોન્ટ્રાકટર ‘ચાતક’

4 Comments

  1. અશોક જાની 'આનંદ'
    અશોક જાની 'આનંદ' December 25, 2015

    આગિયાઓની સભામાં એ વિશે ચર્ચા હતી,
    આપણા તડકા અહીં વિસ્તારવા કેવી રીતે…. વાહ ખૂબ મજાની વાત..

    આખી ગઝલ સુંદર થઈ છે.. 🙂

    • Daxesh
      Daxesh January 6, 2016

      Thank you Ashokbhai ..

  2. Kishore Modi
    Kishore Modi December 26, 2015

    સરળશબ્દબધ્ધ મનનીય ગઝલ ગમી અભિનંદન

    • Daxesh
      Daxesh January 6, 2016

      Thank you Kishorbhai

Leave a Reply to Kishore Modi Cancel reply

Your email address will not be published.

This site uses Akismet to reduce spam. Learn how your comment data is processed.