Press "Enter" to skip to content

શમણાં જેવું લાગે છે


(Painting by Donald Zolan)

આંખો ખોલી નાખી તોયે શમણાં જેવું લાગે છે,
મનને પૂછ્યું, તો કહે છે કે ઘટના જેવું લાગે છે.

બહુ વિચાર્યું, કોને મળતો આવે છે ચ્હેરો એનો,
ઈશ્વરની બહુ વખણાયેલી રચના જેવું લાગે છે.

પત્થરને પાણી સ્પર્શે ત્યારે થાતાં ગલગલિયાં સમ,
એને જોતાં મનના ખૂણે ઇચ્છા જેવું લાગે છે.

ધોમધખ્યા સહરાના રણમાં હું મધ્યાહ્નની વેળા સમ,
એનું હોવું ખળખળ વ્હેતાં ઝરણાં જેવું લાગે છે.

મારા ઘરની બારીમાંથી એને દીઠા’તાં હસતાં,
વાત હશે વર્ષો જૂની પણ હમણાં જેવું લાગે છે.

એના વિનાના જીવનને, ‘ચાતક’ જીવન શું કહેવું,
ઝાકળજળ ઊડી ગયેલા કોઈ તરણાં જેવું લાગે છે.

– © દક્ષેશ કોન્ટ્રાકટર ‘ચાતક’

13 Comments

  1. Umang Thakkar
    Umang Thakkar February 10, 2015

    ખુબ જ સરસ રચના છે. ખુબ જ સુંદર… કદાચ કહેવા માટે શબ્દો નથી..

  2. Bini Shah
    Bini Shah February 10, 2015

    વાહ ગઝલ વાહ

  3. Kishore Modi
    Kishore Modi February 10, 2015

    પથ્થરને પાણી સ્પર્શે ત્યારે થાતાં ગલગલિયાં સમ,
    એને જોતાં મનના ખૂણે ઇચ્છા જેવું લાગે છે.
    સંવેદનાની કોમળતા નવી જ રીતે ઉજાગર થઇ છે.
    ખૂબ સરસ.

    • Daxesh
      Daxesh February 22, 2015

      Thank you Kishorbhai for your continued encouragement !

  4. Yogesh Pandya
    Yogesh Pandya February 11, 2015

    DEAR DAXESH BHAI.
    VERY NICE……
    મારા ઘરની બારીમાંથી એને દીઠાં’તાં હસતાં,
    વાત હશે વર્ષો જૂની પણ હમણાં જેવું લાગે છે.
    ..
    યાર, તમે તો અમારી દૂખતી નસને દબાવી .. ફરીથી કોલેજની યાદ અપાવી..!!!!

    • Daxesh
      Daxesh February 22, 2015

      કવિતાનું કામ જ ભાવકને સ્થળ અને કાળથી પર અલગ દુનિયામાં લઈ જવાનું છે … આ વાંચીને તમને ભૂતકાળની (મધુર!?) સ્મૃતિ થઈ તો લખેલું વસૂલ ..

  5. ડૉ.મહેશ રાવલ
    ડૉ.મહેશ રાવલ February 16, 2015

    વાહ દક્ષેશભાઇ,
    મસ્ત લયબદ્ધ ગઝલ..આપના આ હમણાં જેવું લાગે છે-શેર
    પરથી, મારી વેબસાઇટ પર શબ્દસ્વરમાં મારા અવાજમાં
    પ્રસ્તુત એક ગઝલ,
    તમે આવો પછી તમને કરૂં હું વાત શમણાંની
    ઘણા વરસો જૂની છે પણ, ગણું હું વાત હમણાંની…
    યાદ આવી ગઇ..!
    આભાર અને અભિનંદન મિત્ર!

    • Daxesh
      Daxesh February 22, 2015

      તમે આવો પછી તમને કરૂં હું વાત શમણાંની
      ઘણા વરસો જૂની છે પણ, ગણું હું વાત હમણાંની.
      વાહ મહેશભાઈ, આપણું ભાવજગત એક જ છે … ખરું ને ?
      Thank you for sharing.
      🙂

  6. urvashi parekh
    urvashi parekh February 16, 2015

    saras rachna.

  7. અશોક જાની 'આનંદ'
    અશોક જાની 'આનંદ' February 16, 2015

    આ બહેરમાં લખવાની મજા આવે જ… મજાની પ્રવાહી ગઝલ

    • Daxesh
      Daxesh February 22, 2015

      હા અશોકભાઈ, ખરી વાત છે. આ બહેરમાં લખવાની સાથે સાથે વાંચવાની પણ મજા આવે .. 🙂

  8. Dipesh Kheradiya
    Dipesh Kheradiya March 13, 2015

    Ek Ek sher Aafreen… Wahhh

    Mast Gazal… Daxeshbhai

    • Daxesh
      Daxesh March 14, 2015

      Thank you dear !

Leave a Reply

Your email address will not be published.

This site uses Akismet to reduce spam. Learn how your comment data is processed.