Press "Enter" to skip to content

પ્રશ્ન તો ઊભો જ છે

સાંજ થાકીને સૂતી છે, શું થશે કાલે સવારે, પ્રશ્ન તો ઊભો જ છે,
રાત પણ જીવી રહી છે એ જ આશાને સહારે, પ્રશ્ન તો ઊભો જ છે.

ઓસની બૂંદો સમા બાકી રહેલા ચંદ શ્વાસો ક્ષણમહીં થૈ જાય ભડકો,
આંજવાનો આંખમાં છે તોય સૂરજને સવારે, પ્રશ્ન તો ઊભો જ છે.

ધારણાની ડાળ પર બાંધી દીધો છે કૈંક આશાઓએ માળો, ને છતાં,
કેમ સંભળાતા નથી બેચાર ટહુકાઓય દ્વારે, પ્રશ્ન તો ઊભો જ છે.

હું ગમું છું કે નહીં એ પૂછતાં બસ, એમણે તો પાંપણો ઢાળી દીધી,
અર્થ એનો શું હશે એ ધારવાનું છે અમારે, પ્રશ્ન તો ઊભો જ છે.

આખરી તારીખ આવી ત્યાં જ બા માંદી પડી ને સૌ બચત ખર્ચાઈ ગઈ,
શું થશે આ મોંઘવારીમાં હવે ટૂંકા પગારે, પ્રશ્ન તો ઊભો જ છે.

એમને જોવા અમારી આંખ ‘ચાતક’ થઈ હરણની જેમ બસ ભટક્યા કરી,
એ હવે મૃગજળ બનીને આવશે મારી મઝારે, પ્રશ્ન તો ઊભો જ છે.

– © દક્ષેશ કોન્ટ્રાકટર ‘ચાતક’

5 Comments

  1. Anil Chavda
    Anil Chavda August 13, 2012

    લાંબા રદિફમાં સરસ કામ થયુ છે દક્ષેશભાઈ….

  2. Kishore Modi
    Kishore Modi August 13, 2012

    હું ગમું છું કે નહીં એ પૂછતાં બસ, એમણે તો પાંપણો ઢાળી દીધી,
    અર્થ એનો શું હશે એ ધારવાનું છે અમારે, પ્રશ્ન તો ઊભો જ છે.
    નખશિખ સુંદર ગઝલ

  3. Rekha Shukla (Chicago)
    Rekha Shukla (Chicago) August 13, 2012

    ધારણાની ડાળ પર બાંધી દીધો છે કૈંક આશાઓએ માળો,….વાહ દક્ષેશભાઈ ખુબ મજાની ગઝલ તો બની ગઈ તો પણ પ્રશ્ન તો ઊભો જ છે.

  4. Pravin Shah
    Pravin Shah August 13, 2012

    એમને જોવા અમારી આંખ ‘ચાતક’ થઈ હરણની જેમ બસ ભટક્યા કરી…
    લાંબી રદીફમાં સુંદર નક્શી કામ !

  5. અશોક જાની 'આનંદ'
    અશોક જાની 'આનંદ' August 14, 2012

    આખરી તારીખ આવી ત્યાં જ બા માંદી પડી ને સૌ બચત ખર્ચાઈ ગઈ,
    શું થશે આ મોંઘવારીમાં હવે ટૂંકા પગારે, પ્રશ્ન તો ઊભો જ છે. ..ખૂબ સુંદર,

    દરેક પ્રશ્નોના જવાબ ખરેખર મેળવવા જેવા છે, આમે ય આપણી આખી જિંદગી પ્રશ્નોની ભરમાર છે.. આખી ગઝલ ગમી ગઇ..!!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.