(તસવીર – રોહતાંગ પાસ જતાં, હિમાચલ પ્રદેશ, 2010)
સૌ વાચકોને સ્વાતંત્ર્યદિન મુબારક હો… જયહિન્દ.
ભર બપોરે ચાંદની કરવી પડે,
મૃગજળોમાં વાવણી કરવી પડે.
કોઈના દુઃખદર્દ છાનાં રાખવા,
જાત સામે આંગળી કરવી પડે.
આદમીના રૂપમાં પત્થર મળે,
ભીંત પાસે માંગણી કરવી પડે.
દૂધના નામે વહે છે રક્ત જ્યાં,
ત્યાં જ ગાયો ધાવણી કરવી પડે.
શ્રાપ નીકળે જેમના કરતૂત પર,
ત્યાં દુઆઓ, સાંભળી કરવી પડે.
લૈ બટ્કણાં શ્વાસનાં બે દોરડાં,
યુગયુગોની બાંધણી કરવી પડે.
એ જ છે ‘ચાતક’ કવિની વેદના,
સાવ અમથી લાગણી કરવી પડે.
– દક્ષેશ કોન્ટ્રાકટર ‘ચાતક’
કોઈના દુઃખદર્દ છાનાં રાખવા,
જાત સામે આંગળી કરવી પડે…
સરસ ગઝલ બધા જ શેર માણવા લાયક….
અશક્યતાઓમાં શ્ક્ય શોધે અને દુઃખી થાય તે કવિ. સરસ રચના.
ખૂબ સુંદર ગઝલ !
સુધીર પટેલ.
સાદ્યાન્ત સુંદર ગઝલ.
મહેશભાઈ,
આપનું સુચન સર-આંખો પર. સુધારો કરી લીધો છે. એમ કરવાથી ક્લિષ્ટતા પણ દૂર થઈ. પઠન કરતાં મને પણ ખટકતું હતું. સૂચન અને પ્રતિભાવ બદલ આભાર.
સરસ ગઝલ બની છે દક્ષેશભાઈ….
એક નમ્ર સૂચનઃ
બટકણાં અહીં બટ ક ણાં ગણીને ગાલગા લેવાયું છે પણ બ ટક ણાં – એમ લગાગા થશે
મારી દ્રષ્ટીએ, લૈ બટકણાં શ્વાસનાં બે દોરડા-એમ કરીએ તો વધુ યોગ્ય ગણાશે. વિચારી જોજો.
સુંદર ગઝલ બદલ અભિનંદન.
સાવ અમથી લાગણી કરવી પડે ! તો કર્યા જ કરવાની.
પહેલી બે લીટીંમાં જ, વાહ! કહી દીધું. બહુ સરસ.
સરયૂ પરીખ
સુંદર ગઝલ.
એ જ છે ‘ચાતક’ કવિની વેદના,
સાવ અમથી લાગણી કરવી પડે.
વાહ.
જાત સામે આંગળી કરવી પડે…
સુંદર વાત ! બધા જ શેર સરસ થયા છે.
મક્તાનો શેર તો લાજવાબ થયો છે. અને
તેને લીધે આખી ગઝલ માણવા લાયક થઈ છે.
એ જ છે ‘ચાતક’ કવિની વેદના,
સાવ અમથી લાગણી કરવી પડે.
ખુબ જ સુંદર ગઝલ અને મક્તા પણ..
આદમીના રૂપમાં પત્થર મળે,
ભીંત પાસે માંગણી કરવી પડે.
ખુબ સુંદર.. મજબૂરી શું શું ન કરાવે..?!! આખી ગઝલ માણવા લાયક
એ જ છે ‘ચાતક’ કવિની વેદના,
સાવ અમથી લાગણી કરવી પડે
કાવ્યની અને કવિની વેદનાનું સોનેરી સત્ય છે આ શેર, આબાદ પકડ્યું છે.