Press "Enter" to skip to content

ઝાંખ ના લાગે કદી

(Painting: Amita Bhakta)

ઝંખનાને ઝાંખ ના લાગે કદી,
દોસ્તીને કાટ ના લાગે કદી.

પાંપણો પહેરો ભરે આઠે પ્રહર,
આંસુઓને ધાક ના લાગે કદી.

લાગણી અવસાન પામે રોજ અહીં,
એ બળે, પણ રાખ ના લાગે કદી.

લોક તો વાતો કરે, ચાલી ગયા,
એ ગયા છે ક્યાંક, ના લાગે કદી.

એક દિ એનું મિલન નક્કી થશે,
પણ સમયને પાંખ ના લાગે કદી.

આંખમાં ‘ચાતક’ પ્રતીક્ષા હોય તો,
સ્વપ્નમાં પણ આંખ ના લાગે કદી.

– દક્ષેશ કોન્ટ્રાકટર ‘ચાતક’

14 Comments

  1. Ami
    Ami August 5, 2011

    ખૂબ સરસ..

  2. Himanshu Patel
    Himanshu Patel August 6, 2011

    લાગણી અવસાન પામે રોજ અહીં,
    એ બળે, પણ રાખ ના લાગે કદી.
    આ વધુ ગમેલા શેર સાથે એટલું જ કહેવાનુ કે આ ફરી ફરી વાંચવા જેવી બેમત ગઝલ છે.

  3. Pancham Shukla
    Pancham Shukla August 6, 2011

    સરસ ગઝલ.

    આંખમાં ‘ચાતક’ પ્રતીક્ષા હોય તો,
    સ્વપ્નમાં પણ આંખ ના લાગે કદી.

  4. Praful Thar
    Praful Thar August 6, 2011

    પ્રિય દક્ષેશ કોન્ટ્રાકટર ‘ચાતક’
    આપની દરેક ગઝલની રચના ખૂબ જ સૂંદર હોય છે એટલે કોને પ્રાધાન્ય આપવું એ કહેવું જરા મુશ્કેલ છે. બાકી તો …એજ શુભેચ્છા કે….
    આપની ગઝલને ઝાંખ ના લાગે કદી,
    કલમને કાટ ના લાગે કદી.

  5. Manhar Mody
    Manhar Mody August 6, 2011

    રોજની જેમ જ આજની ગઝલ પણ ગમી. બધા શેર સરસ થયા છે.

    પાંપણો પહેરો ભરે આઠે પ્રહર,
    આંસુઓને ધાક ના લાગે કદી.

    આ શેરમાં ‘ધાક’ ની જગ્યા એ ‘થાક’ હોવું જોઇયે એવું લાગે છે.

  6. Narendra Jagtap
    Narendra Jagtap August 6, 2011

    મતલાનો અને મક્તાનો બન્ને શેર સરસ…….ફાઇન ગઝલ

  7. Kirtikant Purohit
    Kirtikant Purohit August 6, 2011

    પાંપણો પહેરો ભરે આઠે પ્રહર,
    આંસુઓને ધાક ના લાગે કદી.

    લાગણી અવસાન પામે રોજ અહીં,
    એ બળે, પણ રાખ ના લાગે કદી.

    વાહ ભાઇ વાહ્…. સુન્દર ક્લ્પનોની તાજગીભરી રજુઆત. સરસ ગઝલ.

  8. Daxesh Contractor
    Daxesh Contractor August 6, 2011

    મનહરભાઈ,
    આંસુઓને ધાક ના લાગે કદી – એમાં એવો ભાવાર્થ અભિપ્રેત છે કે પાંપણોનો પહેરો હોવા છતાં આંસુઓ બેધડક આંખની બહાર આવી જ જાય છે. પહેરો અને ધાક એકબીજાને સંદર્ભ આપે છે. થાક એ દૃષ્ટિએ અનુચિત લાગે છે. આપના સૂચન બદલ આભાર.

  9. P Shah
    P Shah August 6, 2011

    આંખમાં ‘ચાતક’ પ્રતીક્ષા હોય તો…

    સુંદર ગઝલ !

  10. વાહ દક્ષેશભાઇ….
    સરસ ગઝલ બની છે, મક્તામાં ‘ચાતક’ અને પ્રતીક્ષાનો અર્થસૂચક મેળ ગમ્યો…!
    અભિનંદન મિત્ર!

  11. અશોક જાની 'આનંદ'
    અશોક જાની 'આનંદ' August 12, 2011

    લાગણી અવસાન પામે રોજ અહીં,
    એ બળે, પણ રાખ ના લાગે કદી.

    વાહ…!! સુંદર ગઝલ…

  12. Sudhir Patel
    Sudhir Patel August 13, 2011

    જોરદાર મક્તા સાથેની સુંદર ગઝલ!
    સુધીર પટેલ.

  13. Razia Mirza
    Razia Mirza August 14, 2011

    ઝંખનાને ઝાંખ ના લાગે કદી,
    દોસ્તીને કાટ ના લાગે કદી.

    પાંપણો પહેરો ભરે આઠે પ્રહર,
    આંસુઓને ધાક ના લાગે કદી.
    ગજબ ની રજુઆત, ખૂબ જ ગમી.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.