Press "Enter" to skip to content

વિરહ-વ્યથા

રાત બારીની નીચે રડતી રહી,
વેદનાઓ દ્વારને છળતી રહી.

સાંજને આંગણ ઉદાસીનાં સૂરજ,
આંખમાં પરછાંઈઓ ઢળતી રહી.

ચાંદની પાલવ પ્રસારી ના શકી,
આગિયાઓની દુઆ ફળતી રહી.

આયખાના અંતની લઈ આરજૂ,
એક મીણબત્તી પછી બળતી રહી,

સ્પર્શનો ઉજાસ પ્હોંચે ક્યાં લગી,
રોશનીમાં લાગણી જલતી રહી.

શૂન્યતાનાં બારણાં ખખડ્યાં કર્યાં,
સ્તબ્ધતાઓ કોઈને નડતી રહી.

આંખમાં ‘ચાતક’ હતી તસવીર ને,
ફ્રેમ શ્વાસોને સતત જડતી રહી.

– દક્ષેશ કોન્ટ્રાકટર ‘ચાતક’

10 Comments

  1. Ami
    Ami July 5, 2011

    વાહ..ખૂબ સરસ..

  2. Saryu Parikh
    Saryu Parikh July 6, 2011

    ભાઈશ્રી,
    સરસ રચના.
    છેલ્લે ફ્રેમ શબ્દ કઠે છે.
    સરયૂ

  3. Himanshu Patel
    Himanshu Patel July 6, 2011

    શૂન્યતાનાં બારણાં ખખડ્યાં કર્યાં,
    સ્તબ્ધતાઓ કોઈને નડતી રહી.
    સુંદર ગઝલમાં આ શેર વધારે ગમ્યો.

  4. Manhar Mody
    Manhar Mody July 6, 2011

    આયખાના અંતની લઈ આરજૂ,
    એક મીણબત્તી પછી બળતી રહી,

    સરસ શેર.

  5. P Shah
    P Shah July 6, 2011

    વેદનાઓ દ્વારને છળતી રહી…..
    સુંદર ગઝલ !
    આખી ગઝલ આસ્વાદ્ય છે,
    મત્લા અને મક્તાના શેર તો લાજવાબ થયા છે.
    અભિનંદન !

  6. અશોક જાની 'આનંદ '
    અશોક જાની 'આનંદ ' July 6, 2011

    સરળ રીતે વહી જતી સુન્દર ગઝલ..!!
    દરેક શે’ર લાજવાબ થયાં છે, આ જો કે વધુ ગમ્યો..
    સ્પર્શનો ઉજાસ પ્હોંચે ક્યાં લગી,
    રોશનીમાં લાગણી જલતી રહી.

  7. સરસ ગઝલ-
    શિર્ષકને બરોબર વળગીને ભાવવહન થયું છે દક્ષેશભાઈ….-અભિનંદન.

  8. Kirtikant purohit
    Kirtikant purohit July 7, 2011

    વિરહને પરિધાન કરી ઉઘડતી ગઝલ સતત ઉજાસને શોધતી રહી છે,,,વાહ…

  9. Ami
    Ami August 2, 2011

    રાત બારીની નીચે રડતી રહી,
    વેદનાઓ દ્વારને છળતી રહી.
    બહુ જ સરસ

Leave a Reply

Your email address will not be published.

This site uses Akismet to reduce spam. Learn how your comment data is processed.