Press "Enter" to skip to content

Category: ગઝલ

લાગણીના કાન


[Painting by Donald Zolan]

અલવિદા ૨૦૧૮. સૌ વાચકમિત્રોને ઈસુના નવા વર્ષની શુભેચ્છાઓ.

*
લાગણીના કાન કાચા હોય છે,
આંખના અખબાર સાચા હોય છે.

પ્રેમમાં શબ્દો જરૂરી તો નથી,
મૌન પણ ક્યારેક વાચા હોય છે.

જન્મથી મૃત્યુને જોડે જિંદગી,
સીધ રેખામાંય ખાંચા હોય છે.

કાળથી જીતી ગયેલા સ્તંભના,
લોહથી મજબૂત ઢાંચા હોય છે.

જૂજ વ્યક્તિઓને શોભે મુખકમળ,
બાકીનાઓને તો ડાચા હોય છે.

સુખ ‘મિસ્ટર ઈન્ડિયા’ જેવું બધે,
દુઃખ ‘ચાતક’ હાવ હાચા હોય છે.

– © દક્ષેશ કોન્ટ્રાકટર ‘ચાતક’

8 Comments

તો મળ મને


[Painting by Amita Bhakta]

રોમરોમે આગ છે? તો મળ મને,
ભીતરે વૈરાગ છે? તો મળ મને.

કાનમાં કેવળ કથાની કામના,
મન ભુસૂંડી કાગ છે? તો મળ મને.

છે વિચારો શાંત મનની દેરીએ ?
ક્યાંય ભાગમભાગ છે? તો મળ મને.

એકતારો શ્વાસનો ‘તુંહી’ ‘તુંહી’,
બંધ બીજા રાગ છે? તો મળ મને.

તનબદનમાં ગેરુઆની ઝંખના,
કંચુકીનો ત્યાગ છે? તો મળ મને.

શ્રીવિરહના અશ્રુઓ ‘ચાતક’ ગુલાલ,
બારમાસી ફાગ છે? તો મળ મને.

– © દક્ષેશ કોન્ટ્રાકટર ‘ચાતક’

2 Comments

ઈચ્છાનો માળો


[Painting by Donald Zolan]

*
પ્રેમના નામે હિમાળો નીકળ્યો,
અર્થ આંસુનો હુંફાળો નીકળ્યો.

બારણાં ઊભા ઊભા થાકી ગયાં,
પથ પ્રતીક્ષાનો છિનાળો નીકળ્યો.

સ્પર્શ એનો સાવ ખરબચડો હતો,
આદમી દિલથી સુંવાળો નીકળ્યો.

રુક્ષતાના મૂળમાં રૂઠી ગયા
કૈંક અશ્રુઓનો ફાળો નીકળ્યો.

જિંદગીની જર્જરિત ડાળી ઉપર,
કેટલી ઈચ્છાનો માળો નીકળ્યો.

સંમતિ સમજી લીધી જેને અમે,
માત્ર આંખોનો ઉલાળો નીકળ્યો.

ક્યાં જઈ ‘ચાતક’ ઉદાસી લૂછવી ?
રંગ જ્યાં તડકાનો કાળો નીકળ્યો !

– © દક્ષેશ કોન્ટ્રાકટર ‘ચાતક’

2 Comments

ચુંટલી ખણી હશે ?

સૂરજ તપે છે કેટલો ! ગરમી ઘણી હશે,
નક્કી એ નબળી બાઈનો શૂરો ધણી હશે.

સૌંદર્ય જોઈ રાતનું શંકા એ થાય છે,
સંધ્યાએ શું શું ખાઈને એને જણી હશે ?

તડકો ને છાંયડી રહે એક જ મકાનમાં,
ઊંચી દિવાલ એમણે ઘરમાં ચણી હશે ?

સુંદરતા, સાદગી, અને શાલીનતા, જુઓ !
કેવી નિશાળે ચાંદની જઈને ભણી હશે ?

વ્હેલી સવારે ઓસની બૂંદોને જોઈ થ્યું,
ફૂલોની આંખમાં પડી કોઈ કણી હશે ?

ઉડ્યા કરે છે એ મુઆ, ઠરતાં નથી કશે,
કોણે ભ્રમરની પૂંઠ પર ચુંટલી ખણી હશે ?

‘ચાતક’ ખયાલ રાખજો સપનાંનો ઊંઘમાં,
એણે નયનમાં આવવા રાતો ગણી હશે.


– © દક્ષેશ કોન્ટ્રાકટર ‘ચાતક’

4 Comments

નિર્દય શિકારી છે

સૌ વાચકમિત્રોને ઈસુના નવ વર્ષની આગોતરી શુભકામનાઓ.
*
હરણ છે હાંફતા શ્વાસો, સમય નિર્દય શિકારી છે,
જીવનના જંગમાં હર આત્મઘાતી પળ બિચારી છે.

ઘણી બાબત ન’તી વિચારવા જેવી, વિચારી છે,
પછી લાગ્યું મને વિચારવું મોટી બિમારી છે.

ખુશીને કેટલુંયે કરગરીને ઘર સુધી લાવ્યો,
મુસીબત માર્ગ પૂછીને સ્વયં આંગણ પધારી છે.

કોઈની ઝુલ્ફ ઢળતાં એમ લાગ્યું સાંજ થઈ ગઈ તો,
કોઈની પાંપણો પર પાથરી મેં પણ પથારી છે.

ફકત બે હાથ જોડ્યાં ત્યાં તરત બોલી ઉઠી મૂરત,
અરે, તેં વાળ ને નખ સાથ ઈચ્છા પણ વધારી છે ?

અવસ્થા ફુલની નાજુક હશે ‘ચાતક’ નહીંતર સૌ
પતંગા પૂછવા આવે ન તબિયત, કેમ? સારી છે?

– © દક્ષેશ કોન્ટ્રાકટર ‘ચાતક’

4 Comments

આમીન આવી જાય છે

વાંસળી સંભળાવનારા હાથમાં દોસ્ત, જ્યારે બીન આવી જાય છે,
જે જગાએ સ્મિત હોવું જોઈએ, ચૂપકીદી ગમગીન આવી જાય છે.

વેદનાની હોય છે લાંબી ઉમર, સુખને થોડા શ્વાસ પણ મળતા નથી,
ને ઉપરથી દર્દને સહેલાવવા, અશ્રુઓ કમસીન આવી જાય છે.

લોક બસ વાતો કરે સંબંધની, લોકને સંવેદનાની શું ખબર,
સાત ભવના વાયદા કરનારની લાગણીમાં ચીન આવી જાય છે.

જિંદગીની યાતનાને ઠારવા આંખમાં પાણી જ જ્યાં પૂરતું નથી,
અશ્રુની જાહોજલાલી જોઈને હોઠ પર આમીન આવી જાય છે.

એ દિલાસા પર હજી ભટકી રહ્યા શ્વાસના ભૂલા પડેલા કાફલા,
શ્યામ આંખોના થયાં પર્દા છતાં સ્વપ્ન તો રંગીન આવી જાય છે.

જિંદગીની કશ્મકશ વિશે કહો શી રીતે, ‘ચાતક’ ખુલાસા આપવા,
હસ્તરેખા લખેલું રણ અને રાશિમાં મુજ મીન આવી જાય છે !

– © દક્ષેશ કોન્ટ્રાકટર ‘ચાતક’

7 Comments