Press "Enter" to skip to content

Category: ચાતક

ચાતક, દક્ષેશ કોન્ટ્રાકટર, સ્વરચિત કૃતિઓ

ફોટો બતાવ, ક્યાં છે


[Painting by Donald Zolan]

આવે ન ઊંઘ રાતે, એવો તનાવ ક્યાં છે?
સપનાની સાથે પ્હેલાં જેવો લગાવ ક્યાં છે?

દોડે છે રાતદિવસ ઘડીયાળના આ કાંટા,
આ હાંફતા સમયનો કોઈ પડાવ ક્યાં છે?

ઊભો રહું કે ચાલું, એની જ છે વિમાસણ,
ઓ લક્ષ્ય, એ વિશેનો તારો સુઝાવ ક્યાં છે?

કણકણમાં તું વસે છે, એવું કહે છે લોકો,
ખાલી જગામાં તારો ફોટો બતાવ, ક્યાં છે?

રંગો, બધાય રંગો, શોભે છે એની રીતે,
કિન્તુ સફેદ જેવો શબનો ઉઠાવ ક્યાં છે?

આંસુ ઢળીને અમથાં આવે ન હોઠ ઉપર,
તરસ્યાને ટાળવાનો જળનો સ્વભાવ ક્યાં છે?

દૃષ્ટા બનીને ‘ચાતક’ જોયા કરો જીવનને,
શ્વાસોની આવ-જાથી મોટો બનાવ ક્યાં છે?

– © દક્ષેશ કોન્ટ્રાકટર ‘ચાતક’

17 Comments

સંવેદનાની પાળ પર

અશ્રુઓ જેવી રીતે સંવેદનાની પાળ પર,
કૂંપળોની સાથ ટહુકાઓ ફૂટે છે ડાળ પર.

દોસ્ત, તેં સરનામું આપ્યું એટલે સારું થયું,
હું તો પ્હોંચી જાત નહીંતર આપણી નિશાળ પર.

રોજ વૃદ્ધોને એ મળવા જાય છે કાઢી સમય,
શી રીતે નફરત કરો એ સહૃદયી કાળ પર.

સાંજની જાહોજલાલી સૂર્યને પોસાય ના,
ક્યાં લગી ગુજરાન ચાલે રોશનીની દાળ પર.

દર્દ, આંસુ કે મુહોબ્બત, એ નભાવી લે બધું,
જિંદગી અટકી પડે છે શ્વાસના છિનાળ પર.

આંગળી પકડી ચલાવો મત્લાથી મક્તા સુધી,
પણ ગઝલ લપસી જવાની લાગણીના ઢાળ પર.

ફૂલ પર ‘ચાતક’ મૂકે કેવી રીતે એનાં ચરણ,
એટલે ચાલ્યા કરે છે એ સડક કાંટાળ પર.

– © દક્ષેશ કોન્ટ્રાકટર ‘ચાતક’

6 Comments

તમે કહો તો મુઠ્ઠી ખોલું


[Painting by Donald Zolan]

ઝાકળભીના કૈંક સ્મરણ છે, તમે કહો તો મુઠ્ઠી ખોલું,
હસ્તરેખાને બદલે રણ છે, તમે કહો તો મુઠ્ઠી ખોલું.

સૂરજ ડૂબવાના શમણાં લઈ રાતીચોળ થયેલી મારી
આંખોમાં થીજેલી ક્ષણ છે, તમે કહો તો મુઠ્ઠી ખોલું.

સેલફોનને ટાવરનું જેવી રીતે રહેતું કાયમ,
દિલમાં કોનું આકર્ષણ છે, તમે કહો તો મુઠ્ઠી ખોલું.

‘પ્રેમ’ કહાનીનું શીર્ષક ને અંત આપણું મધુર મિલન,
કેટકેટલા વચ્ચે ‘પણ’ છે, તમે કહો તો મુઠ્ઠી ખોલું.

‘ચાતક’ની મંઝિલ, રસ્તા કે પગલાંઓ બદલાયા ના,
ચોંટી ગયલા ક્યાંક ચરણ છે, તમે કહો તો મુઠ્ઠી ખોલું.

– © દક્ષેશ કોન્ટ્રાકટર ‘ચાતક’

6 Comments

સ્કૂલ લગ પહોંચ્યા નથી


[Painting by Donald Zolan]

*

ઝંખનાના ચોરપગલાં ઝૂલ લગ પહોંચ્યા નથી,
સ્વપ્ન ઘરથી નીકળીને સ્કૂલ લગ પહોંચ્યા નથી.

કંટકોની છે હકૂમત અહીં બધી ડાળી ઉપર,
સારું છે કે હાથ એનાં ફૂલ લગ પહોંચ્યા નથી.

ચાલતાં રાખી હતી એ સાવધાનીના કસમ,
ભૂલથીયે મારાં પગલાં ભૂલ લગ પહોંચ્યા નથી.

પૂર્ણતા વિશે બયાનો એમને શોભે ખરાં ?
ચાપથી જેઓ હજી વર્તુલ લગ પહોંચ્યા નથી.

જાત પંડીતની લઈને પ્રેમને પરખાય ના,
કોઈ જ્ઞાનીના ચરણ ગોકુલ લગ પહોંચ્યા નથી.

એમને નમવાનું કારણ એમની શાલીનતા,
એ હજી ડમરુ ત્યજી ત્રિશૂલ લગ પહોંચ્યા નથી.

દૂરતાની આ નદી ઓળંગશું કેવી રીતે,
આપણા હૈયા પ્રણયના પૂલ લગ પહોંચ્યા નથી.

આંખ ‘ચાતક’ની તલાશે ભીતરી સૌંદર્યને,
હોઠ એના એથી બ્યૂટીફૂલ લગ પહોંચ્યા નથી.

– © દક્ષેશ કોન્ટ્રાકટર ‘ચાતક’

6 Comments

ઈતિહાસ રોકે છે


સૌ મિત્રોને Happy 2016!
*
પવનના વેગને હળવેકથી જ્યમ ઘાસ રોકે છે,
સમયની ચાલને કોમળ સ્મરણની ફાંસ રોકે છે.

મિલનની કૈંક ઘટનાઓ ઊભેલી હોય રસ્તામાં,
ચરણને ચાલતાં ભૂગોળ નહીં, ઈતિહાસ રોકે છે.

પ્રણય એક સાધના છે, જો તમોને આવડે કરતાં,
સમાધિ પામતાં સાધકને એનાં શ્વાસ રોકે છે.

તમે ચ્હેરાઓ વાવીને કદી જોયાં છે દર્પણમાં ?
ઘણાં દૃશ્યોને ઉગતાં આંખનો આભાસ રોકે છે.

અગોચર શ્વાસની બેડી થકી છું કેદ વરસોથી,
મને ભીતર રહેલું તત્વ કોઈ ખાસ રોકે છે.

કફન પ્હેરીને ‘ચાતક’ હુંય દોડી જાઉં સમશાને,
મને જીવંત હોવાનો ફકત અહેસાસ રોકે છે.

– © દક્ષેશ કોન્ટ્રાકટર ‘ચાતક’

6 Comments

આંસુ સારવા કેવી રીતે


સૌ મિત્રોને નાતાલ અને ઈશુના નવા વર્ષની આગોતરી શુભેચ્છાઓ.
*
કાગને મોતીના ચારા ચારવા કેવી રીતે,
દાખલા ખોટા પ્રથમથી ધારવા કેવી રીતે.

વાત જો સંવેદનાની હોય તો તો ઠીક છે,
વેદના વિના જ આંસુ સારવા કેવી રીતે.

જેમણે દરિયો તો શું, પાણી કદી જોયું નથી,
એમનો આપો પરિચય ખારવા, કેવી રીતે.

ફૂલને ફોરમ વિશે એ ચિંતા રહેવાની સતત,
શ્વાસની ડેલીમાં પગલાં વારવા કેવી રીતે.

આગિયાઓની સભામાં એ વિશે ચર્ચા હતી,
આપણા તડકા અહીં વિસ્તારવા કેવી રીતે.

લાગણીના ગર્ભમાં સપનાં ઉછેર્યાં છે અમે,
જન્મતાં પહેલાં જ એને મારવા કેવી રીતે.

સ્વર્ગ કે મુક્તિની ‘ચાતક’ એમને ઈચ્છા નથી,
લક્ષ ચોરાસીથી એને તારવા કેવી રીતે.

– © દક્ષેશ કોન્ટ્રાકટર ‘ચાતક’

4 Comments