સૌ વાચકમિત્રોને દિપાવલી અને નૂતન વર્ષની શુભેચ્છાઓ. આપ અને આપના સ્નેહી, મિત્રો તથા પરિવારજનો માટે નવું વર્ષ સુખ, સમૃદ્ધિ અને આનંદનું પર્વ બની રહે એવી પ્રભુને પ્રાર્થના.
*
સ્વપ્ન પોતીકાં મટીને પારકાં થઈ જાય છે,
દોસ્તો, ત્યારે પ્રણયનાં પારખાં થઈ જાય છે.
આંખમાં નાખીને આંખો બસ તમે જોયાં કરો,
કોઈ ચ્હેરા જિંદગીના આયનાં થઈ જાય છે.
‘કેમ છો’ પૂછતાંની સાથે ગાલ ઉપર લાલી ફૂટે,
હોઠ ખુદ સંકોચ સાથે ઠાવકાં થઈ જાય છે.
આ અઢી અક્ષરમાં એવું શું હશે, જેના થકી,
લોહીનાં સંબંધ પળમાં સાવકાં થઈ જાય છે.
સ્પર્શની રેખા ફુટે કુમળી હથેળીમાં પછી,
શ્વાસ ખુદ સંજીવનીને લાવતાં થઈ જાય છે.
એ જ ‘ચાતક’ ધન્યતાની છે ક્ષણો જીવનમહીં,
શબ્દ મોઘમ અર્થ લઈને આવતાં થઈ જાય છે.
– © દક્ષેશ કોન્ટ્રાકટર ‘ચાતક’
8 Comments