Press "Enter" to skip to content

Month: May 2012

આંસુના વ્હાણ

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.


(તરન્નુમ – રાજુ યાત્રી)

રેતીના સાત-સાત દરિયા ઉલેચીને નીકળ્યા છે આંસુના વ્હાણ,
હવે ડમરી કે ઢૂવાને પડતા મેલીને તમે પાંપણને સોંપો સુકાન.

ઝંખનાના ઝાંઝવાઓ જીવતરની કેડી પર ચાહો ન ચાહો પણ આવતા,
ઈચ્છાના મેઘધનુ સપનાંની વારતામાં મનચાહા રંગો રેલાવતા,
આતમના આંગણિયે કોના આ પડછાયા આવીને બાંધે મકાન ?
… રેતીના સાત સાત દરિયા.

મ્હોરેલી જૂઈ જેમ મ્હોરે અજંપો તો વધવાની વેલ જેમ વેદના,
બાવળના કાંટાઓ હૈયામાં ખૂંપે તો યાદોના ગામ બળે કેમ ના ?
ભવભવના સંબંધો અધવચ્ચે તૂટીને પીડામાં પૂરે છે પ્રાણ.
… રેતીના સાત સાત દરિયા.

દૃશ્યોના પરદાઓ ફાડીને ‘ચાતક’શી આંખોએ કરવાનું હોય શું ?
શ્વાસોની આવ-જા શીતળ પવન નહીં, રગરગમાં ફૂંકાતો કોઇ લૂ,
સાજન વિનાનું ઘર, ઉંબર, અરીસો કે આયખું આ આખું મસાણ.
… રેતીના સાત સાત દરિયા.

– © દક્ષેશ કોન્ટ્રાકટર ‘ચાતક’

10 Comments

શબ્દ વિના ટળવળે

લાગણીઓ શબ્દ વિના ટળવળે,
વૃક્ષ કોઈ ફૂલ વિના ના ફળે.

ભીંત સાથે વ્હાલથી વાતો કરો,
એ છતાંયે કોઈનું ક્યાં સાંભળે ?

સૂર્યકીરણથી પ્રથમ ઝળહળ બને,
જાત ઝાકળની પછી ભડકે બળે.

આ ગઝલનો એટલો ઉપકાર કે,
વાત હૈયાની અહીં કહેવા મળે.

શ્વાસ કેવળ એક એવી દોર જે,
વિશ્વના સઘળા મનુજને સાંકળે.

ટેરવાના સ્પર્શથી જેને મઢી,
એ જ અંગૂઠી મળે ના આંગળે.

કોઈ ઘટના બર્ફથી પણ શીત છે,
એ જ કારણ દાંત ‘ચાતક’ના કળે.

– © દક્ષેશ કોન્ટ્રાકટર ‘ચાતક’

9 Comments

ભટકી જવાતું હોય છે

સાંજ પડતાં રાતરાણી થઈ જવાતું હોય છે,
કોઈની યાદો થકી મ્હેંકી જવાતું હોય છે.

ગ્રીષ્મના મધ્યાહ્ન જેવી ભડભડે હૈયે અગન,
માવઠું થઈ આંખથી વરસી જવાતું હોય છે.

જિંદગીની અસલિયત ગમગીન રાખે છે છતાં,
એક-બે સપનાં થકી બ્હેકી જવાતું હોય છે.

નોંધ લેવી કે ન લેવી એ જગત નક્કી કરે,
આમ તો અખબાર થઈ જીવી જવાતું હોય છે.

મસ્ત દરિયાને કિનારે હોય વસવાનું છતાં,
બૂંદ માટે પ્રેમની તરસી જવાતું હોય છે.

છાંય કઠિયારાને મળતાં હાશ નીકળે એ સમે
વૃક્ષથી મૂછમાં જરા મલકી જવાતું હોય છે.

સર્પ જે રીતે ઉતારે કાંચળી એ રીતથી,
આ સમયથી બેફિકર સરકી જવાતું હોય છે.

ખુશનસીબી છે કે ‘ચાતક’ ઈંતજારી કોઈની
આંખથી અહીંયા સહજ ભટકી જવાતું હોય છે.

– © દક્ષેશ કોન્ટ્રાકટર ‘ચાતક’

8 Comments

आजकल


[Painting by Amita Bhakta]

वक्त भी चलते हुए गभरा रहा है आजकल,
कौन उसके पैर को फिसला रहा है आजकल ?

रास्ते आसान है पर मंझिले मिलती नहीं,
हर कोई पत्थर से क्यूँ टकरा रहा है आजकल ?

न्याय का दामन पकडकर चल रही है छूरीयाँ,
सत्य अपने आपमें धुँधला रहा है आजकल

पतझडों ने नींव रिश्तों की हिला दी इस तरह,
पैड खुद पत्तो से यूँ कतरा रहा है आजकल

आप के चहेरे की खुश्बु को सलामत राखिये,
एक भँवरा आप पर मंडरा रहा है आजकल

वक्त की नादानियत या बेकरारी प्यार की,
कौन ‘चातक’ मोम को पिघला रहा है आजकल ?

– © दक्षेश कोन्ट्राकटर ‘चातक’

7 Comments