Press "Enter" to skip to content

Month: September 2011

કો’ક નડે છે બિલ્લીને

(Photo taken @ Hilo, The Big Island, Hawaii)

એક આદમી રસ્તામાં હરરોજ મળે છે બિલ્લીને,
વાત વહે છે જંગલમાં કે કો’ક નડે છે બિલ્લીને.

માર્ગ બદલવાથી થાતો ના લેશ મુસીબતથી છુટકાર,
ભયની ભૂતાવળ જીવનમાં રોજ છળે છે બિલ્લીને.

પૂર્વગ્રહોથી મોટા કોઈ ગ્રહ-નક્ષત્ર નથી, યારો,
ભીતરમાં પેઠેલા સો-સો વ્હેમ અડે છે બિલ્લીને.

જોષીની વાતોને સાચી કોઈ નહીં માને, કારણ
જોષી કે’ છે, રાહુ આવી રોજ ગળે છે બિલ્લીને !

બાળક થઈને જેની પીઠે પસવારેલા હાથ હજાર,
એ જ આદમી મોટો થઈને આજ લડે છે બિલ્લીને !

દીન બાળની કિસ્મતમાં ના છાંટો એક ભલે ‘ચાતક’,
ભાગ્ય બડા બલવાન અહીં કે દૂધ મળે છે બિલ્લીને.

– દક્ષેશ કોન્ટ્રાકટર ‘ચાતક’

12 Comments

અનુભૂતિ


(Painting: Amita Bhakta)
[audio:/n/nari-shunyata-ma.mp3|titles=Nari Shunyata Ma|artist=Devesh Dave]
(સ્વર – દેવેશ દવે)
[audio:/yatri/vaagi-rahyo-chhu.mp3|titles=Vaagi rahyo chhu|artist=Raju Yatri]
(તરન્નુમ – રાજુ યાત્રી)

નરી શૂન્યતામાં હું વાગી રહ્યો છું,
નિરાકાર, સાકાર, લાગી રહ્યો છું.

કદી બુદબુદા થઈ, કદી ખુદ ખુદા થઈ,
હું મંદિર મસ્જીદ તાગી રહ્યો છું.

ધ્વનિનું છું ઉદગમ, સ્વયં નાદબ્રહ્મ,
હું પડઘો બની ક્યાંક વાગી રહ્યો છું.

પ્રકાશિત સ્વયં હું ભલે દીપ માફક,
હું પડછાયો થઈ ક્યાંક ભાગી રહ્યો છું.

નથી કોઈ બંધન, નથી મોહ-મમતા,
ક્ષણેક્ષણ છતાં કૈંક ત્યાગી રહ્યો છું.

સમય છું, કરું ખુદ પ્રતીક્ષા સમયની,
હું ‘ચાતક’ બની ક્યાંક જાગી રહ્યો છું.

– દક્ષેશ કોન્ટ્રાકટર ‘ચાતક’

18 Comments

જળપ્રપાત થઈ શકે

પ્રેમભીની પાંપણો પોલાદ થઈ શકે,
એક પલકારા થકી પરભાત થઈ શકે.

સખ્ત તારાજી કરે ધસમસ પ્રવાહો પણ,
એક આંસુ ક્યાંક જળપ્રપાત થઈ શકે.

એમને જોવા અગર અપરાધ હોય તો,
એમનાં સપનાં કઠોરાઘાત થઈ શકે.

હો હવા ને હોઠ ને શ્વાસોની અકળામણ,
તો ઉચ્છવાસોમાં ઘણીયે વાત થઈ શકે.

પ્રેમ તો એવી બલા છે, રાજવીઓ શું,
ભલભલાયે મહારથીઓ માત થઈ શકે.

પ્રેમ એ કોઈ ગણિતનો દાખલો નથી,
કે કોઈ ઘટના ભૂંસવાથી બાદ થઈ શકે.

પ્રેમ તો પારસમણિનો સ્પર્શ છે ‘ચાતક’,
આયખું એના થકી આબાદ થઈ શકે.

– દક્ષેશ કોન્ટ્રાકટર ‘ચાતક’

14 Comments

શોધી રહ્યો છું જાતને

હું હજી શોધી રહ્યો છું જાતને,
તું અરીસો થૈ મને બતલાવને.

ફુલ, ઝાકળ, રેત, દરિયો કે નદી
તું કવિ થઈને મને સરખાવને.

ચાંદ થઈને ઝળહળે આકાશમાં,
આંગણે ક્યારેક મળવા આવને.

આગ હો કે બાગ-એની શી ફિકર,
તું જ આ દુનિયા મને પરખાવને.

ચોતરફ સંગીત તારા પ્રેમનું,
તું જરા એની લિપિ ઉકલાવને.

જિંદગી પળવારમાં વીતી જશે,
તું હથેળી તો જરા સરકાવને.

પ્રેમ, વર્ષા, ઈંતજારી કે વિરહ,
તું જ ‘ચાતક’ થૈ મને સમજાવને.

– દક્ષેશ કોન્ટ્રાકટર ‘ચાતક’

14 Comments

વાંચ, નહીં આવે

અભિનવ ગીતાજ્ઞાન !

નેકીના મારગમાં કો’દી ખાંચ નહીં આવે,
હોય ભરોસો ઈશ્વરનો તો આંચ નહીં આવે.

શુભ કર્મોનાં અનુષ્ઠાનથી જગ પૂજશે તુજને,
કર્મ હશે જો કાળા, પૂછવા પાંચ નહીં આવે.

વ્યભિચારનો રાવણ હરશે શાંતિતણી સીતાને,
પતન રોકવા પછી જટાયુ-ચાંચ નહીં આવે.

સત્યાસત્ય વિચારી જીવનપથ પર પગલાં ભરજે,
આત્મપરીક્ષાથી મોટી કો’ જાંચ નહીં આવે.

જન્મમરણના ચક્કરથી ના કોઈ છૂટ્યું, છૂટવાનું,
કાળદેવતાથી બચાવવા લાંચ નહીં આવે.

‘ચાતક’ થઇ તું રાહ જુએ છે કોના અવતરવાની,
ક્યાંક લખેલું હથેળી ઉપર વાંચ, નહીં આવે.

– દક્ષેશ કોન્ટ્રાકટર ‘ચાતક’

12 Comments

મારી અંદર

ચોગમ ફેલાયેલું રણ છે મારી અંદર.
મૃગજળ જેવી ભીની ક્ષણ છે મારી અંદર.

અરમાનોની કુંજગલીમાં ભટકી ભટકી,
હાંફી ગયેલાં કૈંક હરણ છે મારી અંદર.

ઝાંઝવા સમી લાગણીઓ શાને વરસાવે,
થીજી ગયેલાં સાવ ઝરણ છે મારી અંદર,

શાહી કલમની સૂકાવાનું નામ નહીં લે,
કૈં કેટલાં અવતરણ છે મારી અંદર.

કણકણમાં તું છુપાયેલો, જાણું છું, પણ
બાકી ના કોઈ રજકણ છે મારી અંદર.

‘ચાતક’ થઈને રાહ જોઉં છું કૈં વરસોથી
આવ, આવવાનાં કારણ છે મારી અંદર.

– દક્ષેશ કોન્ટ્રાકટર ‘ચાતક’

13 Comments