Press "Enter" to skip to content

Author: admin

તને ચૂમવાની રજા નથી


[Painting by Donald Zolan]

*
તું નજરની સામે રહે છતાં તને ચૂમવાની રજા નથી,
હું પતંગ પાગલ પ્રેમમાં, ને તું બૂઝનારી શમા નથી.

હું કદમ બઢાવીને શું કરું, ઘણા માર્ગ ઊભા વિચારમાં,
છે ઘણીય એવીય મંઝિલો, જ્યાં પ્હોંચવાની મજા નથી.

તું કહે તો ફુલ ગુલાબ શું, લઈ આવું આખું ચમન ઘરે,
હું સુંગધ લાવું કઈ રીતે, ઘર આપણે જ્યાં હવા નથી.

તું ચહે અગર તો ચણી શકે ઘર ખ્વાબનું મુજ આંખમાં,
તું હૃદયની વાત કરીશ ના, ઘર બાંધવા ત્યાં જગા નથી.

જે થવાનું છે એ થશે થશે, જે નથી થવાનું, થશે નહીં,
આ પ્રણયનું દર્દ છે રહગુજર ને કશે જ એની દવા નથી.

તું લખે તો ‘ચાતક’ એમ લખ, કરે આરતી કોઈ મંદિરે,
આ ગઝલ ઈબાદત ઈશ્કની, અને ઈશ્ક એ કૈં ખતા નથી.

– © દક્ષેશ કોન્ટ્રાકટર ‘ચાતક’

8 Comments

ફરારી કાર છે

કૈંક ખીંટીઓ ભલે તૈયાર છે,
ભીંત પર લટકી જવાની વાર છે.

ચાર દિવસ પ્રેમના પૂરા થયા,
ચાર એની યાદના ઉધાર છે.

શ્વાસ મેળવવા પડે છે પ્રેમમાં,
કુંડળીઓ મેળવો, બેકાર છે.

હર્ષમાં કે શોકમાં સરખા રહે,
આંસુઓ બહુ ફાંકડા ફનકાર છે.

માત્ર શંકાથી જ એ તૂટી ગયા,
કેટલાં નાજુક પ્રણયનાં તાર છે.

મન વિશે થોડું વિચાર્યું, તો થયું,
આ વિચારો કે ફરારી કાર છે ?

મોત, ‘ચાતક’ આવશે પૂછ્યા વગર,
દોસ્તનો એ આગવો અધિકાર છે.

– © દક્ષેશ કોન્ટ્રાકટર ‘ચાતક’

10 Comments

હજી સિતારા ખરી રહ્યાં છે

હજી સમય છે તમારી પાસે, હજી સિતારા ખરી રહ્યાં છે,
જુઓ કે મળવાને માટે કેવા નવા જ રસ્તા ખુલી રહ્યાં છે.

તમે ગયા એ કઠોર દિનથી બનાવ એવા બની રહ્યાં છે,
હજાર કાંટા ભલે ચમનમાં, ગુલાબ અમને ગમી રહ્યાં છે.

નદી-તળાવો ગયાં સૂકાઈ, નથી રહ્યાં આંખમાંય પાણી,
હવે તો જળની મઝાર ઉપર યુવાન તડકા રમી રહ્યાં છે.

દુઃખી થશો ના એ વાતથી કે તમે થઈ ના શક્યા અમારા,
અમે તમારું સ્મરણ કરીને તમારા જેવાં થઈ રહ્યાં છે.

હજીય પાછાં ફરી શકો છો, હજીય પગલાં નથી ભૂંસાયાં,
હજી વમળ છે, હજી કમળ છે, હજીય ભમરા ગૂંજી રહ્યા છે.

લખ્યું હશે તો ફરી મળીશું, ફરી રેતના મહલ ચણીશું,
ઘણાંય સપનાં ઉદાસ મનની મરુભૂમિમાં જીવી રહ્યાં છે.

નથી તમન્ના, નથી ઈબાદત, નથી ફરિશ્તાઓ જેવી ચાહત,
છતાં તમારી કરી પ્રતીક્ષા, અમેય ‘ચાતક’ બની રહ્યાં છે.

– © દક્ષેશ કોન્ટ્રાકટર ‘ચાતક’

6 Comments

રાધા ગણાય નહીં

મ્હેંદીની ભાત જે રીતે ડાઘા ગણાય નહીં,
આંખોના હાવભાવને વાચા ગણાય નહીં.

જેમાં હું મારી મા ને સમજાવી ના શકું,
એને તમે ભલે કહો, ભાષા ગણાય નહીં.

મમ્મીની બ્હેન જે ઘરે માસી બને નહીં,
પપ્પાના ભાઈ એ ઘરે કાકા ગણાય નહીં.

બ્હેનીનો પ્રેમ ને દુઆ એમાં વણાઈ ગ્યા,
સૂતરના તાંતણા પછી ધાગા ગણાય નહીં.

જીવનની વાનગી નથી સ્વાદિષ્ટ એ વિના,
આંસુઓ એટલે જ કૈં ખારા ગણાય નહીં.

‘ચાતક’, વિરહની વારતા જેમાં લખી ન હો,
એવી કિતાબને કદી રાધા ગણાય નહીં.

– © દક્ષેશ કોન્ટ્રાકટર ‘ચાતક’

12 Comments

રઘવાયા નહીં કરો

વિતરાગી સંતની કદી માયા નહીં કરો,
માણસનો અર્થ ભૂલથી પડછાયા નહીં કરો.

જેને નિહાળતાં સ્વયં દરિયો બળી મરે,
રેતીમાં ભીની એટલી કાયા નહીં કરો.

સૂરજના સ્પર્શ માત્રથી બેઠું થઈ જશે,
ઝાકળ જીવાડવા તમે છાંયા નહીં કરો.

સપનાંના દેશનું તમે કોઈ મકાન છો ?
આંખો મીંચ્યેથી કોઈની બંધાયા નહીં કરો.

કોઈની યાદ આવતાં દોડી જવું પડે,
આંસુને એટલા બધા રઘવાયા નહીં કરો.

દુઃખો તમારી જિંદગીભરની કમાઈ છે,
જાહેરમાં એના વિશે ગાયા નહીં કરો.

‘ચાતક’ તમોને ભૂલવા કોશિશ કરી રહ્યો,
મનમાં જ મંત્ર થઈને બોલાયા નહીં કરો.

– © દક્ષેશ કોન્ટ્રાકટર ‘ચાતક’

7 Comments

તાશ લગાવી બેઠી છે


આજે મીતિક્ષા.કોમ આઠ વરસ પૂરા કરી નવમા વર્ષમાં પ્રવેશે છે. આજે મીતિક્ષાબેનનો પણ જન્મદિવસ છે. એમને જન્મદિનની અઢળક શુભેચ્છાઓ. અત્યાર સુધી આપ સૌ મિત્રોનો સાથ, સહકાર અમને મળતો રહ્યો છે એ બદલ સહુનો દિલથી આભાર.
* * * * *
રણની વચ્ચે છાંયપરી તાલાશ લગાવી બેઠી છે,
ગર્મ હવાઓ ઝંઝાજળની પ્યાસ લગાવી બેઠી છે.

દૃશ્યોની સંદૂકમાંથી નીકળે છે કેવળ સન્નાટા,
આંખો તોયે પગરવ ઉપર તાશ લગાવી બેઠી છે.

પાંપણના નામે બારીએ સ્વીકારી લીધા પર્દા,
આંખોના નામે આખું આકાશ લગાવી બેઠી છે.

ઈચ્છાકુંવરી કરિયાવરમાં શ્વાસ માંગવા આવી, ને
જીવણબાઈ એક સદીની આશ લગાવી બેઠી છે !

અંધારી રાતોને સૂરજનાં શમણાં બતલાવો નહીં,
સેંથીમાં એ ભવભવનો ઉજાસ લગાવી બેઠી છે.

આજ ખુશાલીનો અવસર છે ‘ચાતક’ એનાં આંગણમાં,
મારી આંખો મહેંદીની ભીનાશ લગાવી બેઠી છે.

– © દક્ષેશ કોન્ટ્રાકટર ‘ચાતક’

15 Comments