દૃશ્ય ક્યાંથી લાવવા ?

આંખને ઠારી શકે એ દૃશ્ય ક્યાંથી લાવવા ?
સાવ સીધી વાતમાં રહસ્ય ક્યાંથી લાવવા ?

ગામની બૂરાઈના ઢગ દૂર કરવા શક્ત હો,
ઘર-ગલી એવા હવે અસ્પૃશ્ય ક્યાંથી લાવવા ?

ઊમ્રની સાથે વહીને કાળગર્તામાં ગયા,
દોસ્ત, વીતેલા સ્મરણ તાદૃશ્ય ક્યાંથી લાવવા ?

સાંજ પડતાં આથમીને અસ્ત થાતાં દેહમાં,
ફેર સૂર્યોદય સમા આયુષ્ય ક્યાંથી લાવવા ?

ભીંત પર લટકી કરે વરસાદ આશીર્વાદનો,
આદમી એવા હવે અદૃશ્ય ક્યાંથી લાવવા ?

સ્મિત કરતાં ફડફડે છે લોક સૌ એકાંતમાં,
એમના ચ્હેરે હવે અટ્ટહાસ્ય ક્યાંથી લાવવા ?

જીવવા માટે જરૂરી હાડ-સ્નાયુ-ચામ છે,
શ્વાસ ‘ચાતક’ પણ અહીં અવશ્ય, ક્યાંથી લાવવા ?

– દક્ષેશ કોન્ટ્રાકટર ‘ચાતક’

COMMENTS (12)

સુંદર રચનાના આ શેર વધુ ગમ્યા

સાંજ પડતાં આથમીને અસ્ત થાતાં દેહમાં,
ફેર સૂર્યોદય સમા આયુષ્ય ક્યાંથી લાવવા ?

ભીંત પર લટકી કરે વરસાદ આશીર્વાદનો,
આદમી એવા હવે અદૃશ્ય ક્યાંથી લાવવા ?

આંખને ઠારી શકે એ દૃશ્ય ક્યાંથી લાવવા ?
સાવ સીધી વાતમાં રહસ્ય ક્યાંથી લાવવા ?

ભૈ વાહ ક્યા બાત હૈ… મત્લાનો ઉઘાડ બહુ સરસ છે..

વાહ વાહ સરસ ગઝલ ….અને મઝાના કાફિયા…
ઊમ્રની સાથે વહીને કાળગર્તામાં ગયા,
દોસ્ત, વીતેલા સ્મરણ તાદૃશ્ય ક્યાંથી લાવવા ?

મત્લા ખૂબ ગમ્યા અને હા કાફિયા પણ નવાં..આ લાઇનો ગમી
સ્મિત કરતાં ફડફડે છે લોક સૌ એકાંતમાં,
એમના ચ્હેરે હવે અટ્ટહાસ્ય ક્યાંથી લાવવા ?
સપના

Reply

સુંદર ગઝલ દક્ષેશભાઈ બધા જ શેર ગમે તેવા છે…
સાંજ પડતાં આથમીને અસ્ત થાતાં દેહમાં,
ફેર સૂર્યોદય સમા આયુષ્ય ક્યાંથી લાવવા ?

સરસ અને તાજગીસભર રચના.

– અઘરા કાફિયા અને રદીફની મોકળાશ (?, !) – આ ગઝલ માટે એક પડકાર ઊભો કરે છે.
– રહસ્ય, અવશ્ય કાફિયાઓ સામાન્ય રીતે લગાલ માપમાં લેવાય છે.
– બીજા શેરને પોલિટિકલી કરેક્ટ શબ્દથી સંમાર્જિત કરી શકાય કે એમ એ શકયતા તપાસવા જેવી ખરી.

ચિત્રથી લઈ સુંદરમ સુધી, સંસ્મૃતિથી માંડી એકાકી વેદના સુધી અને છેવટે ઉપનિષદમાં પણ ફરી આવ્યો એક જ ગઝલમાં. ઘણુ બધું ગુંથવાનો પ્રયત્ન થયો છે. ગમ્યો.

Reply

મત્લા બહુ જ સરસ થયો છે. બીજા શેરમાં ભંગીપણા શબ્દ ગઝલના મિજાજને કઠતો લાગે છે. અન્ય શબ્દથી ભાવ નિષ્પન્ન કરો તો સારુ. અન્યથા સરસ ગઝલ. દલીત શબ્દનો ઉપયોગ થઇ શકે.

મઝા પડી. સરસ ગઝલ, ખાસ કરીને છેલ્લો શેર ખૂબ ગમ્યો.

હાક પડે ને થાય શુરા પુરા એવા પાળિયા ક્યાંથી લાવવા?????

આંખને ઠારી શકે એ દૃશ્ય ક્યાંથી લાવવા ?
સાવ સીધી વાતમાં રહસ્ય ક્યાંથી લાવવા ?

સાંજ પડતાં આથમીને અસ્ત થાતાં દેહમાં,
ફેર સૂર્યોદય સમા આયુષ્ય ક્યાંથી લાવવા ?

સુંદર રચના !
મત્લાનો શે’ર તો લાજવાબ થયો છે.
અભિનંદન !

પંચમભાઈ, કીર્તિકાન્તભાઈ,
આપના સૂચનને અનુસરી બીજો શેર બદલ્યો છે.
ગામના ભંગીપણાને દૂર કરવા શક્ત હો … ને બદલીને
ગામની બૂરાઈના ઢગ દૂર કરવા શક્ત હો .. કર્યું છે. આશા છે આપને ગમે. આપના સૂચન બદલ આભાર.

Leave a Comment

Comment (required)

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Name (required)
Email (required)