Press "Enter" to skip to content

રસ્તો

કાખઘોડીથી સરકતો હોય છે,
હાંફતો ચિક્કાર રસ્તો હોય છે.

ભીડનું ભેલાણ આઘું રાખવા,
પગરવોને એય કસતો હોય છે.

સાંજ પડતાં ટૂંટિયું વાળી પછી,
દર્દથી એ પણ કણસતો હોય છે.

શૂન્યતા એનેય ગભરાવે સતત,
હમસફરને એ તરસતો હોય છે.

આખરી મંઝિલ સુધી પહોંચાડવા,
એ પ્રયત્નો ખૂબ કરતો હોય છે.

મૂક સેવા, આશ બદલાની નહીં,
સ્થિરતા એનો શિરસ્તો હોય છે.

માર્ગભૂલ્યા માનવો માટે કદી,
એ પ્રગટ ગેબી ફરિશ્તો હોય છે.

ચામડી ‘ચાતક’ ભલે આસ્ફાલ્ટની,
લાગણીથી એ ધબકતો હોય છે.

– દક્ષેશ કોન્ટ્રાકટર ‘ચાતક’

13 Comments

  1. Usha
    Usha March 25, 2011

    Dear Daksehshbhai,
    What a wonderful creation!!!! You have really put life in this poem…and brought a non living thing into being one!!!!!

    Can you please put મારુ જીવન અંજલિ થાજો….It is a very nice bhajan teaching us to be humble and helpful… I do not know who is the singer, but during my recent visit to Bombay, I heard it in a temple…..If possible, please put the audio and script both together as you always do for most of your daily gifts…….Thanks.
    [મુકાઈ ગયેલું છે. અનુક્રમણિકા-1 તપાસી જશો. – Admin]

  2. Shailesh Patel
    Shailesh Patel March 25, 2011

    આસ્ફાલ્ટની ચામડી ધરાવતો રસ્તો મુસાફિર માટે તલસતો હોય છે !!! અંતે તો દરેકે રસ્તેથી જ પસાર થવાનું હોય છે !!

  3. Yatri
    Yatri March 25, 2011

    ચામડી ‘ચાતક’ ભલે આસ્ફાલ્ટની,
    લાગણીથી એ ધબકતો હોય છે. = વજ્રાદપિ કઠોરાણી મૃદુનિ કુસુમાદપી!
    વાહ્! એક નિર્જીવ લાગતા રસ્તાને “ચાતકે” પોતાના ભાવ સાથે ભાષા આપીને ચિરંજીવી સજીવ બનાવી દીધો! તો સાથે સાથે નિરસ રસ્તા જેવા થતા જતા “માણસ”ને “સાચો રસ્તો” બનવાની ગજબની વાત કહી દીધી!
    ભાઈ વાહ્!

  4. Daxesh Contractor
    Daxesh Contractor March 26, 2011

    મિત્રો,
    ગઈકાલે પોસ્ટ કર્યા પછી બીજા બે શેર લખાયા, જેનો ઉમેરો કર્યો છે. અને એક શેરમાં થોડો ફેરફાર કર્યો છે. આશા છે આપને પસંદ આવે. જે મિત્રોએ અભિપ્રાય આપી દીધો છે, તેઓ મને આ પરિવર્તન બદલ માફ કરશે એવી અપેક્ષા છે.

  5. Pancham Shukla
    Pancham Shukla March 27, 2011

    રસ્તાને સજીવન કરતી મુસલસલ રચના. સંદર્ભ સાતત્યથી એક પ્રકારની પૂર્ણતા અનુભવાય છે.

  6. Himanshu Patel
    Himanshu Patel March 27, 2011

    કાખઘોડીથી સરકતો હોય છે,
    હાંફતો ચિક્કાર રસ્તો હોય છે.
    અપૂર્ણ માણસ અને તેની ગતને સપેક્ષ કરતી ગઝ્લ અને ભાષા,સુંદર.

  7. Pragnaju
    Pragnaju March 27, 2011

    મૂક સેવા, આશ બદલાની નહીં,
    સ્થિરતા એનો શિરસ્તો હોય છે.

    માર્ગભૂલ્યા માનવો માટે કદી,
    એ પ્રગટ ગેબી ફરિશ્તો હોય છે.

    રસ્તામા સજીવારોપણ અલંકાર દ્વારા અદભૂત લાગણીઓનું દર્શન કરાવવા બદલ ધન્યવાદ.

  8. Narendra Jagtap
    Narendra Jagtap March 27, 2011

    ખુબ જ સરસ રચના…. આપે જે રસ્તા વિષે નિરુપણ કર્યુ છે તે ભાવવાહી અને પુર્ણ છે…ખુબ જ સરસ ….અભિનંદન્

  9. P Shah
    P Shah March 28, 2011

    સુંદર ભાવપૂર્ણ રચના !

    અભિનંદન !

  10. Dinkar Bhatt
    Dinkar Bhatt March 28, 2011

    ખુબજ સુંદર, રસ્તા વિષે આટલું સુંદર સજીવારોપણ પહેલા ક્યારેય નથી માણ્યું.

  11. Manhar Mody
    Manhar Mody March 28, 2011

    સરસ ભાવવાહિ રચના. બધા જ શેર અર્થપૂર્ણ છે. નિર્જીવ રસ્તામાં તમે જાન રેડી દીધી છે, દક્ષેશભાઈ. અભિનંદન.

    શૂન્યતા એનેય ગભરાવે સતત,
    હમસફરને એ તરસતો હોય છે.

    વાહ,વાહ.

  12. Kanchankumari P Parmar
    Kanchankumari P Parmar April 2, 2011

    હોય હમસફર મીઠો તો રસ્તોય ભીનો લાગે છે; બાકી તો સાવ જ સુકો ને લુ ઝરતો હોય છે …….

Leave a Reply to Pancham Shukla Cancel reply

Your email address will not be published. Required fields are marked *

This site uses Akismet to reduce spam. Learn how your comment data is processed.