હર પ્રણયની વારતાના અંત નોખા હોય છે,
ક્યાંક આંસુ, ક્યાંક કંકુ સાથ ચોખા હોય છે.
ખુશનસીબોના જ કિસ્મતમાં લખી દિવાનગી,
બદનસીબોના લલાટે ફક્ત ધોખા હોય છે.
આમ તો બે હોઠ, આંખો, બે જ હૈયાઓ મળે,
તોય અંદાજો મિલનના સૌ અનોખા હોય છે !
પ્રેમની તસવીર કો’દિ ધુંધળી થાતી નથી,
સ્મિત મુખ પર ઝળહળે, છો દાંત બોખા હોય છે.
એ સદીઓથી થતા ‘ચાતક’ ભલે બદનામ પણ,
એમને જોવા તરસતાં સહુ ઝરોખા હોય છે.
– દક્ષેશ કોન્ટ્રાકટર ‘ચાતક’
અશોકભાઈ,
તમારી વાત સો ટકા સાચી. પણ લોકબોલીમાં આપણે જેમ ઘઉં દળવાને બદલે લોટ દળવાની વાત કરીએ એવું છે… દળેલાને જ લોટ કહેવાય. એ જ રીતે સામાન્ય બોલચાલમાં દાંત ન હોય તો – દાંતે બોખા છે – એમ પ્રયોજીએ છીએ. એ પરથી દાંત બોખા હોય છે એમ લખ્યું છે. સૂચન બદલ આભાર.
Nice gazal