Press "Enter" to skip to content

ઘેઘૂર ગરમાળા હશે


2011 ના ઈસુના નવા વર્ષ નિમિત્તે સર્વ વાચકમિત્રોને શુભકામનાઓ.

લાગણીના ગામમાં ઘેઘૂર ગરમાળા હશે,
ભીંતના નામે ગૂંથેલા એક-બે જાળા હશે.

સદ્યસ્નાતા સુંદરીના કેશક્લાપોમાં મઢ્યા,
ફૂલના આકાર સરખા છીપ-પરવાળા હશે.

આસમાની ઓઢણી પ્હેરી પળેપળ ઝૂમતાં,
રં ગ બે રં ગી પતંગા કૈંક રૂપાળા હશે.

રાતભર પહેરો હશે ત્યાં ચાંદ પૂનમનો, અને
તારલાઓએ ભર્યા ક્ષણવાર ઉચાળા હશે.

કલ્પનાઓથી ભર્યા ઉપવન વચાળે હેમનાં,
સપ્તરંગી સંસ્મૃતિઓથી સભર માળા હશે.

દેવ-શા દૈવી અલૌકિક ગૌરવર્ણા માનવી,
સ્નેહ ને સૌંદર્યના સાચે જ સરવાળા હશે.

ભૃંગ ‘ચાતક’ થઇ ટહલતા, રાતરાણીને ભવન,
મ્હેંકમાં ગૂંથેલ કોઈ ખાસ વરમાળા હશે.

– દક્ષેશ કોન્ટ્રાકટર ‘ચાતક’

15 Comments

  1. Pragnaju
    Pragnaju January 2, 2011

    નવા વર્ષની શુભકામનાઓ.

    સુંદર ગીતરચના…

    લય સરસ- ભાવ સ-રસ રીતે ગુંથાયો છે
    કલ્પનાઓથી ભર્યા ઉપવન વચાળે હેમનાં,
    સપ્તરંગી સંસ્મૃતિઓથી સભર માળા હશે.

    દેવ-શા દૈવી અલૌકિક ગૌરવર્ણા માનવી,
    સ્નેહ ને સૌંદર્યના સાચે જ સરવાળા હશે.
    યાદ
    આ તો લાગણીનું ગામ છે ઓ શ્યામ,
    એમાં એક જ કેડીએ કેમ ચાલું ?

  2. Sudhir Patel
    Sudhir Patel January 2, 2011

    વાહ! સુંદર ગઝલ સાથે સૌને નવા વર્ષની શુભકામનાઓ!
    સુધીર પટેલ.

  3. Himanshu Patel
    Himanshu Patel January 2, 2011

    નવા વર્ષની શુભકામનાઓ.
    લાગણીના ગામમાં ઘેઘૂર ગરમાળા હશે,
    ભીંતના નામે ગૂંથેલા એક-બે જાળા હશે.
    જાળામાં કે એની પારદર્શકતામાં ભીંત જેવી અપારદર્શકતા લાગણીની નક્કરતા રચી આપે છે.

  4. સરસ લયબદ્ધ ગઝલ દક્ષેશભાઈ,
    પુત્રના લક્ષણ પારણાંમાંથી -એમ,ગઝલના પ્રથમ શેરથી જ વાચકને પકડી/જકડી લે એવી સુંદર અલંકારો અને અભિવ્યક્તિથી અલંકૃત આખી ગઝલ એક અલગ જ સૌંદર્ય લઈને આવી છે.
    -અભિનંદન.

  5. Dr P A Mevada
    Dr P A Mevada January 2, 2011

    શ્રી દક્ષેશભાઈ,
    છેલ્લી પંક્તિ વિશેષ ગમી ગઈ. સરસ રચના, આનંદ.

  6. Dilip
    Dilip January 2, 2011

    સદ્યસ્નાતા સુંદરીના કેશક્લાપોમાં મઢ્યા,
    ફૂલના આકાર સરખા છીપ-પરવાળા હશે.
    ખુબ સુન્દર ગઝલ ચાતક …

  7. Narendra Jagtap
    Narendra Jagtap January 2, 2011

    વાહ વાહ દક્ષેશભાઇ….. સરસ શબ્દ ભંડોળ સાથેની ખુબસુરત ગઝલ…….

  8. Pancham Shukla
    Pancham Shukla January 2, 2011

    સુંદર ગઝલ. અલંકારિક પદાવલી અને નર્યા સૌંદર્યબોધની રચના.

  9. Manvant Patel
    Manvant Patel January 3, 2011

    અતિઉત્તમ ગઝલ ! આભાર કવિનો !

  10. Manhar Mody
    Manhar Mody January 3, 2011

    સુંદર અલંકારોથી અને સુસંસ્ક્રુત શબ્દો વડે શણગારાયેલી લયબદ્ધ ગઝલ. કવિને ખુબ ખુબ અભિનંદન.

  11. P Shah
    P Shah January 4, 2011

    સુંદર રચના !
    લય અને સઁવેદનોનો સુભગ સમન્વયથી
    એક સુંદર ગીતની રચના થઇ છે.
    અભિનંદન !

  12. Manvant Patel
    Manvant Patel January 8, 2011

    ચિત્ર કેટલુ સરસ છે ? ચિત્રકારને દાદ આપવી ઘટે !

  13. Paru Krishnakant
    Paru Krishnakant January 9, 2011

    અભિનંદન ! સરસ અતિસુંદર રચના !

  14. ભૂષણ પંકજ ઠાકર
    ભૂષણ પંકજ ઠાકર August 20, 2011

    ખુબ જ સરસ ગઝલ. મજા આવી ગઇ.

Leave a Reply to Manvant Patel Cancel reply

Your email address will not be published. Required fields are marked *

This site uses Akismet to reduce spam. Learn how your comment data is processed.