Press "Enter" to skip to content

ક્ષણનાં પારેવડાંને શોધીએ

ચાલ રવિકિરણોનાં માળામાં જઈને એક ક્ષણનાં પારેવડાંને શોધીએ,
ધુમ્મસના દરિયામાં ઘટના ખોવાઈ, જરા હળવે જઈ એને ઊલેચીએ.

ફુંદરડે ફરતાતાં, મંદિરની પાળ અને પિપળના પાન હજી યાદ છે,
છલકાતી ગાગરમાં મલકાતું જોબન ને ઉઘડેલો વાન હજી યાદ છે,
ગજરામાં ગૂંથેલા મોગરાની કળીઓને સંગ સંગ આજ ફરી મ્હોરીએ … ચાલ

પરભાતે પાંપણ પર સૂરજના કિરણોની પાથરી પથારીઓ હેતની,
દરિયાના મોજાં ને ભરતી ને ઓટમહીં વહીએ થઈ મુઠી-શી રેતની,
છીપલાંની છાતીમાં છૂપેલાં મોતી સમ સૂતેલાં સોણલાંને ગોતીએ … ચાલ

આ વહેવું એ જળ અને મળવું એ પળ તો જલધિની ઝંખના શું કામની ?
કોયલ ના ટહુકે જો આંબાની ડાળ તો એ મ્હોરેલી મંજરી શું કામની ?
હર્ષ અને શોકના વાદળાંઓ કાજળ સમ ‘ચાતક’શી આંખોમાં આંજીએ … ચાલ

– દક્ષેશ કોન્ટ્રાકટર ‘ચાતક’

14 Comments

  1. Raju Yatri
    Raju Yatri December 12, 2010

    અફલાતૂન!
    ધૂમ્મસના દરિયામાં અને છીપલાંની છાતીમાં તો વળી જળ, પળ અને જલધિની આ અલૌકિક કલ્પનાના વિશાળ સાગરને “ચાતકે” ગાગરમાં ભરી દીધો!

  2. Himanshu Patel
    Himanshu Patel December 12, 2010

    ગજરામાં ગૂંથેલા મોગરાની કળીઓને સંગ સંગ આજ ફરી મ્હોરીએ ….અથવા
    કોયલ ના ટહુકે જો આંબાની ડાળ તો એ મ્હોરેલી મંજરી શું કામની..
    અસલ ગુજરાતી સ્પર્શથી મહેંકતું ગીત બહુ જ ગમ્યું

  3. Sapana
    Sapana December 12, 2010

    તમારી ઈચ્છાઓ ગમી ..કાશ કે ઇન્સાન બધું રિવાઇન્ડ કરીને ભૂતકાળમાં જઈ શકે તો ઘણી ભૂલો સુધારી શકે..અને દુનિયા સ્વર્ગ જેવી કરી શકે..
    સપના

  4. Pancham Shukla
    Pancham Shukla December 12, 2010

    લય અને તળભૂમીની સુગંધથી ભર્યું ભર્યું સુંદર ગીત.

  5. Devika Dhruva
    Devika Dhruva December 12, 2010

    સુંદર લયબદ્ધ્, ગણગણવાનું મન થાય તેવૂં ગીત…

  6. Saryu Parikh
    Saryu Parikh December 13, 2010

    વાહ! બહુ સરસ ભાવ, શબ્દોનો વણાટ.
    સરયૂ પરીખ

  7. Chetu
    Chetu December 13, 2010

    વાહ ..!!…આ વહેવું એ જળ અને મળવું એ પળ તો જલધિની ઝંખના શું કામની ?
    કોયલ ના ટહુકે જો આંબાની ડાળ તો એ મ્હોરેલી મંજરી શું કામની ?
    સુન્દર લયબદ્ધ રચના …!! … દરેક શબ્દનો સમન્વય પણ સુન્દર..!

  8. Pragnaju
    Pragnaju December 13, 2010

    આ વહેવું એ જળ અને મળવું એ પળ તો જલધિની ઝંખના શું કામની ?
    કોયલ ના ટહુકે જો આંબાની ડાળ તો એ મ્હોરેલી મંજરી શું કામની ?

    સુંદર ભાવ અભિવ્યક્તી.

  9. Dinkar Bhatt
    Dinkar Bhatt December 13, 2010

    સુંદર રચના અને ખુબ જ ઉમદા કલ્પન, ભુતકાળ વાગોળવાની મજા કંઇ ઓર જ છે.

  10. વાહ….!
    પ્રવાહિત અને સંવેદનાથી તરબતર ગીત, ભાવ અને અભિવ્યક્તિ બન્ને સરસ રહ્યા.

  11. સુનીલ શાહ
    સુનીલ શાહ December 13, 2010

    ક્ષણના પારેવડાંને શોધવાની વાત સ્પર્શી ગઈ…સુંદર ગીત

  12. P Shah
    P Shah December 13, 2010

    સુંદર રચના !

    ગીતનો લય ખૂબ ગમ્યો.

    વારંવાર ગણગણવું ગમે તેવું ગીત !

    અભિનંદન !

  13. Narendra Jagtap
    Narendra Jagtap December 13, 2010

    શબ્દોની સજાવટ અને લયની મઝાની રમઝટના સારા કોંટ્રાક્ટર છો તમે… એ આજે આ રચનાથી સાબિત કરી દીધું છે ..વાહ વાહ અભિનંદન.

  14. Manhar Mody
    Manhar Mody December 20, 2010

    ખળખળ વહેતા ઝરણા જેવું મસ્ત ગીત.

Leave a Reply to Pancham Shukla Cancel reply

Your email address will not be published. Required fields are marked *

This site uses Akismet to reduce spam. Learn how your comment data is processed.