મને મળવા તો આવ

મિત્રો, આજે મારી એક સ્વરચિત કૃતિ રજૂ કરું છું. પ્રત્યેક વ્યક્તિના હૈયામાં પોતાના પ્રિયતમને મળવાની ઝંખના હોય છે. એ પછી રાધાના હૈયામાં કૃષ્ણને માટે હોય, મીરાંના હૈયામાં શ્યામને માટે કે સીતાના હૈયામાં રામને માટે. અહીં સનાતન મિલનની એવી ઝંખનાને શબ્દોનું રૂપ મળ્યું છે. સાંજનો અર્થ કેવળ સૂર્યનું આથમવું નથી પણ યુવાનીના દિવસોનું વીતી જવું છે. ગીતની શરૂઆતની પંક્તિઓમાં પ્રકૃતિમાં પથરાયેલા ઈશ્વરનું રૂપક વર્ણન છે તો મધ્યમાં સ્વપ્નમાં અલપઝલપ થતાં દર્શનનો અણસાર છે. પણ જેને અનુભૂતિની અવસ્થા કહેવામાં આવે છે તે તો પ્રકટ દર્શન વગર ક્યાંથી મળે ? ચિરકાળના વિચ્છેદ પછી હૈયામાં ઘૂંટાતી મિલનની તીવ્ર તરસ અહીં શાબ્દિક અભિવ્યક્તિ પામી છે.

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.


મને મળવા તો આવ, હવે ઢળવા લાગી છે, આ શરમાતી સોનેરી સાંજ,
તારી સુરતાના સુરમાને આવીને આજ, ઓ વ્હાલમ ! મુજ આંખ્યુંમાં આંજ.

મઘમઘતા મોગરાઓ શ્વાસમાં ભરીને તું મ્હેકાવી દે છે પવન
પગલાંના પગરવથી કળીઓના કાળજામાં ફૂટે છે કેવાં કવન !
હવે પાંપણની પગથી પર પગલાં ભરીને જરા છલકાવી દેને નયન … મને મળવા

દિવસો આ વ્હેતા જો, પાણીની જેમ અને જાય તે પાછા ના આવતા
મનડાંનાં માનસરે મારા આ હંસો શમણાંનો ચારો ના ચારતા,
હવે જાતે જ પ્રકટીને પૂરી કરી દે તું સપનામાં માંડેલી વારતા … મને મળવા

સૂની છે સેજ અને સૂની સિતાર મારી, સૂનાં છે હૈયાના તાર,
તારા જ સ્વર્ગીય સ્પર્શે ઉઘડશે આ ‘ચાતક’ની ઝંખનાના દ્વાર,
હવે શ્વાસોની ફરફરતી દેરીએ આવીને પ્હેરાવ હૈયાનો હાર … મને મળવા

– દક્ષેશ કોન્ટ્રાકટર ‘ચાતક’

COMMENTS (21)

જય શ્રીકૃષ્ણ દક્ષેશભાઈ,
ખુબ જ સુંદર રચના. જાણે ચાતકની જેમ જ આ ચાતકની પણ મળવાની ઈચ્છાનું વર્ણન થઈ ગયું,

હવે જાતે જ પ્રકટીને પૂરી કરી દે તું સપનામાં માંડેલી વારતા

Reply

આ એક અમર કૃતિ છે.
“ચાતક” કુદરતી કવિની અદભૂત છાપ ઉભી કરે છે. “ચાતકે” આ રચના દ્વારા માનવ મનની તીવ્ર ઈચ્છા, ઉપાસના અને અભિલાષાને વાચા આપી અને પોતે માત્ર “બ્લોગ”ના કવિ નથી, પરંતુ માનવીય કવિ છે, એ સાબિત કરી બતાવ્યું છે. એક મિત્ર તરીકે મને ગર્વ છે કે તેઓ ખેંચાખેંચની કવિ સૃષ્ટિમાંથી અલગ તરી આવ્યા છે, અને “મિતિક્ષા”નું પણ ગૌરવ જાળવ્યું છે. ગુજરાતી સાહિત્ય તેની નોંધ લેશે તો સમગ્ર સાહિત્ય જગતને લાભ થવાનો છે. અને નહિ લે તો, “ચાતક” તો – “એક યોગી સમો જીવ છે……” અસ્તુ.

Reply

દક્ષેશભાઇ,
અભિનદન, સરસ કૃતિ છે.

Reply

Nice

1 2

Leave a Comment

Comment (required)

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Name (required)
Email (required)

This site uses Akismet to reduce spam. Learn how your comment data is processed.