ક્યાં ખોવાયું બચપણ મારું ?
મોટા થયા પછી સૌથી વધુ સાંભરતી વસ્તુ બચપણ છે. લખોટી, ભમરડા, ગિલ્લી-દંડા, પત્તાં, ચાકનાં ટુકડાં, દોસ્તદારો સાથે કલાકો રમવાનું અને એવું કંઈ કેટલુંય એ મજાની દુનિયામાં હતું. દુનિયાદારીના બોજથી વિહોણાં એ દિવસો મોટા થવાની લ્હાયમાં ઈચ્છાએ કે અનિચ્છાએ પાછળ છૂટી ગયા. કૈલાસ પંડીતે એનું અદભુત ચિત્રણ કર્યું છે. સ્વચ્છ ભીંતો વિધવા જેવી લાગવી, ચાદર બાળવિહોણી માતા જેવી લાગવી .. માં અભિવ્યક્તિ શિખર પર હોય એમ લાગે છે. માણો કૈલાસ પંડીતની આ સુંદર નજમને મનહર ઉધાસના સ્વરમાં.
ઘરની સઘળી વસ્તુ મરી ગઇ, બહુ સુના છે ઘરના ખૂણા
શાંત ઉભા છે દ્વારના પડદા, બંધ પડ્યા છે મેજના ખાના
રોઇ રહ્યા છે સઘળાં રમકડાં …
સ્વચ્છ પડેલી ભીંતો ઘરની, લાગે જાણે વિધવા થઇ ગઇ
બિસ્તર કેરી ચાદર જાણે, બાળ વિહોણી માતા થઇ ગઇ
આખો દિ’ ઘર આખા ને બસ માથે લઇ ને ફરતો’તો
વસ્તુ ઘરની ઉલટી-સીધી, અમથો અમથો કરતો’તો
પેન લખોટી ચાકના ટુકડા ખિસ્સામાહેં ભરતો’તો
જુના પત્તા રેલ ટિકિટને મમતાથી સંઘરતો’તો
કોઇ દિ’ મેં શોધી નો’તી, તો યે ખુશીઓ મળતી’તી
લાદી ઉપર સૂતો તો ને આંખો મારી ઢળતી’તી
મારી વાતો દુનિયા આખી મમતાથી સાંભળતી’તી
ખળખળ વહેતા ઠંડા જળમાં છબછબિયાં મેં કિધા’તા
મારા કપડા મારા હાથે ભીંજવી મેં તો લીધા’તા
સાગર કેરા ખારા પાણી કંઇક વખત મેં પીધા’તા
કોણે આવા સુંદર દિવસો બચપણ માંહે દિધા’તા
સૂના થયેલા ખૂણા સામે વિહ્વળ થઇને નીરખું છું
શાંત ઉભેલા પડદાને હું મારા ફરતે વીટું છું
ઘરની સઘળી ભીતોંને હું હળવેથી પંપાળું છું
ખોવાયેલા વર્ષોને હું મારા ઘરમાં શોધું છું.
ક્યાં ખોવાયું બચપણ મારું ? ક્યાંકથી શોધી કાઢો…
મીઠા મીઠા સપનાંઓની દુનિયા પાછી લાવો …
મોટર બંગલા લઇ લો મારા, લઇ લો વૈભવ પાછો …
પેન લખોટી ચાકનાં ટુકડા મુજને પાછાં આપો …
- કૈલાસ પંડીત
April 26th, 2009 at 3:21 pm
ખૂબ સુંદરગીતની મધુર ગાયકી
April 27th, 2009 at 12:24 pm
મેં આ સાંભળીને મારા પંદર વરસ પહેલાના સફરની યાદ તાજી કરીને આનંદ અનુભવ્યો..મારા બાળપણનો સુવર્ણ સમય ક્યારેય પાછો નહીં મેળવી શકું…પણ હું તાજો તો દિલમાં ચોક્કસ કરી શક્યો…તમારા આ બ્લોગના માધ્યમથી હું સાંભળી શક્યો…તે બદલ મારા દિલથી તમને પ્રણામ.
April 27th, 2009 at 2:29 pm
ખુબ સુંદર રચના. હિન્દીમાં “વો કાગજ કી કશ્તી” ને ગુજરાતીમાં આ રચના..જીવનની શરુઆત બાળપણથી ને મારા દિવસની શરુઆત આ ગીતથી થઈ…અભિનંદન.
April 29th, 2009 at 8:08 pm
ખરેખર અદભુત રચના પ્રસ્તુત કરેલ છે. કાવ્યના પ્રત્યેક શબ્દને મારા જીવનમાં વાંચતી વખતે અનુભવું છું.
May 6th, 2009 at 12:08 am
when i listen this i m go down in my childhood days, its very heart touching gazal……..hope those wonderful days come back………
May 7th, 2009 at 1:43 am
ખરેખર “વો કાગઝકી કશ્તી” યાદ આવી ગઇ
July 14th, 2009 at 12:03 pm
આલિશાન દિવાનખાનામાં શોધું છું હું તણખલુ કે મળી જાય એ ચકલીનો માળો જે શૈશવે નિહાળતી હતી કુતૂહલ ભરી નજરે કેટલીય વાર… વાહ.. બાળપણ યાદ આવી ગયું.
May 22nd, 2011 at 12:16 pm
પેન લખોટી ચાકનાં ટુકડા મુજને પાછાં આપો …
કદાચ, બચપણ ના તે દિવસો પાછા આવી જાય
બચપણ આ દિવસો યાદ કરાવવા બદલ, મારા દિલ થી આભાર….