પાછો વળી જવાનો
હું સાંકડી ગલીમાં, રસ્તો કરી જવાનો
માણસ સુધી જવાનો, આગળ નથી જવાનો.
પાષાણ સમ હૃદયમાં, પોલાણ શક્ય છે દોસ્ત
તું ઓગળી પ્રથમ જા, એ પીગળી જવાનો.
એવી ખબર છે આવી, તું નીકળી નદી થઇ,
દરિયાની એટલે હું ખારાશ પી જવાનો.
તારા ઉપરની મારી, દીવાનગી ગમે છે,
મારા સિવાય કોને, હું છેતરી જવાનો?
હું છું જ કૈંક એવો, તું છોડ આ પ્રયત્નો,
તું ભુલવા મથે ને, હું સાંભરી જવાનો.
હોવાપણું ઓ ઇશ્વર, તારું વિવાદમાં છે,
મારી તરફ હું તેથી, પાછો વળી જવાનો.
- ગૌરાંગ ઠાકર
March 11th, 2009 at 10:00 am
ગૌરાંગ ઠાકરની સુંદર રચના પ્રસ્તુત કરવા બદલ ખુબ-ખુબ આભાર..
તેમજ ગુજરાતી સહિત્યના તમામ ચાહકોને હોળીની શુભ-કામનાઓ…