Press "Enter" to skip to content

હૃદયના દર્દની તમને જરા જો કલ્પના


જીવનભર જેને લોકોએ માન-સન્માન ન આપ્યું હોય, માંદા થયા હોય તો કદી ખબર જોવા જવાની તસ્દી ન લીધી હોય એવી વ્યક્તિનું મોત થાય ત્યારે લોકો એની શોકસભા ભરે, એના વિશે સારી સારી વાતો કરે, એ કવિને ખટકે છે. એથી એ કહે છે કે કમ સે કમ એ રીતે મરણનું મૂલ્ય જીવનથી વધુ લાગ્યું. મનહર ઉધાસને કંઠે ગવાયેલી ને દર્દમાં ઘૂંટેલી આ સુંદર ગઝલને આજે માણીએ.

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.


રેત ભીની તમે કરો પણ રણ સમંદર કદી નહીં લાગે
શબને ફૂલો તમે ધરો છો પણ મોત સુંદર કદી નહીં લાગે.
*
હૃદયના દર્દની તમને જરા જો કલ્પના આવે,
કસમથી આપની જીભે સદા સો સો દુઆ આવે.
 
તમારી હોય જો ઇચ્છા વધાવી લઉં હું એને પણ,
સકળ બ્રહ્માંડની ઘેરાઈ મુજ પર જો વ્યથા આવે.
 
સહન હું તો કરી લઉં છું, ન સહેવાશે તમારાથી,
એ પાનું ફેરવી દેજો, જ્યાં મારી વારતા આવે.
 
જરા ઘૂંઘટ હટાવી ઝાંખવું નજરો બચાવીને,
અમારી જાન જાએ ને તમોને તો મજા આવે.
 
તમારા વાયદાઓ છે કે રેતી પર મિનારાઓ,
તમારું આવવું જાણે કે પશ્ચિમથી ઉષા આવે.
 
નજર દિલ પર પડે છે તો આ જખ્મો એમ ફૂલે છે,
કે પથ્થર જાય પાણીમાં ને ઉપર બુદબુદા આવે.
 
મરણનું મૂલ્ય જીવનથી વધારે એ રીતે લાગ્યું,
ન આવે કોઈ જ્યાં મળવાને ત્યાં આખી સભા આવે.
 
શિકાયત શું કરે દિલ કોઈ ના આવે ગજું શું છે ?
મોહબ્બત હોય જો ‘કામિલ’ તો ખુદ પાસે ખુદા આવે.

– ‘કામિલ’ વટવા 

6 Comments

  1. કુણાલ
    કુણાલ December 31, 2008

    ખુબ મજાની ગઝલ …. !! એકે એક શેર લા-જવાબ …

  2. પ્રતિક મોર
    પ્રતિક મોર February 10, 2009

    પળ ભરની આ મુલાકાતોમાં રહી નથી મઝાં
    મઝા તો જ્યારે હમેશ માટે મારી પાસે આવે.

    તોડી તોડી ને હું ફેકુ છું ગુલાબનાં ફુલ નદીમાં
    કે કદાચ સુગંધ દોડીને ક્યાક તારી પાસે આવે.

    પ્રતિક મોર
    pratiknp@live.com

  3. Kanchankumari Parmar
    Kanchankumari Parmar July 20, 2009

    જીવતાં જીવે એક ફુલએ ના મળિયું હવે આ હાર શાને? કાઢી નાખો જલ્દી, ડર છે મને ક્યાંક છબી ચિત્કાર કરી ઉઠશે….

  4. તેજસ શાહ
    તેજસ શાહ April 27, 2010

    મારી ગમતી ગઝલ સાંભળવાની મજા આવી. આભાર
    તેજસ શાહ

  5. Pushpa R Rathod
    Pushpa R Rathod July 2, 2010

    શબ્દો કરતાં અઘરું છે જીવન જો જીવીએ આપણે હૃદયથી. ઘણી સુંદર છે આ ગઝલ. આભાર.

  6. Navik Dave
    Navik Dave December 30, 2010

    દર્દનું બીજું નામ પ્રેમ તે આ ગઝલમાં કવિ કહે છે.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.