Press "Enter" to skip to content

ઝૂકવાથી પ્રેમ નથી થાતો


આજે મારી એક સ્વરચિત રચના રજૂ કરું છું. ઈશ્વરને માટે પાડેલો પોકાર કદી નિષ્ફળ જતો નથી. શરત એટલી કે એ સાચા હૃદયનો હોવો જોઈએ. અબોલ પ્રાણીઓ મનુષ્યના પ્રેમભર્યા વ્યવહારથી ગુલામ બનવા રાજી થઈ જાય છે. ભગવાન તો ભાવનો ભૂખ્યો કહેવાયો છે. એ પ્રેમથી કેમ ન પીગળે ? પરંતુ પ્રેમનો અર્થ મંદિરમાં જઈને ઘૂંટણિયે પડવામાં સીમિત નથી થતો. પ્રેમ તો એક હૃદયની બીજા હૃદય સાથે થતી ગોઠડી છે, અનુસંધાન છે, સંવેદનની આપ-લે છે.

તું રોજ પૂકારે છે એને, પોકાર વ્યર્થ નથી જાતો,
પ્રેમ ઝુકાવે છે સૌને, ઝૂકવાથી પ્રેમ નથી થાતો.

તું મંદિર જા કે મસ્જીદ જા, સરનામું એનું એક જ છે,
નામ બદલવાથી એનો આકાર અલગ નથી થાતો.

છે એક સમંદર સૂતેલો ભીતરની ભોમે વરસોથી,
એ સારું છે કે આંખોથી એનો ઘૂઘવાટ નથી થાતો.

ખળખળ વ્હેતી તુજ આંખોમાં સળગે છે લાશો સ્વપ્નોની,
કોણે કહ્યું, જળ-અગ્નિનો કો’દિ સહવાસ નથી થાતો ?

બે-ચાર કદમ સાથે માંડો ત્યાં માર્ગ અલગ ફંટાય અહીં,
એ સાચું છે કે શમણાંનો કાયમ સંગાથ નથી થાતો.

તું એમ જતાવે છે મુજને ભવભવના આપણે સંગાથી,
મિથ્યા છે હૈયાધારણ, પણ આ દિલમાં વ્હેમ નથી થાતો !

છે બાકી કાણાં પડીયામાં બે-ચાર શ્વાસ તણાં ટીપાં,
નભ ઘેરાયેલું ભાળીને ‘ચાતક’ નિઃશ્વાસ નથી થાતો.

– દક્ષેશ કોન્ટ્રાકટર ‘ચાતક’

7 Comments

  1. ashwin-sonal
    ashwin-sonal December 1, 2008

    તું રોજ પૂકારે છે એને, પોકાર વ્યર્થ નથી જાતો,
    પ્રેમ ઝુકાવે છે સૌને, ઝૂકવાથી પ્રેમ નથી થાતો.

    બે-ચાર કદમ સાથે માંડો ત્યાં માર્ગ અલગ ફંટાય અહીં,
    એ સાચું છે કે શમણાંનો કાયમ સંગાથ નથી થાતો.

    તું એમ જતાવે છે મુજને ભવભવના આપણે સંગાથી,
    મિથ્યા છે હૈયાધારણ, પણ આ દિલમાં વ્હેમ નથી થાતો !

    સાચી વાત છે ભઈ. સમજો તો સારું. આ કૃતિ સારી છે. સ્વરચિતનો જાદુ કંઇ ઓર જ છે.

  2. pragnaju
    pragnaju December 1, 2008

    તમારી પોતાની રચના ગમી
    તું એમ જતાવે છે મુજને ભવભવના આપણે સંગાથી,
    મિથ્યા છે હૈયાધારણ, પણ આ દિલમાં વ્હેમ નથી થાતો !
    છે બાકી કાણાં પડીયામાં બે-ચાર શ્વાસ તણાં ટીપાં,
    નભ ઘેરાયેલું ભાળીને ‘ચાતક’ નિઃશ્વાસ નથી થાતો.
    વાહ…તખલ્લુસ ચાતક છે-વિશ્વાસ પણ તેવો છે
    चातक वलखे मृगजळ जोई,
    ठंडक पामवा चान्दो जुए;
    तरस छीपे नहीं छतांय कोई,
    आंसुबुन्दो छेवटे पीए.

  3. Kantibhai patel
    Kantibhai patel December 2, 2008

    મિતિક્ષા,
    આભાર, સરસ મજાની વેબ સાઈટ બનાવી છે.
    કાન્તિભાઇ પટેલ
    વડોદરા.
    Cell . +91 9376223851

  4. Upasana
    Upasana December 3, 2008

    આમ જોવા જઈએ તો સહુને, કશાકનો ઈન્તજાર જોવા મળે છે,
    ચાતક છે તો વિરહીની વેદનાને વાચા મળે છે, અને અનેકને હમદર્દ મળે છે!
    આભાર – પ્રેમ ઝુકાવે છે સહુને….!!

  5. Kaushal
    Kaushal December 4, 2008

    This should be composed, wordings are too good.

  6. Kirti-kishore
    Kirti-kishore December 7, 2008

    ખૂબ સરસ રચના છે.

  7. Sheetal Pomal
    Sheetal Pomal April 24, 2015

    too Good…Superb.

Leave a Reply to Upasana Cancel reply

Your email address will not be published. Required fields are marked *

This site uses Akismet to reduce spam. Learn how your comment data is processed.