એમ પણ બને
શાંતિની ઝંખનામાં માનવ બહાર ફાંફા માર્યા કરે છે, પણ ખરેખર તો શાંતિ પોતાની અંદર રહેલી છે. અહીં ખૂબ સુંદર રીતે કહેવાયું છે કે જે શોધવામાં આખી જિંદગી પસાર થાય એ પગની તળે હોય એમ પણ બને. આપણે ત્યાં કહેવત છે કે કાખમાં છોકરું અને ગામમાં શોધે .. તે આનું નામ.
પકડો કલમ ને કોઈ પળે એમ પણ બને
આ હાથ આખેઆખો બળે એમ પણ બને
જ્યાં પહોંચવાની ઝંખના વર્ષોથી હોય ત્યાં
મન પહોંચતાં જ પાછું વળે એમ પણ બને
એવું છે થોડું : છેતરે રસ્તા કે ભોમિયા ?
એક પગ બીજા ને છળે એમ પણ બને
જે શોધવામાં જિંદગી આખી પસાર થાય
ને એ જ હોય પગની તળે એમ પણ બને
તું ઢાળ ઢોળિયો : હું ગઝલનો દીવો કરું
અંધારું ઘરને ઘેરી વળે એમ પણ બને.
- મનોજ ખંડેરિયા
October 25th, 2008 at 10:23 pm
હુ શોધતો હતો ફુલ અને ફુલ શોધતુ હતુ મને,
શોધતા શોધતા ગયા દુર તો આવ્યા કને એમ પણ બને.. સરસ કાવ્ય રચના છે.
October 25th, 2008 at 10:35 pm
- મનોજ ખંડેરિયાની ખૂબ જાણીતી -સૌને ગમતી રચના વાંચી આનંદ. રવિએ આના પરથી રમુજી રચના કરેલી તે યાદ આવી
શોધવા જાઓ પ્રેમ અને મળે મિત્ર, એમ પણ બને,
ક્યારેક મિત્ર જ હોય પ્રેમ, એમ પણ બને.
આંખમાં આવે આસું, પણ હોય એ ખુશીના, એમ પણ બને,
ક્યારેક ઝેર જ બચાવે ઝેરથી, એમ પણ બને.
લાગે શાંત પાણી,પણ હોય એકદમ ગેહરુ, એમ પણ બને,
સુરત હોય ભોળી, પણ દિલનાં કપટી, એમ પણ બને.
જાય સિંગ કિંગને લેવા,પણ પોતે જ કિંગ બની જાય, એમ પણ બને,
હોય ગંગુ તેલી જ રાજા ભોજ, એમ પણ બને.
હોય પોતે બ્રાહ્મણ, મિત્ર પીવડાવે દારુ,એમ પણ બને,
હંસ ચાલે કાગડાની ચાલ,એમ પણ બને.
[very entertaining - admin]
October 27th, 2008 at 8:17 pm
જે શોધવામાં જિંદગી આખી પસાર થાય
ને એ જ હોય પગની તળે એમ પણ બને
શોધવા જાઓ પ્રેમ અને મળે મિત્ર, એમ પણ બને,
ક્યારેક મિત્ર જ હોય પ્રેમ, એમ પણ બને.
આંખમાં આવે આસું, પણ હોય એ ખુશીના, એમ પણ બને,
ક્યારેક ઝેર જ બચાવે ઝેરથી, એમ પણ બને.
ગજબના પ્રાસ બેસાડ્યા છે. સાચું કહું તો જિદગીમાં આવું જ બનતું હોય છે પણ આપણે આવી રીતે ગાઈ શકતા નથી તે જ વિષમતા છે.